Job 10

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Wal Job bin gitwail langa God. Imbin tok, “Mi nomo laigim jidanbat laibala en brom insaid main hat mi grambul langa yu main God.

²Yu nomo panishim mi. Yu dalim mi wanim aibin dum rong.

³Wotfo yu laigim detlot hu oldei dumbat nogudbala ting? En wotfo yu wandim panishim detlot pipul yubin meigim?

⁴Yu reken yu sabi ebrijing seimwei laik melabat oldei sabi?

⁵Yu reken yu garram shotwan laif wulijim melabat garram?

⁶Blanga tharran maitbi yu wandim faindim folt kwikbalawei langa mi.

⁷Yu sabi mi nomo giltiwan, bat hu garra seibum mi brom yu?

⁸Wal wotfo yubin meigim mi, en yu garra binijimap mi na?

⁹Yu sabi yubin meigim mi brom det klei. Wal yu nomo pudumbek mi langa det graun igin.

¹⁰Jis laik det tjes weya pipul meigim brom milk insaid langa pot, lagijat du yubin meigim mi insaid langa main mami binji.

¹¹Afta tharran yubin gaburrumap main boun garram bif en skin.

¹²Yu na bin gibit mi laif, en yubin oldei kipgon laigim mi. En yubin kain langa mi en bin oldei wotjimbat langa mi du.”

¹³Wal Job bin kipgon tok langa God, “Yu nomo bin dalim mi blanga det nogudbala plen yubin abum blanga mi,

¹⁴bat yu oldei lukinat langa mi dumbat nogudwan ting, en yu oldei panishim mi.

¹⁵Nomeda mi gilti, o nomo gilti bat yu stil panishim mi en mi sheim miselp na, dumaji aibin abum loda trabul.

¹⁶Nomeda ai oldei jidanbat raitwei, yu oldei hantingbat blanga mi jis laik det strongwan laiyan. Yu oldei hantingbat mi garram yu strongwan pawa.

¹⁷Yu nomo bin stap toktokbat blanga mi, dumaji yubin brabli wail langa mi.

¹⁸Wotfo yubin larram mi jidan laibala wen aibin bon? Mobeda ai bina dai bifo aibin bon,

¹⁹en olabat bina garrimap main bodi langa greib.

²⁰Mi garram oni lilbit taim na. Wotfo yu kaan libum mi na, en larram mi jidan gudwei, bifo mi go langa det greibyad weya ebrijing oldei jidan dakbala en ai kaan neba kambek igin?” Lagijat na Job bin tok.