1Job, mu pong ngam guy ko ra fulweg be’ lungum fa. Gur bay reb e engel nrayag ni ngam non ngak nge ayuwegnem?
2Gab balyang ni fa’anra li’em anum’ i leamnag e tin ke kirebnag be’ u wun’um.
3Kug guy e pi’in balyang ni yad be par ni gowa dabi buch ban’en rorad, ma kug yiblayrad ni nge buch ban’en nib tomgin u tabnaw rorad.
4Pifakrad e dabiyag ni nge dabi buch ban’en rorad; dariy be’ nra ayuwegrad u tafen e puf oloboch.
5Pi’in karm’ad ko bilig e bay ra ked wom’ngin e woldug rok e en ni balyang, ni mus ko grain ni be tugul u fithik’ e rachangal, ma pi’in ke yib e belel ngorad e bayi awan’rad ko fla’ab rok.
6Kireb e der tugul u fithik’ e but’, ma ku er i tay e oloboch nder for u fithik’ e but’ nge tugul.
7Gathi aray rogon! Girdi’ e ir e ma girengiy e gafgow nga daken, ni bod rogon k’affin e nifiy ni thay ngalang u ba nifiy.
8Fa’an mang e gag gur, ma kug weliy salpeg ngak Got.
9Dabiyag ni ngad nanged fan e pi gagiyeg rok, nge pi maang’ang ni yug be ngongliy ni der tal.
10Be pi’ e n’uw nge aw nga daken e binaw nge tarannag e but’.
11Got e ma tolangnag e pi’in nib sobut’an’rad, me ir e ma pi’ e felfelan’ ngak e pi’in yad be yor.
12Ma wageynag e makath rok e pi’in yad ma ban, mma thabeynag e pi’in gonop ngar awgad ko liyab rorad, nge yan i par ndariy ban’en ni yad ra rin’ nra fel’ rogon;
14ni yu gu ra lukngun misiw’ ma yad be chaman u fithik’ e lumor.
15Machane Got e ma chuweg e pi gafgow u pa’ e yam’; mma ayuweg e pi’in ni yibe gafgow nagrad.
16Ma pi’ e lagan’ ngak e pi’in gafgow mma gagiyegnag e pi’in kireb ngar th’abed gulungrad.
17Ba felan’ e en ni Got e be fonownag! Ra puwan’ ngom ma dab mu dabuy.
18Got e ma m’ag e mad ko gin ni ir e ke maad’ad ngay; pa’ e ma amith nigey ngay, ma ku pa’ e ma gol nigey ngay.
19Gubin yay ni ir e ma ayuwegnem ni dabi buch ban’en rom;
20ra yib e uyongol me tem ndab mum’, mra yib e mael me yoror rom nge dab mum’.
21Got e ra laegem u fithik’ e tin nde riyul’ ni murung’agem ni yibe weliy nge thin ni yibe t’ar nga dakenam; ma ir e ra aywegem ko riya’ nra yib.
22Ra yib e cham nge uyongol ma ga ra minmin ngay, ma dab mu rus ko gamanman ni malboch.
23Yungi flang ni ga ra gi’ ni fan ko woldug e dariy e malang u fithik’; ma pi gamanman ni malboch e yad ba mangmor ngom.
24Ma aram e bay u mu par u fithik’ e gapas u lan e tent rom; ra mman mu guy e pi saf rom ma ga ra pir’eg ndawori buch ban’en rorad.
25Ma ra yo’or pifakam ni bod feni yo’or e pan ni bay ko gin be kay e gamanman e pan riy.
26Rogon e wheat nma par nge yan i el ko ngiyal’ ni ngan t’ar riy, e aram rogom ni bay mpar ngari mpilibthir.
27Job, kug nanged e pin’ey ko pin’en ke n’uw nap’an ni kug filed. Rib riyul’, ere rib fel’ ni nge riyul’ u wun’um e chiney.
