Job 10

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹“Egkeepesan ku is untung ku, umbe ebpetakà ad he edriklamu. Egkeǥiyen ku is ikezaat te ǥehinawa ku.

²Ne iyan heini egkeǥiyen ku ziyà te Megbevayà: ‘Kenà a kenikew hukumi he mezaat a, kekenà, ipetueni nu kedì ke hengkey is insumbunga nu kedì.

³Ingkelipey nu ve is kebpeentusa nu kedì? Maan is idselikwey a kenikew is keugelingen nu he vineelan, ne ebpeburan nu mulà is pelanu te kebpendezaat te menge mezaat he etew?

⁴Iring be is ked-ehè nu te ked-ahà te etew?

⁵Iring dè be kevavà is untung nu te untung te etew?

⁶Maan is kenè en ereg ne edseyepen ad kenikew?

⁷Netuenan nu he wazè ku salà, piru wazà ebpekelavan kedì emun iyan ka kuntada.

⁸“ ‘Iyan ka mibpurma wey mibaal kedì, ne ǥuntaan edezeetan e zà kenikew.

⁹Tentenuzi nu he mibpurma a kenikew he ebpuun te tanà, ne ǥuntaan, idlikù e en be kenikew ziyà te tanà?

¹⁰Iyan ka mibpurma kedì diyà te ǥetek te iney ku ne neiring a te ǥatas he mibeelan he kisu.

¹¹Mibpurma a kenikew he zuen din menge tulan wey menge uǥat ne midtenges a kenikew te sapù wey lundis.

¹²Mibeǥayan a kenikew te untung wey impeehè nu kedì is keupiya nu, wey midtipiǥan nu is untung ku.

¹³Piru ǥuntaan netuenan ku is tutuu he pelanu nu mehitenged kedì

¹⁴he iyan is ebentayan a kenikew ke ebpekesalà a, ne zutun kenà a kenikew ebpeseyluwen.

¹⁵Nekesalè e man etawa wazà, ne neked-iring dà he mekehizuhizu a. Su neeled-eled a wey utew subra is kebpekaantus ku.

¹⁶Ebpenigudu a he mekeenew a, piru iring ka te erimaung is ebpeniid kedì su wey a kenikew mezezeeti. Ibpeehè nu is gehem nu te kedezaat kedì.

¹⁷Kenè en egkeengked is kedsumbunga nu kedì, ne layun egkeumani is pauk nu kedì. Ne kenà a kenikew ed-engkezan te edsurung.

¹⁸“ ‘Maan is intuǥut nu pa he meetew a? Deyzey pezem ke minatey ad hein wazè pa nekaahà kediey.

¹⁹Deyzey pezem ke wazà ad melimbag. Deyzey ke minatey e en diyà te ǥetek te iney ku ne indiritsu ad ileveng dutun te kedlusaza kedì.

²⁰Deisey zà he timpu is nesamà para kedì, umbe engkezi ad te edrasey su para melipey a minsan te mevavè dà he timpu

²¹zutun te kenè e pa edhendiyà te lugar he mekeseseeng wey merusirem, he zutun kenà ad ebpekelikù dini.

²²Utew merusirem haazà; wazà bulug kerayag, wey wazà kehusey.’ ”