Job 10

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹«¡Cawaytaga yamacashcänami! Chaymi wichaypa uraypana rimashaj. Llaquisha cayllawanmi imatapis rimashaj.

²Tayta Diosta nishaj: ‹¡Ama nimaychu «juchayojmi canqui» nir! ¡Chaypa ruquenga willamay imapita ñacachimashayquitapis!›

³Nogataga quiquiquimi camamashcanqui. Chayno camaycämarga ¿imanirtaj ashiycanqui jucha rurashäcunata? ¿Imanirtaj camacächinqui fiyu runacuna mana alli ruramänantapis?

⁴Gamga manami runacuna yarpashannöchu imatapis yarpanqui.

⁵Gamga manami runacuna cawashannöchu cawanquipis.

⁶Chayno camaycämarga ¿imanirtaj ashiycanqui jucha rurashäcunata, mana allita rurashäcunatapis?

⁷Noga juchaynaj cashätaga musyaycanquimi. Gampa munayniquipita salbamänanpäga manami pipis canchu.

⁸Quiquiquimi maquiquiwan ruramarayqui. ¡Cananga illgächimayta munaycanqui!

⁹Mitullapitami ruramarayquipis. Cananga ¿yapaychu polbuman ticrarachimanqui?

¹⁰Cuwäju lëchita tintichejnömi cuerpöta camacächishcanqui.

¹¹Gammi tullöcunatawan ancöcunata charinacachir camacächishcanqui. Aychäcunata, garäcunatapis yurichishcanqui.

¹²Cawachimarayqui, cuyamarayqui. Alli ricamashpayquimi cawaycächimanqui.

¹³«Cananmi ichanga musyä shongullayquicho yarpapaycämashayquita.

¹⁴Juchata ruranäpaj cashanta mana cashantapis ricapaycämarayqui, juchata ruraptëga castigamänayquipaj.

¹⁵Juchata rurasha carga manami salbacönachu. Juchaynaj carpis uysurayllami uysuräcö. Manacajmanmi churamashcanqui, llaquicaycächimanqui.

¹⁶Uysuraycashäpita ricäramuptë gamga liyunnömi gaticachämanqui. Ushacächimänayqui-cashami tucuyta ruraycanqui.

¹⁷Nogapa conträ testïgucunaga manami pishinchu. Gam nogapäga mas masnami rabyaycanqui. ¡Suldärucunanömi jananman-jananman ñacaycächimanqui!

¹⁸«¿Imapäraj yurichimarayqui? Pipis manaraj ricamaptin mamäpa pachallanchöna wañucöman caran.

¹⁹Mamäpa pachallanpitana pampaycamanman caran. Chauraga imaypis mana cashanönami cäman caran.

²⁰Noga wallca timpulla cawanäpaj caycaptëga ama ñacachimaynachu ari. Rätullapis cachaycamay ari cushisha goyapärinäpaj.

²¹Chaypitaga imaypis mana cutimojnami aywacushaj. Aywacushaj yanauyaycaj chacaymannami.

²²Chay pachaga caycan yana mancapa siquinno yanauyaycajmi, pasaypa mana allimi. Chaychöga manami achquipis canchu.»