Hiobe 5

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹“Ajoc, Hiobe, go wira owa ec! Eme moczi moc okacne bâtikie‐gareocmu me mâcne i honezemec. Go aŋelo e me e wira wâwâsic sâcne ecnecmu me?

²Ŋic mutucne e kimbeŋ aaric‐ticnezi sipirickeekac, â mamana tara‐ticne tâmiric e maŋʒoc‐ticnezi qâhâmoekac.

³No ŋic mutucne moc e eebapa‐ticnezi gâtâne bame honehape izia fic hae‐ticne ʒaŋkerâ sesuctac fuarâ fowec.

⁴Naru motecfâcne jaŋe juju hâmo basaeŋgopieŋ, ehame dâŋgieo moczi moc dâŋjeŋic mi dopeckeekac.

⁵Gie‐ticnao nânâ fârine fuame nânâre hâmoeŋgopieŋ ŋic i jaŋe fisirâ ro nâc eniŋmu, ehuc fâpâ ʒârâ âke ropierâ roniŋmu wâc.

⁶Manakic, wiac hehesicnezi giegaŋko mi fuaekac, â sisipiriczi mâreŋ maŋkonec wâc mi wefuekac, erâ mafare andac eeŋgopieŋ ŋic i jaŋe moneŋ mafa wiac‐ticne roniŋte ʒoɋac eniŋmu.

⁷Ʒoc uucnezi iiŋnerâ sawao feekac iŋuc jaha ŋiczi sisipiric bâfuaocte maŋne domaekac.

⁸“Manakic, no go muzac ine Anuturao rarâ fuŋne‐nane mufuacnezapo.

⁹Eki hâcne wiac qeŋ bipinehec baekac i ŋiczi mi mana taraeŋgopeneŋ, e mâsi sâko wowosene tâmiric bahuc juekac hâcne.

¹⁰Eki mume mâreŋko hoe heekac, erâ ekizia wâc mume opâzi giegaŋ‐nâŋec bâgunuckeekac.

¹¹Eki waha qaqane jueŋgopieŋ jaŋe bafaharec‐jopaekac, erâ busâqochec jueŋgopieŋ jaŋe bubiaŋ qajareekac.

¹²Eeatuc ŋic jaŋere dâŋ hetâtieme gie bapie fârimâc eekac.

¹³E maŋfânâŋhec jaŋere eeatuc dâŋ bârisieme bitiŋ erâ kicjopaekac, ehame mamana biri‐jeŋic biac omaekac.

¹⁴Jaŋe ʒoaŋ ɋaɋacko sifu dapâcko tinac jueŋgopieŋ, â guŋpiticko sifu ŋafeo tinac basac qasac raeŋgopieŋ.

¹⁵Anutu eki ine bekâ mâsiŋ jaŋe ŋic sindaŋne jaŋere ʒikare micko fenʒipiŋte ŋezic‐jopaekac, â qarâ suriŋne jaŋe tâpirihec jaŋere meonec batarac‐jopaekac.

¹⁶E iŋuc ehuc ro waha âte ejarekicne jaŋerao jujure mamanac bâfuaekac, â ŋic sindaŋne jaŋere mic bâbâzickeekac.

¹⁷“Anutu e ŋic moctao bâbâtiŋ gie bame ŋic ere manape ʒerine eocmu, irec go qa bâtiŋ egareme manatec mi sâqorezejec.

¹⁸Anutu e ʒâpâ nâpoekaczi mocwâc ʒure foŋ enâreekac wâc, â meticnezi bâʒâic‐nâporâ mocwâc bâmâteŋ‐nâpoekac.

¹⁹E dameŋ sâc sisipirickonec bataracguocmu.

²⁰Roroc fuame hâmozicte hone maiŋ egarehuc ʒika dameŋko dede sâsâoc egareocmu wâc.

²¹Anutu e kisâfâcge jaŋere ʒikadâŋte sabecguocmu, erâ sisipiricte ŋezicgume mi hâwicguocmu.

²²Bâbâʒâic me roroc fua‐gareme manatec mi quŋkezejec, â qowi mimicne jaŋere wâc mi hâwicguzejec.

²³Mâreŋ qânâ tâmiricko gie he sarac ecmu, ehame qowi mimicne jaŋe âgo egareniŋmu.

²⁴Iŋuc fuame ficbozegao juhâc qâhâmocmu, ehuc lamafâcge furu jaha juhapie hone soŋaŋ ejarecmu.

²⁵Ɋâricfâcge jaŋe bocjaha fua raniŋmu, â apa ŋosafâcge jaŋe sopâc kecɋaŋ iŋucne sawe mâririackeniŋmu.

²⁶Padizi dameŋ ʒora gieo domaku woze qeuc eme qa roro eeŋgopieŋ, eme go irec sâc jaha dameŋ ʒora juhâc qâhâmohuc ŋicqizec jâmbâŋ erâ hâmozemec.

²⁷Manakic, wiac fua‐nâreme hone manac eeŋgopeneŋ irec fuŋne mana taranaŋte dameŋ ʒora mamana gie bawefuhuc jumbeŋ. Irec dâŋ muwarepac i fârine jâmbâŋ, go mana maŋ ehuc mana biaŋkezemec.”