1Ǹ lɛ́ zú sà ǹ ma tó gbɛ̃ke ni wemma. Malaika kpaten ĩni arɛ dↄaa?
2Íbɛtɛsɛnaa dì yↄ̃nkↄ dɛ, nɛ̀sɛgↄ̃baa dì mìsaride kakatɛ.
3Ma è yↄ̃nkↄ zĩni pɛ̀tɛ, akũ zĩni pìi yↄ̀ kãnto.
4A nɛ́nↄ zã̀ kũ aafia kĩnaao, òdi ń yãnↄ mátɛmatɛńnɛ yãkpatɛkɛkia, gbɛ̃ke dì zɛ kũńworo.
5Nàdɛrinↄ dì a burapↄnↄ ble, bee pↄ́ kũ à lɛ̀ɛ lìkainↄ, ímidɛrinↄ dì luka a aruzɛkɛi.
6Kisira dì futɛ bùsunlo, wari dì butɛ zĩtɛro.
7Lákũ tɛ́pũtãna gɛna musu sika vĩro nà, lɛn gbɛ̃ kũ ò ì pínki dì wari le lɛ.
8Tó makũmɛ sↄ̃, Ludan mani gbɛka, mani ma yã kpátɛ a arɛ.
9Àdi yã zↄ̃kↄ̃ kɛ kũ oni fↄ̃ ò a gbá dↄ̃ro, oni fↄ̃ ò a yãbonsarɛkɛnanↄ lɛ́ dↄ̃ro.
10Àdi tó legũ ma zĩtɛ, àdi tó a í dagula sɛ̃̀ntɛ.
11Àdi gbɛ̃ busananↄ sɛ́ lei, àdi wɛ̃ndadenↄ da pↄnnan.
12Àdi yã kũ manafikidenↄ tɛn pɛ́a gboro, de ń ↄzĩ súngↄ̃ arubarika vĩro yãi.
13Àdi ↄ̃ndↄ̃rinↄ kũ ń wɛ́zɛ̃ gũn, àdi tó yãlɛkpɛrɛ'orinↄ yãgↄ̃gↄ̃na kɛ pã.
14Gu dì sira kũḿma fãnantɛ̃, òdi ↄ mátɛmatɛ fãnantɛ̃ lán gwãani bà.
15Àdi takasidenↄ bo ga lɛ́i, àdi pↄ́saridenↄ bo gbãnamↄnnɛrinↄ ↄĩ.
16A yã mɛ́ à tò gbãnasaridenↄn tãmaa vĩ, yãzɛdesaridenↄ dì yĩtɛ kyáu.
17Arubarikaden gbɛ̃ kũ Luda dì a toto ũ. Tó àtɛni n sã gaga, ǹsun yãvunu káro.
18Zaakũ àdi gbɛ̃ kĩnna akũ àdi a bↄ̀ gwa, àdi gbɛ̃ wíwi akũ àdi a werekↄ̃a.
19Ani n bo yãn gɛ̃̀n suddo, bee tó à kà gɛ̃̀n suppla, kisira ni n lero.
20Ani n sí gaa nàgↄrↄ, ani n bo fɛ̃nɛda lɛ́i zĩ̀lan.
21Dikiri ni n bo gbɛ̃yakarinↄ ↄĩ, tó yakanaa sù, vĩna ni n kũro.
22Ĩni yakana kũ nàao yáa dↄ, ĩni vĩna kɛ nↄ̀bↄ pãsĩnↄnɛro.
23Zaakũ ĩnigↄ̃ kun aafia kũ gbɛ̀nↄ, ĩnigↄ̃ nna kũ nↄ̀bↄsɛ̃ntɛnↄ,
24ĩnigↄ̃ dↄ̃ kũ n ↄn nigↄ̃ nna, tó n gɛ n kpàsan, pↄ́ke ni kĩaro.
25Ĩnigↄ̃ dↄ̃ kũ n nɛ́nↄ ni kɛ dasi, n burinↄ ni dagula lán sɛ̃̀ɛ bà.
26Ĩni zĩ kũ yúkuyuku gbasa ǹ ga lán ése kũ à mà ò kɛ̃̀ a gↄrↄaa bà.
27Kũ o yã pìi asiri gbɛ̀ka, lɛn à de lɛ. Ǹ yã pì sí ńgↄ̃ dↄ̃ kũ n zĩda yãmɛ.
