Iob 5

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Ona una oraoro, to ia bar na torom ta ra nilaim? Ma nuve vang ta ra umana angelo una matoto tana?

²A kulot i vakaina ra papaua na tutana, Ma ra varpin i doko nina i tuptup.

³Iau ga gire ra tuptup na tutana i ga okor, Ma iau ga tata vakaina lulut ra kubana.

⁴A umana natuna dia ki na malari, Di ki taun diat ta ra mataniolo, Ma pa ta na i ki pi na maravut diat.

⁵Diat dia mulmulum dia en vue kana umauma, Dia tak vue nam ba i tavua livuan ta ra umana kait bula, Ma diat dia mar dia anan upi kana tabarikik.

⁶Tago ra varmonong pa i vana rikai ta ra tobon, Ma ra purpuruan pa i gol rikai ta ra pia;

⁷Da ra pitil na iap i pitil tutua, Damana di kava ra tarai upi ra kini na malari.

⁸Ma iau, gala ina lingan tadav God, Ma ina nur tar kaugu kini tai God;

⁹Tago i papait ra umana ngala na magit nina pa da kapa tana, Ma ra umana magit na kinaian nina dia peal mat;

¹⁰I tul tar ra bata ure ra gunagunan, Ma ra tava i alir tavit ta ra umauma;

¹¹I vangala ra umana luveana, Ma i tul tar ra varvalaun ta diat dia tabun.

¹²I tur bat ra umana tena vakikiu, Kari ra lima i diat pa i pait valar pa ta magit.

¹³I kinim vake ra umana tena kabinana ta kadia vavagu iat, Ma i vapar vue ra nuknuk i nina i gegagege ra maukuana.

¹⁴Dia vartadav ma ra bobotoi ba i keake ka boko, Dia pa tupatupa ba ra keake i ki tur, dari ta ra marum.

¹⁵I valaun pa ra umana biluana kan kadia pakat na vinarubu, Ma ra umana biaui kan ra lima i ra umana rangrang na luluai.

¹⁶Damana ra umana luveana dia nuknuk ung, Ma di paum bat ra ngie i ra lavur kaina magit.

¹⁷Ea, nina ba God i vapagumanena i ti doan; Damana koko una pidimuane ra varpit kai ra Dekdek Muka.

¹⁸Tago nina ba i tar kita vadala, i pulu ia bula; Ma nina ba i tar ubu vakinkin ia, a limana i valaun pa ia.

¹⁹Laptikai na pakana i valaun u kan ra kini na malari, Maia, lavurua na pakana ra kaina pa na tadav u.

²⁰Ta ra e na mulmulum na valaun pa u kan ra minat, Ma ta ra e na vinarubu kan ra pakat na vinarubu.

²¹Una ki bakit kan ra tinata kakaina, Ma pa una burut ba ra bung na vinirua i vut.

²²Una nongone ra vinirua ma ra niiba, Ma pa una burutue ra lavur leing ta ra gunagunan.

²³Avat a bartalaina ma ra umana vat ta ra uma, Ma avat a ki na varmaram ma ra lavur leing ta ra pupui.

²⁴Una nunure ba ra kubam i tur langalanga, Ma ba una vana tadav kaum kikil na sip, pa ta magit na rara tana.

²⁵A umana natum diat a peal, Ma ra umana bul mur tam diat a da ra mapmapina vura.

²⁶Una tadav ra babang na minat ba i lolokon kaum kilala na nilaun Da ra vinvin vit ta ra e na nidodoko.

²⁷Go parika ave tar tikan tadav ia, ma i dovot; Una valongore, ma una kodop vake ta ra balam.