ISƆBU 29

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Kɛ̀ Isɔbuu sɔɔtɛ́ kɛ́mbekù o kpɛti kɛ tú:

²We mbo wɛ̃tɛ kɛ́tɛ̃́nnɛ́ní bɛtɑ̃̀ɑ̃̀bɛ̀ bɛ̀ɛ̀ pɛ̃ɛ̃tɛ́? Kuyie ndo m bɑɑ yɛ̀ɛ̀ mɔ̀rɛ̀ bo yĩmɛ kɛ́wɛ̃tɛní?

³Kuyie nfìtírɛ̀ dɛɛ̀ do ɔ̃ɔ̃ nyuo n yuu ĩ́nkɛ̀, kuù do ɔ̃ nni mmí kɛyènkɛ̀ kɛ̀ n kèrí.

⁴N do bo dìì mɔ̀nnì n yiè kɛ̀ dɛ̀ dòmmɛ̀, Kuyie ndo kɑ̃nkɛ́ dìì mɔ̀nnì n cĩ́ɛ̃̀tɛ̀.

⁵Muwɛ̃rímú mumɔu yiɛ̀ ndo m bonɛ̀ dìì mɔ̀nnì, kɛ̀ n kó bɛdɑpɑ̀mbɛ̀ m murímu.

⁶N do bonti mɛtuɔ̀ mmiɛkɛ nkɛ, kɛ̀ odìfíè kó mɛkùɔ̀ mpìɛ́kɛ́ n tuò.

⁷N do ɔ̃ nkɛ̀ n yɛ̀ kɛ kɔ̀tɛ bɛhɛikɛ̀nkótíbɛ̀ kɑ̀ri dɛ̀, kɛ wɑɑ́ ndikɑ̀rì kɛ kɑ̀ri.

⁸Kɛ̀ bɛdɑpɑ̀mbɛ̀ n yɑ̀ bɛ̀ ɔ̃ɔ̃ nfũũ̀tìmu, kɛ̀ bɛdɑkótíbɛ̀ɛ ítɛ́ bɛ kɑ̀rɛ̀ kɛ́cómmú.

⁹Kɛ̀ bɛhɛikɛ̀nkótíbɛ̀ kṹnnɛ́ bɛ̀ do nɑ́ɑ́ ntì kɛ́pi bɛ nɔ̀.

¹⁰Kɛ̀ bɛkpɑ̀ɑ̀tìbɛ̀ kó mɛtɑmmɛ̀ dɔ̀o yúóó, kɛ̀ bɛ nɔ́ndiɛ́ ndɑri.

¹¹Bɛ̀ɛ̀ kèḿmú n nɑ́ɑǹtì bɛ̀ do ɔ̃ nni nsɑ̃ntímu, bɛ̀ɛ̀ n yɑ̀u kɛ̀ bɛ̀ nɑ̀ɑ́ n yetìsɑ̀ɑ̀rì.

¹²Osénnìwè do ɔ̃ nkòo kuɔ́nkoo nhò dɛɛtɛ́mu, dɛciribirɛ dɛ̀ɛ̀ í mɔkɛ oteèntì kɛ̀ n dɛ̀ teennɛ̀.

¹³Bɛ̀ɛ̀ do ɔ̃ nyóó kú bɛ̀ do ɔ̃ m pɑ̃mu mɛsɑ̀ɑ̀, n do nɑ́ríkùnkomu bɛkúpobɛ̀ yɛ̀mmɛ̀.

¹⁴N do dɑ́ɑ́tí mɛwetímmɛ̀ mmɛ diyɑɑ̀bòrì kɔ̃mɛ, kɛ dɑ́ɑ́tí mɛdɔɔ̀rìmɛ̀ sɑ̀ɑ̀mɛ̀ tiyɑ̀ɑ̀tì kɔ̃mɛ, kɛ̀ mɛɛ̀ tu kuyɑɑ̀bomboúnkù m bou kù n yuu.

¹⁵Míì do ɔ̃ ntú tiyũ̀ɔ̃̀ntì kó inuɔ, kɛ tú tihɔ̀ùtì kó itɑ̀ɑ̀kɛ.

¹⁶Kɛ tú bɛsénnìbɛ̀ kóo cicɛ. Kòo pɔ̀ɔ̀ mɔ̀kɛ tìmɑtì n ti wèńní tì dò nkɛ́ndòmmɛ̀.

¹⁷Míì do ɔ̃ɔ̃ kéétɛ́ bɛyɛibɛ kó muyɛ̀ì, kɛ́fietɛ ò pĩ ndɛ̀ kɛ ɑɑkɛ́.

¹⁸N do tú n yóó kú n cĩ́ɛ̃̀tɛ̀ ntɛ, kɛ́ nyóó kú kɛ̀ n we sũ̀ṹ mmubirímú dòmmɛ̀.

¹⁹N cĩ̀ɛ̃ n do tɑ kɛ́tuɔkɛ mɛniɛ mmɛ, kɛ̀ n fɑ̃ɑ̃̀tì níí mɑntɛ̀ kɛyènkɛ̀.

²⁰Bɛ̀ do ɔ̃ nni nsɑ̃ntímu sɑ̃́ɑ̃̀, N wɛ̃rímú do í deu.

²¹N do ɔ̃ nkɛ̀ n nɑ̀ɑ́ mbɛ̀ nkémmúmu n tú mù, kɛ̀ n yóó bɛ́i, bɛ̀ dɔ̀o yúóó nwe, kɛ́nkémmú n tú mù.

²²N do ɔ̃ nkɛ̀ m bɛ́i nhòmɔù bɑ́ n tɛ̃́nnɛ́, Kɛ̀ n nɑ́ɑǹtì mbɛ̀ tɑɑ̀.

²³Bɛ̀ do ɔ̃ɔ̃ nni mbɑɑ ti bɑɑmɛ̀ mmɛ fɛtɑɑfɛ̀, bɛ̀ ɔ̃ mbɑɑ mɛ̀ɛ̀ botí fɛtɑketifɛ̀.

²⁴Bɛ̀ do ɔ̃ɔ̃ yɑ̀ n wɛ̀ì kɛ̀ dɛ̀ɛ bɛ̀ dimu, bɛ̀ mɛ nyí nnɑ kɛ bo sɔukùnnɛ n yììkɛ̀.

²⁵Míì do ɔ̃ɔ̃ tɑ̃ɑ̃tɛ́ kɛ́ bɛ̀ nɛinɛ̀, kɛ́ míì mbɑkɛ́, kɛ́ mbo bɛ tĩ̀nnì miɛkɛ kɛ tú bɛ kóo kpɑ̀ɑ̀tì, kɛ bɑ́ɑ́ mbɛ̀ɛ̀ yɛ̀mmɛ̀ cɑ̀ɑ̀rɛ̀.