1Ele hakohako nia rau sa qua tinoa, ke veko au maqu nominomi la qua mo, kaqu tozi vura ni arau sari qua tina sigiti pa maqomaqoqu.
2Kote tozi nia rau sa Tamasa: Mu lopu veko lani au pa kalina sinea, ba Mu tozi nau, nasa si tavete va sea atuni arau koa Goi?
3Vea, leana hola koa Goi pude ṉoṉovala au, pude etulu au, sa tie pu tavetia Agoi pa Limamu, totoso qetu ni Goi sari sinekesekei tadi na tie kaleadi?
4Vegua, tago mata gua tugo tadi na tie si Agoi? Doṉo viliti gua tugo na tie si Goi?
5Vegua, sa Mua totoso si gelenaena gua mo sa tinoa tamigami? Ba be sa Mua tinoa si papakana mo,
6ke doṉo hata i Agoi sari qua sinea, meke viliti luli sari qua tinavete sapu sea?
7Gilania mua Agoi sapu loke qua sinea si arau, meke sapu loke tie kote boka harupu au pa Limamu.
8Sari Limamu mo tavete au meke keha vura nau, ba kamahire sari lima tugo arini si ṉoṉovala au.
9Mu balabala ia sapu pa pepeso si tavete nau Agoi, ba kamahire hiva va mate au na pule lani au Agoi pa kavuru.
10Agoi va boka ia sa tamaqu pude gavoro si rau, meke Agoi va toqolo au pa tiana sa tinaqu.
11Agoi va poko nia kapu sa tiniqu, meke piti vari kapae ni sari susuri na masa.
12Agoi poni nau sa tinoa meke va dogoro nau sa Mua tataru, meke sa Mua kinopu si va naqitina sa qua tinoa.
13Ba kamahire tiqe gilania rau, sapu golomaena sa Mua hiniva pude va kilasa au.
14Kopu totoko nau Goi, pana visa ene sea si rau gua, si kote va kilasau meke lopu taleoso nau.
15Pana ene sea tugo arau, si tinasuna mo si rau koa Goi, Lopu tavete va sea si rau, ba lopu qetu tugo si rau, sina ta siṉie nia rau sa tinalotaṉa meke na kinurekure.
16Be hite bokaboka si arau, si hukue vagi au tu Goi guana laione, meke vata dogoro Mua ṉiniraṉira pude va kilasa au.
17Koba turaṉa nau vina sosode vaquradi mo Agoi si arau, meke va gevuru nono ia sa Mua tinaṉaziri mae koa rau, koba hatai Goi kaiqa ginugua vaquradi pude va raza ni koa rau.
18Tamasa, vegua ke va malumau Goi pude podo si rau? Padaqu be mate sipu lopu ele ta dogoro si rau koari tie.
19Pude topue koasa tinaqu meke toṉoto la mo pa lovu, si kote leana be guana lopu hite podo mo si arau.
20Visavisa rane mo si koa hola pa qua tinoa. Veko au! Maqu qetuqetu hite qua koari totoso koa holadi,
21sipu lopu ele la si rau pa lovu, meke lopu kaqu pule mae. Kote la koasa popoa hupohuporona meke koa ia tinalotaṉa.
22Popoa sapu huporo meke opoadumu ia na kinolura, vasina sapu dudukurumu sa kalalasa.”
