Job 10

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹“Au guu buhi di mouli, hagalongo gi agu helekai mai i lodo dogu manawa gee.

²Hudee hagahuaidu ina au, meenei God. Goe hagia mai be di maa di huaidu aha ne hai ko au?

³Ma e donu Goe e tenetene gi dau hagaduadua au? E de hiihai gi au mee ala ne hai? Ga nomuli ga gadagada gi nia mee o digau huaidu ala ne haganoho?

⁴Goe e gidee nia mee be di madau gidee?

⁵Do mouli le e bodobodo gadoo be nia mouli o gimaadou daangada dangada?

⁶Ma e aha dela Goe e hagailongo ogu huaidu huogodoo, gei e halahala ogu ihala huogodoo?

⁷Goe e iloo hua bolo au ogu huaidu ai, gei tangada e mee di daa au gi daha mo doo lima ai.

⁸“Aalaa go oo lima ala ne hai au, gei dolomeenei go oo lima la hua ala e daaligi au.

⁹Goe gi langahia bolo Goe ne hai au mai i nia gelegele, gei Goe ga dagadagahi labelaa au bolo gii hai au nia gelegele labelaa?

¹⁰Goe ne haga maaloo dogu damana bolo gii mee di hagadili au. Goe ne haga tomo aga au i lodo tinae o dogu dinana.

¹¹Goe guu wanga nia iwi mono goneiga gi dogu huaidina, gaa hii ogu iwi gi nia goneiga mo di gili.

¹²Goe ne gaamai gi di au di mouli mo di manawa aloho, mo dau abaaba mai au dela gu dadaahi au.

¹³Dolomeenei gei au gu iloo bolo i di madagoaa hagatau deelaa, gei Goe nogo hagamaanadu dau hai dela belee haga huaidu au.

¹⁴Gei Goe nogo hagadinadina mai au be au e hai dagu mee huaidu, bolo gei Goe ga hagalee e dumaalia mai.

¹⁵Maa au gaa hai di huaidu, gei au ga gidee dogu haingadaa mai i doo baahi. Maa au gaa hai di humalia, deai di hagaamu mai i doo baahi ai. Au gu hagaloale huoloo gei gu langaadia huoloo.

¹⁶Maa au ga haadanga lamalia hagadahi, gei Goe ga waluwalu au gadoo be di laion, gei Goe e hai hogi au mogobuna belee haga huaidu au.

¹⁷Nia madagoaa huogodoo gei Goe au gau hagamodongoohia belee hai baahi mai gi di au. Do hagawelewele mai gi di au le e damana mai i nia madagoaa huogodoo, gei Goe e haganohonoho dau mee i nia madagoaa huogodoo bolo Goe e hagahuaidu au.

¹⁸“Meenei God, Goe ne aha dela ne dumaalia mai gi di au gi haanau mai? E humalia maa nei bolo au gii made gi daha i mua nia daangada ala ma gaa mmada mai gi di au.

¹⁹Dogu hagahuudonu mai i tinae o dogu dinana gaa hana gi lodo taalunga, e koia e humalia i dogu haanau mai.

²⁰Dogu mouli la digi hoohoo bolo ga hagaodi? Goe gi diagia hua au! Goe dumaalia mai gi di au e hai ai ogu tene i lodo di madagoaa dulii dela e dubu i golo i dogu mouli.

²¹Au gu hoohoo ga hagatanga gaa hana hagalee e hanimoi labelaa, e hana gi tenua o di bouli dongoeho gei e lodo huaidu,

²²tenua bouli dongoehe, manawa gee, gei e hinihini, di gowaa dela e maalama guu huli guu hai di bouli dongoeho.”