ISƆBU 22

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Kɛ̀ Edifɑsi Temɑɑ ɛì kou bɛ́i nkɛ dɔ̀:

²Kòo nìtì wenni dɛ̀ bo dɔɔ̀ bɑ Kuyie? Wèè ciì ò ciì omɑ́ɑ̀ kpɛ́í nkɛ.

³Kɑ̀ɑ wenni dɛ̀ bo dɔɔ̀ bɑ Kuyie nkunku muwɛ̃rímú mumɔu yiɛ̀? Kɑ̀ɑ dɔ̀ɔ̀ri Kuyie ndɔ́mɛ̀ kù bo cɔ̃ntɛ bɑ dɛ miɛkɛ?

⁴A wenni kɛ̀ Kuyie nnɛ́ dɑ potɑ́ɑ̀? A wetí kɛ̀ kù nɛ́ ndɑ bekùnɑ̀ɑ̀?

⁵A yɛi mmɛɛ̀ dɛutɛ́ dɛɛ̀ te, ɑ cɑɑ̀rìmɛ̀ mɛɛ̀ tontɛ́.

⁶A do ɔ̃ɔ̃ sɔ̃́ntɛ́ kɛ́hɛímu ɑ kou kpɛrɛ bɑ́ ò í dɑ mɔkɛnɛ̀ tìmɑtì, ɑ do ɔ̃ɔ̃ fietɛ onìtì yɑ̀ɑ̀tì kóò còńnɔ́ɔ mɛbii mmɛ.

⁷A do í pɑ̃ɑ̃ mmɛniɛ nsinɛ́yɛ̃ĩ bo wè, ɑ do í pɑ̃ɑ̃ mmudiì dikònnì bo wè.

⁸A nɔ̀ùtɛ̀ tɛɛ̀ do pikú muyuo nkɑ̀ɑ bɑkɛ́ dihɛì, ɑ dɛu mɛ̀ɛ̀ kpɛ́í ndo te kɑ̀ɑ tiekɛ kɛtenkɛ̀.

⁹A do bɛtòo bɛkúpobɛ̀ bɛ nɔu sìnùmmù ndi, kɛ fɛ̃́ũnko iciribí.

¹⁰Dɛɛ̀ te kɛ̀ bɛ̀ dɑ díí tipíìtì timɔu timɑ́tì, kɛ̀ kufɔ̃wɑɑ́ ndɑ do kɛ dɑ dɛ̀ɛ́tɛ́.

¹¹Kɛ̀ dɛ̀ dɑ udikoo bɑ́ ɑ tɛ̃́nkɛ í wúó, kɛ̀ dibiìnnì dɑ dɑ̀tínnɛ́ mɛniɛ nkɔ̃mɛ.

¹²Dɛ̀ í tú Kuyie mbo kɛĩ́nkɛ̀ nkɛ yɛwɛtɛ̀ miɛkɑɑ̀? Wéntɛ́ ɑ bo yɑ̀ siwɑ̃̀ɑ̃ dɛ́tirì kɛ dòmmɛ̀.

¹³Kɑ̀ɑ nɛ́ tú Kuyie mbɑ́ɑ́ nɑ kɛ́yɑ̀ dɛ̀ɛ̀ dɔ̀ɔ̀ri, kɛ tú kù bo nɑ kɛ́mboní dibiìnnì yɛwɛtɛ̀ miɛkɛ kɛ ti bekɛ́nɑ̀ɑ̀?

¹⁴Kɛ tú yɛwɛtɛ̀ kù kɑ̃nkɛ́ kù bɑ́ɑ́ nɑ kɛ́ ti yɑ̀, kɛ̀ kù nɔ̀ńkɛ́ tiwɛtì ĩ́nkɛ̀ nkɛ kɛ firì.

¹⁵A tũ ndɔ́ kɛ́nkpɑɑ́ tũ nkucɛ kótí nku, mɛyɛi nyɛmbɛ̀ do tũ nkɑ̀ɑ̀?

¹⁶Bɛ̀ pɛ̃ɛ̃tɛ́mu bɑ́ bɛ̀ mɔ̀nnì mu nyí tùɔ̀kɛ, mɛniɛ nhɔ̃ɔ̃ pɔ̃ntɛ́nɛ̀ mɛ̀ɛ̀ botí tɛcĩ́ɛ̃̀tɛ̀ pũũ.

¹⁷Bɛmbɛ bɛ̀ɛ̀ do nɑ́ɑ́ nKuyie nkɛ tú: Fũtɛ ti borɛ̀, fɔ̃́ mmuwɛ̃rímú mumɔu yiɛ̀ nhɑ bo nɑ kɛ́ ti dɔɔ̀ bɑ?

¹⁸Kuù mɔ́mmɔnku mɛ ndo bɛ̀ dɔ̀ɔ̀ mɛsɑ̀ɑ̀ nkɛ̀ mɛ̀ mpíɛ́kɛ́ bɛ cɛ̃́ĩ miɛkɛ, Mí nyí yóó yie mbɛyɛibɛ kó itié.

¹⁹Bɛ̀ɛ̀ wetí bɛ̀ yɑ̀ bɛyɛibɛ cɔú tìì yɛ̃ĩti kɛ̀ dɛ̀ bɛ̀ nɑrikɛmu, kɛ̀ dɛ̀ pĩ mmudɑɑ́ nwèè tu onitisɑ̀ù.

²⁰Ti dootitɔbɛ̀ bɛ̀ɛ̀ do ti kpɑnnɛ̀ bɛ̀ kpɑɑ́ boɑ̀? Muhɑ̃ɑ̃́ mmuù cɔ̀útɛ́ bɛ kpɑ̀tì.

²¹Wɛ̃tɛ kɛ́tɑunnɛ̀ ɑmɑ́ɑ̀ Kuyie nkɛ̀ dí nɑrikɛ, ɑ bo yɑ̀ ɑ wɛ̃̀tɛ kɛ pɛ̀tɛ́mɛ̀ mɛtuɔ̀.

²²Yie nkɛ́cɔutɛ́ itié nkù dɑ duɔ́ nyì, kɛ́ɑ̃nnɛ́ ku nɑ́ɑǹtì ɑ yɛ̀mmɛ̀ miɛkɛ.

²³Kɑ̀ɑ wɛ̃̀tɛní muwɛ̃rímú mumɔu yiɛ̀ mborɛ̀, ò yóó wɛ̃tɛ kɛ́ dɑ íimmu, kɛ̀ nsɑ̀ kɑ̀ɑ dɛ́tinnɛ̀ ɑ cĩ́ɛ̃̀tɛ̀ mɛyɛi.

²⁴Útóo ɑ sɔɔ mmutɑ̃́ɑ̃́ mmiɛkɛ Ofii kó mɛsɔɔ nsɑ̀ɑ̀mɛ̀, dootóo mɛ kukó nkó yɛtɑ̃́rɛ̀ miɛkɛ,

²⁵kɛ̀ muwɛ̃rímú mumɔu yiɛ̀ nní ntú ɑ kó mɛsɔɔ, kɛ́ntú timɑ́tì pɛ́ítì kó yɛcúò ɑ kpɛ́í.

²⁶Kɑ̀ɑ mpiɛti ɑ kó diwɛ̀ì Kuyie mmuwɛ̃rímú mumɔu yiɛ̀ mbo dɛ̀, kɑ̀ɑ tũntɛ ɑ ììkɛ̀ kɛ́ nkù bùɔ́.

²⁷Kɑ̀ɑ níí kù bɑ̀ńtɛ̀ kɛ̀ kùu keè, kɑ̀ɑ dɔ̀ɔ̀ ɑ kù cɑ̀nnɛnɛ̀ yɛ̀ɛ̀ nɔ̀ yɛmɔu.

²⁸Dɛ mmɔ̀nnì kɑ̀ɑ tɑ̃ɑ̃tɛ́ tì ɑ bo yɑ̀ ti yiemmɛ̀, kɑ̀ɑ cɛ ntú kuwenniku kɔku.

²⁹Dɛ mɔ̀nnì kɛ̀ wèè sĩ̀ńnɛ́ ɑ́ nte kòo íi nho yuu, kɛ yɛ̃́ Kuyie ndɛɛrímɛ̀ wèè nùɔ nsĩ̀ĩ́ nwè nwe.

³⁰Kù yóó dɛɛtɛ́mu ocɑɑ̀rìwè, A nɔu í sĩ̀ mmɛ̀ɛ̀ kpɛ́í.