1Zobi, titioko ko? Ba esei na kote olaṉa igo. Na mateana savana kote boka toka nigo?
2Tinaṉaziri si mate nia rina tie duvili, meke sa binugoro si ṉoṉovali sari na tie va gugue.
3Ele dogoria rau sa tie duviduvili sapu doṉo guana loke nana tinasuna, ba hinoqa ta levei sa nana vetu.
4Sari tuna si lopu boka ta harupu, sina loke tie hiva lavelave ni pa vinaripitui.
5Sari na tie ovia kote hena betoi sari na linetelete tanisa tie duvili, koari na hilibubuku ba kote vagi luli rini, meke sa tie memehana ba kote hata luli sari nana tinagotago.
6Na kinaleana si lopu mae guana pa kavuru, meke na tinasuna ba lopu toqolo vurana pa pepeso.
7Ba na tie si podo pude kamo ia tugo tinasuna, gua sa pidalana sa nika sapu kaqu tapuru sage.
8Be arau, ba kote tepa sisigiti si arau koa sa Tamasa, meke kote vala nia rau sa qua hiniva koa Sa.
9Asa hoke taveti sari na tinavete nomadi sapu lopu boka ta balabala kamo, sari na tinavete variva magasa sapu lopu boka ta nae.
10Ponia ruku Sa sa pepeso meke poni kolo sari na inuma.
11Sarini pu va pepekae si ovulu sage ni Tamasa meke saripu kuliusu si va qetui Sa.
12Huari Sa sari hiniva tadi na tie sekesekeidi, pude lopu gorevura sari dia tinavete.
13Poho i Sa sari na sinekesekei tadi na tie pu vahesi puleni sapu gilagilanadi, meke va kokoi i Sa sari dia hiniva tomedi.
14Kamo i na hinuporo pana rane, meke korapa rane si ene tapotapoe si arini guana boṉi tu.
15Ba harupi Tamasa saripu habahuala koari na dia zinamazama variva mate; harupi Sa pa limadi rina tie nomadi.
16Ke saripu malaṉa si aqa nia sa Tamasa pude tokani, meke va noso i Sa sari na tie kaleadi pu hiva ṉoṉovali.
17Tamanae sa tie pu va toṉotia Tamasa! Gua asa ke mu lopu kilu ia sa ginegese tanisa Tamasa pu tagoi sari doduru ṉiniraṉira.
18Va bakora igo Sa, ba Asa tugo kote pusia, va sigitigo Sa, ba sa Limana tugo Sa kote salaṉigo.
19Ninae totoso si kaqu harupigo Sa si goi pa tinasigiti na tinasuna.
20Pana raza sa soṉe, si kaqu kopu nia Sa sa mua tinoa, meke pa vinaripera si kaqu lavelave nigo Sa pude lopu ta seke pa vedara.
21Tamasa kote lavelave nigo koari na zinamazama variva sigitidi; meke lopu kaqu matagutu si goi pana kamo sa tinahuara.
22Kote hegere ni goi sari tinahuara na soṉe meke lopu kote matagutu ni goi sari na kurukuru variva mate.
23Sa vasina tavete nia inuma goi si kote loke patuna, meke lopu kaqu raza igo ri kurukuru pinomo.
24Kaqu koa va bulei pa mua ipi si agoi; pana nae i goi sari mua sipi, si kote koa beto dia mo.
25Kote gilania tugo goi sapu kote soku sari mua koburu, saripu podoi goi si kote guana dudulina sa popoa.
26Kote barogoso va gorevura si goi meke kamo la pa lovu, guana huiti sapu sagana pa totoso pakepakete.
27Zobi, gami si ele vilitia meke va hinokaria si hie, ke mu avosi, mamu lopu kilui sari zinama hire.”
