Hiobe 10

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹“No ʒuhuckerâ juzore takicnukac, irec mu heŋɋâŋ dâŋnane i manabâc tâmiric mufuapemu, erâ buʒâiczi maŋnane bâumbeŋkeha dâŋ mupemu.

²Ehuc Anutu dâŋ kecʒiŋuc âzâcnepemu: Go mi behecnuc, erâ fuŋne weniŋucte mana‐naretec sâqorekac i nazac.

³Bâʒâicnukomec i manatec biaŋkekac me? Me go gahacne mezi wiac bâfuameŋ i qaisockehuc ŋic sindaŋne jaŋere juju hone ʒiziweckomec i wâc manatec sâckekac me?

⁴Me ŋiczi wiac hone manac eeŋgopieŋ irec sâc sawa hone manac eekic me?

⁵Mâreŋŋic nâŋere juju dameŋ fokac irec sâc jaha gore juju dameŋ wâc fokac me?

⁶Iŋuc mi fokacko ine wemocte kiŋ bahac‐nane moc bâfuacmurâ babasa gie bakomec, ehuc sâqocne‐nanere fuŋne bajaŋgeŋkecmurâ ʒoɋac ekomec?

⁷No kiŋ bahac tâmiric jukopac, erâ moczi moc gore meonec sâcne mi bataracnuocmu i go mana‐jâmbâŋkekomec.

⁸Go gahacne mezi bâfuacnumeŋ, erâ ine me izia bâsirowecnuzo ekomec.

⁹Go mâreŋ qâhâckerâ bâfuacnumeŋ i moc manasunʒaŋ me! Me mocwâc gâc wândoc epemurâ mukomec me?

¹⁰Go mamac‐nanezi bâfuacnuocte tâpiri râcnemeŋ, erâ gokizia wâc mana‐narehaŋ neŋgoc‐nanere bumaŋko fua sokac epo.

¹¹Go hâcne sahac biuchec bâfuacnumeŋ, ehuc siec â rua râec‐jofahuc sahac‐nane basanaŋkemeŋ.

¹²Go maŋjauŋ enarehuc juju tahacnumeŋ, erâ wâc ehâmo‐naretec biaŋne juwarepo.

¹³Ʒi ine kecʒiŋuc mana tarakopac: Go wiac i fuŋnehec enare warehuc jumeŋ.

¹⁴Go nore ʒiŋuc manasumeŋ: E sâqocne baocmu me mâcne, iŋuc muhuc hone jâjâpecnuhuc jumeŋ; i sâqocne‐nane mi bâtâmirecmurâ iŋuc hâcne emeŋ.

¹⁵No sâqocne bape izia mana‐naretec bahacnehec eekac, ŋifec ine wiac biaŋne ebac epe sifu manatec sâqoreekac. Irec no mana hâtâwehuc mimiekopac.

¹⁶No wiac i me i ebac epe biaŋke‐bipieha sifu laioŋ momori iŋucne erâ jâpecnuekic, erâ i sawa mâcne, go sipiricnucmurâ mâsi wiac fuŋne fuŋne baekic.

¹⁷Go dameŋ sâc ŋiczi musâqorecnuniŋte fânoc hejareekic, ehame nore erâ aaricgezi ɋârâŋkeme kisâfâc‐nane ɋâricne mocwâc bâfuac‐jopaekic.

¹⁸“Go wemocte mana‐naretec neŋgoc bumaŋkonec fuapo? No ŋiczi moc mi honecnuhapie biac hâmozapo me!

¹⁹No neŋgoc bumaŋkonec fuarâ izia ʒâŋeruŋko huzapo me! Eme mi fuapo irec sâc eme muzac biaŋkezac.

²⁰Mâreŋko juju dameŋ‐nane i biac qosackezo ekac, irec go behecnutec piticne mac juhâmorâ hâmozepac.

²¹No dameŋ mi ʒoraha hae mâreŋ dapâc qisiricko â hâmocte nâkumucko rarâ mocwâc mi risie‐jâmbâŋkepemu.

²²Hae mâreŋ ira duŋdapâc qisiric â wiac gâgâpâcne foha tatamaczi omaeme dapâczi dapâc jaha fohuc juekac.”