ISƆBU 38

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Kɛ̀ ti Yiɛ̀ nKuyie nyúní Isɔbu kuyɑɑkperíkù miɛkɛ kóò bekɛ kɛ dɔ̀:

²Wenninwe dɛ yiɛ̀ nwèè dɔ́ kɛ́dinnɛ n yɛ̀mmɛ̀, nɛ̀ tinɑ́ɑǹtì dɛtetìrɛ̀ kpɛti?

³Pĩ́ nhɑmɑ́ɑ̀ onitidɔ̀ù fɔ̃́, n yóó dɑ bekɛ tinɑ́ɑǹtì nti kɑ̀ɑ tì nni ntɛ̃́nnɛ́.

⁴Mí nKuyie n do yóó píítɛ́ kɛtenkɛ̀ kɑ̀ɑ borɛ? Kɑ̀ɑ ciì nkɛ̀ tùɔ̀kɛ kɑ̀ɑ yɛ̃́ ɑ bɛ́i.

⁵We ndò kɛ bennɛ́, ɑ ò yɛ̃́ɑ̀? We ndo dɔú nkuhɔ̃ũ kɛ́ kɛ̀ bennɛ́?

⁶Yɛsɑ̃ǹkɛ̀ yɛ̀ɛ̀ kɛ̀ cùɔ́ yɛ̀ còḿmú bɑ nyĩ́nkɛ̀? We ndɔú nkɛ pũũ kó ditɑ̃́rì ketirì?

⁷Sikṹnwentɛ́wɑ̃̀ɑ̃ do diè ndìì mɔ̀nnì ditĩ̀nnì, diwɛ̀ì do bo dìì mɔ̀nnì Kuyie ntɔ̃rɛ̀ kɛ̀ yɛ̀ ìú.

⁸We nkpetínnɛ́ dɑ̀mɛ́ɛ̀rì kó yɛcɑ̀kɛ̀? O niɛ ndo puùní dìì mɔ̀nnì dɛ miɛkɛní nɛ̀ muwɛ̃rímú?

⁹N yóó dɑ́tínnɛ́ dìì mɔ̀nnì dɑ̀mɛ́ɛ̀rì tiwɛtì tiyɑ̀ɑ̀tì kɔ̃mɛ, kɛ̀ yɛwɛtɛ̀ ntú o kó tɛyɑɑ̀bòtɛ̀.

¹⁰N yóó cónnɛ́ dìì mɔ̀nnì dɑ̀mɛ́ɛ̀rì kɛ bo ò kèétɛ́ kumɑ̀nku, kɛ́kpetínnɛ́ dicɑ̀ù kɛ́pɑ́ɑ́.

¹¹Kóò nɑ̀kɛ́ kɛ̀ ǹ dɔ̀: A n keriní kɛ kɑ̃ɑ̃ku diɛ nhɑ bɑ́ɑ́ séntɛ́. A níí yó nkɑ̃́ɑ̃́kɛ́ diɛ ǹdɛ kɑ̀ɑ nɛ́fĩ̀nfĩ̀rɛ̀ wɛ̃rímúu deè.

¹²Nɛ̀ ɑ bomɛ̀ ɑ mu nnɑ̀kɛ́ dikṹnweńnì kɛ tú: Wentɑ́ɑ̀? Yɑ́ɑ̀ ɑ bennɛ́ diyiè dì bo yɛ̀nní dìì bòrì?

¹³Fɔ̃́ɔ̃̀ ɔ̃ɔ̃ duɔ́ nkɛ̀ dɛ̀ɛ wenkɛní kutemmɑ̀nku kɛ kpɛ́ɛ́tɛ́ bɛyɛibɛ bɛ sɔ̀rɑ̀ɑ̀?

¹⁴Fɔ̃́ɔ̃̀ ɔ̃ nte kɛ̀ kɛtenkɛ̀ wũɔ̃kùu feitɛ́ kɛ́ceetɛ mɛɔ̃̀rìmɛ̀ tibɑnyɑ̀ɑ̀tì kɔ̃mɑɑ̀?

¹⁵Kɛ̀ bɛyɛibɛɛ pɑɑ̀ bɛ kó kuwenniku kubɑkù kùù do yuo kɛ̀ kùu kèétɑ́ɑ̀?

¹⁶A tɑ dɑ̀mɛ́ɛ̀rì kɛ tùɔ̀kɛ o fũ̀ɔ̃̀ dɛ miɛkɛ kɛ cè nkɛ tɑ dɑ̀mɛ́ɛ̀rì bintuotɑ̀ɑ̀?

¹⁷Bɛ̀ mu ndɑ bɛnkɛ mukṹṹ nhɛì kó yɛbòrɑ̀ɑ̀? A mu nyɑ̀ kudɔnkù kó yɛcɑ̀kɑ̀ɑ̀?

¹⁸A nɑ kɛ yɛ̃́ kutenkù duɔ́ kɛ mɑmɑ̀ɑ̀? Kɑ̀ɑ dɛ yɛ̃́ ɑ n nɑ́kɛ́ kɛ̀ n yɑ̀.

¹⁹Ɔ̃nkucɛ kɔrìnɛ̀ kuwenniku ɛì? Dibiìnnì ciɛ kó kucɛ borɛ?

²⁰Kɛ̀ bɛ̀ tu ɑ dɛ̀ yùní ɑ bo yɑ̀ dɛ cĩ́ɛ̃̀tɑ̀ɑ̀? A bo bɑntɛ́ dɛ ɛì kó kucɛɑ̀?

²¹A dò nkɛ́ ndɛ̀ yɛ̃́mu, kɛ yɛ̃́ ɑ do bomɛ̀mu dɛ mɔ̀nnì, kɑ̀ɑ we sũ̀ṹ nkɛ í dò nkɛ́kɑɑ nkɛ́deè.

²²A tùɔ̀kɛ mupɑ̃̀ɑ̃ mboomu kó dihɛìɑ̀? A yɑ̀ fɛtɑɑfɛ̀ mɑ́tɑ̃́rɛ̀ kó dikɑ̀rì yɛ̀ borɑ̀ɑ̀?

²³A yɛ̃́ n dɛ̀ dɔ̀ɔ̀ kɛ dɔu ndɛ̀ mɛyɛi nkó diyiè kpɛ́ínɑ́ɑ̀? N dɛ̀ dɔú ndɛ̀ mudoò nɛ̀ yɛkpɑ̀rɛ̀ dɛ kpɛ́ínɑ́ɑ̀?

²⁴A yɛ̃́ kuwenniku ɔ̃ɔ̃ yɛ̀nní dɛ̀ kɛ́pitɛ́ kutenkɑ̀ɑ̀? Diyiè yìɛ̀ní kɛ̀ɛ̀ bíɛ́kɛ̀, kuyɑɑkù iitiní dɛ̀ kɛ fuu kutenkɑ̀ɑ̀?

²⁵We nkpetɛ́ fɛtɑɑfɛ̀ yɛnɛ́bòrɛ̀? Kɛ̀ we nhɑ̃nnɛ́ kucɛ fɛtɑpíɛ̀fɛ̀ tũ nkù?

²⁶We nhɔ̃ɔ̃ duɔ́ nkɛ̀ fɛ̀ɛ̀ ni kɛtenkɛ̀ òmɔù í bo kɛ̀? We nhɔ̃ nte kɛ̀ fɛ̀ɛ̀ ni fɛkpɑ́fɛ̀ òmɔù í ɑ̃ dɛ̀?

²⁷We nhɔ̃ɔ̃ yĩ́ fɛ̀ɛ cṹũnní mɛniɛ dikpɑ́ɑ̀, tɛdɔntɛ̀ dɑ̀mɛ́ɛ̀rì í borɛ̀ kɛ́nte kɛ̀ timusũ̀ũ̀tì yɛ̀nní?

²⁸Fɛtɑɑfɛ̀ mɔ̀kɛ fɛ cìcɑɑ̀? We nnɛ́ pɛí timɑɑ̀ntì?

²⁹We mpùó nkɛ pɛitɛ́ fɛtɑɑfɛ̀ mɑ́tɑ̃́rɛ̀? Mupɑ̃ɑ̃ nkóò yɔ̃ tú we?

³⁰Muséé nhɔ̃ɔ̃ pĩ́ mmɛniɛ nkɛ̀ mɛ̀ɛ̀ kpenkɛmu kɛ nɑɑ́ nditɑ̃́rì, kɛ̀ mɛniɛ nyĩ́nkɛ̀ɛ nɑɑ́ nkupèrìkù.

³¹Siwɑ̃̀ɑ̃ kó tɛnúntɛ̀ sì nùú ntɛ̀ tu ɔ̃̀ntɛ? A bo nɑ kɛ́pítɛ́ kuhɔ̃ũ kùù sì pìítɑ́ɑ̀?

³²Fɔ̃́ɔ̃̀ ɔ̃ɔ̃ dennɛní kutennɑkú tiwɛtɑ̀ɑ̀? Fɔ̃́ɔ̃̀ dènnɛní mukorimu nɛ̀ mudɑ̀kɑ̀ɑ̀?

³³A yɛ̃́ ikuɔ́ ìì bo kɛĩ́nkɑ̀ɑ̀? Fɔ̃́ɔ̃̀ te kɛ̀ ì pĩ nyi tɔ̃mmú kɛtenkɑ̀ɑ̀?

³⁴Kɑ̀ɑ bɛ́i ɑ tɑmmɛ̀ɛ tuɔkɛ tiwɛtì, kɛ̀ mɛniɛ ncútɛ́ní kɛ dɑ dɑ́tínnɑ́ɑ̀?

³⁵Kɑ̀ɑ pɛ́i fɛtɑpíɛ̀fɛ̀ fɛ̀ɛ keɑ̀? Kɑ̀ɑ fɛ̀ yu fɛ̀ɛ yie nkɛ dɔ̀ ntɛ mínɑ́ɑ̀?

³⁶We nhɔ̃ɔ̃ nɑ́kɛ́ kucɑ́duonku kukó ntɑmɛ̀ mɛniɛ? We nhɔ̃ɔ̃ nɑ́kɛ́ kukodɑɑkù dɛ̀ wentɛ́mɛ̀?

³⁷We mbo nɑ nɛ̀ o kó mɛciì nkɛ́kɑɑ nyɛwɛtɛ̀? We mbo nɑ kɛ́bíinní kɛĩ́nkɛ̀ kó sicèe?

³⁸Kutɑ̃ɑ̃yukú ɔ̃ɔ̃ yĩ́mɛ kɛ́wɛ̃tɛ kɛ́nɑɑ́ nkɛtenkɛ̀? Yɛdombiɛ nhɔ̃ɔ̃ yĩ́mɛ kɛ́wɛ̃tɛ kɛ́tɑu?

³⁹Fɔ̃́ɔ̃̀ ɔ̃ɔ̃ duɔ́ nkucìrícìrìyɔ̃kù kù bo dimɑ̀ɑ̀? Fɔ̃́ɔ̃̀ piú icìrícìrìbíɑ̀?

⁴⁰Ì ɔ̃ nkpɑɑ́ okɛ dìì mɔ̀nnì titɑ̃dèntì, ì kpɑɑ́ sɔri dìì mɔ̀nnì yɛfɑ̃piè miɛkɛ.

⁴¹We nhɔ̃ɔ̃ wɑɑ́ ndikɑ̃kɑ̃bii mudiì? Di bí ɔ̃ n kuɔ̀nnɛ̀ dìì mɔ̀nnì mí nKuyie kɛ ɑ̃́ɑ̃́ nkɛ mɔ̀ńtɛ́ mudiì?