Job 5

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Wal Elifas bin kipgon tok, “Job, yu jingat langa sambodi hu gin album yu. Maitbi sambala einjul garra kaman.

²Job, yu nomo sabi enijing. Maitbi if yu jidan wailwan o jelaswan, tharran na garra kilim yu ded.

³Aibin luk sambala pipul hu nomo bin sabi enijing. Deibin gedim ola ebrijing blanga lilwail, bat God bin jandim nogudwan ting en binijimap olabat, jis laik det tri wen sambodi pulumat im garram im rut.

⁴En wen im hepin lagijat, olabat biginini nomo garram enibodi blanga album olabat langa det kothaus.

⁵Afta tharran, gridibala en hanggribala pipul kaman en binijimap ola sid daga blanga olabat, en stilimbat ola ebrijing.

⁶Bat ola nogud trabul nomo jis kamat brom graun.

⁷Wen pipul bon, trabul garra kaman langa olabat. Im jis laik det spak weya kamat brom det bush faiya en gowap langa skai.

⁸Job, if ai bina yu, ai bina askim God blanga album mi.

⁹Im gin dum detmatj brabli klebabala ting.

¹⁰God oldei jandim rein blanga wodarimbat ola fam.

¹¹Im oldei maindimbat detlot hu jidan lobala, en im album detlot hu oldei jidan soribala.

¹²God oldei stapam detlot plen blanga detlot nogudbala pipul hu oldei dumbat nogudbala ting.

¹⁴Olabat jis laik detlot blainwan pipul hu kaan luk gudwei langa deitaim.

¹⁵God oldei lukaftumbat ola po pipul brom ol detlot hu oldei faitfait en ardimbat olabat.

¹⁶Detlot powan pipul oldei kipgon trastimbat langa God en olabat oldei abumbat feyago.”

¹⁷Wal Elifas bin kipgon tok, “Job yu garra jidan gudbinjiwei. Nomeda God det brabli haibalawan bin panishim yu, bat stil yu garra jidan hepiwan. Im mait meigim yu abumbat pein en ardimbat detmatj, bat im garra bendijimap en meigim yu sowa gudwan.

¹⁹God garra maindimbat yu brom deinja nomeda haumatj trabul garra kaman.

²⁰Langa det taim wen im wo taim en wen olabat nomo garram eni daga, God garra kipgon maindimbat yu.

²¹Yu garra jidan seifwan en yu kaan bradin, nomeda olabat tok nogudbala wed en trai blanga ardimbat yu.

²²Yu garra laflafbat wen yu irrimbat ola nogudbala ting garra hepin, en wen dei tok yu nomo garram eni daga. En yu kaan bradin blanga eni wailwan enimul.

²³Olabat garra jidan kwaitwan en ol detlot stoniwan pedik garra jidan gudwan.

²⁴Blanga yu haus garra jidan seifwan, en blanga yu shipmob garra jidan seifwan du.

²⁵Yu garra abum bigismob biginini, mowa den detlot gras langa dijan graun.

²⁶Yu garra jidan laibala longtaim en blanga yu bodi garra jidan strongbala raidap yu garra dai.

²⁷Melabat bin jinggabat dijan longtaim en melabat sabi ebrijing garra kaman trubala. Wal yu irrim en len mowa, wulijim yu garra sabi brabliwei.” Lagijat na Elifas bin tok.