1Bungina lipudi dungguti disok xumana titia, saing dahayau nanuhangidingdi,
2Urana garang lupdi dibagu lipuadi ba nanuhangidingdi gumangiding sibuna. Baing daxap hainidingdi sanga mana ding murungadinga.
3Baing Toxoratamona harua ba, “Aningogua sanga wa mana lipudi bungingbunginalo te, namua na axamang olang titiamdi. Bagula duwa niani 120 ing ganina.”
4Nepildi duwa mana titia mana bungina baguba xaung kimuya. Maluxu mana bungina baguba Urana garandi dila rangua lipudi nanuhangidingdi saing daxap garadi masok. Lipu sabangasabangadi, ramramoding sabanga mana haungingua waleu sibuna.
5Toxoratamona bagu ba lipudi kuboluding diandi ditubu buk. Bungingbunginalo axamang longgalo dahatum manadi axamang diang sibundi. Ila ila subingan tate.
6Baing Toxoratamona ayangang sibuna ba tongtongia lipudi titia, saing gamona mauxana buk.
7Binabu Toxoratamona harua ba, “Bagula ngasahi axamang longgalo ngatongtongiadi etua titia li—lipudi xaung asaxa nangnangdi xaung asaxa abungindi xaung mang sabalunamdi. Namua na ayangagu sibuna ba ngatongtongiadi.”
8Ne Toxoratamona yaha mana Noa.
9Noa naxuyanganoa bing bila li. Noa lipu maringina. Liwe mana lipudi mana bungina baguba, kubolung dian tela te. Noa haxa rangua Urana.
10Noa garang tuwa, yadingdi bing Siem, Ham xaung Yapet.
11Ne lipu titiamdi didoa sibuna Urana maxania, saing dududing buk mana haungingua.
12Bagu lipu titiamdi, saing bagu ding diang sibundi, namua na ding longgalo disu mana kubolu diandi buk.
13Binabu Urana harua na Noa ba, “Bagula ngasahi lipu longgalo, namua na titia baxagi mana kubolua dududing buk mana haungingua. Maxuna bagula ngahanggalangiadi xaung titi.”
14“Utongtongia waga sabanga tela mana xaiya goper. Utongtongia numa lundi maluxu mana, saing usami xasu haringinia lunia xaung ubunia.
15Bagula utongtongia bila li: Maxaxayanganoa bing 150 mita, tubunganoa bing 25 mita, xaung maxaxayanganoa mahaing bing 15 mita.
16Bungina utongtongia labu uriba uronganoau tai. Uyunga mita hataina mana uronga xaung rubunga. Utongtongia xalua waga rubinia, saing utongtongia saxuming tuwa maluxu mana—hawama, liama, xaung etuama.
17“Bagu bagula ngaxap silinga sabanga masok titia bu hanggalangia axamang walingam longgalo hawa sabalunia, axamang yagangam longgalo. Axamang longgalo duwa titia bagula dimati.
18Ne bagula ngahau haruangua ranguaung. Baing bagula uluxu wagia—ung xaung garamdi, hainima, xaung garamdi hainidingdi.
19Baing oxop asaxa luwa luwa mana asaxa xangxang longgalo maluxu wagia, moning tela xaung hagaxang tela. Oxopdi mala ranguaung bu duwa.
20Luwa luwa mana mang longgalo xaung asaxa nangnang longgalo, xaung asaxa abunging longgalo. Ding bagula dila ranguaung bu duwa.
21Oxop anginga xangxang longgalo bu utadi wagia, bu sok angingadi mang xaung mading.”
22Noa libu bila ba. Libu axamang longgalo Urana tabina ba.
