1Bungina Yekop lungu ba, haidanga duwa Isip baing bala garandi ba, “Baruta arung olang saing ayangaim mua?
2Ngalungu ba haidanga duwa Isip. Ala bu agim teladi nakira, nam tamatia gesaga.”
3Baing Yosep sabangang 10 diyunga Kenan saing dila Isip ba digim haidanga.
4Ne Yekop yunga Yosep sabangang sibunoa Benyamin mala ranguadi te. Yekop maxuwa labu Benyamin xap mauxanganoa daxangia.
5Binabu bungina lipudi dila Isip ba digim haidanga, Yekop garandi xauna dila ranguadi. Namua na gesak sabangua sok mana titia Kenan.
6Yosep wa gabman mana titia Isip, binabu lipu longgalo mana titi longgalo dila digim haidanga rangua. Baing bungina Yosep sabangandi dila disok rangua, digung kidingtuxundi saing dituru mari titia.
7Baing Yosep bagu sabangandi saing xabiadi. Tauna harua nadi bila xabiadi te. Harua haringina nadi ba, “Ama bi?” Dahaxuya ba, “Am gama mana titia Kenan. Am gabo ba am gagim anginga.”
8Yosep bagu sabangandi saing xabiadi ne ding ba daxabia te.
9Baing hatumia muli mibinga waleu bagu sabangandi digung kiding tuxundi rangua, baing harua ba, “Ang lipu bagubagungamdi. Abo axabia titimam hataing baruamta haringingan te.”
10Baing dahaxuyu haruanganoa ba, “Tegu. Lipu sabanga. Am lipuxim oxatamdi, am gama ba am gagim anginga.
11Am longga tibumam taininoa. Am lipu bagubagungamdi te. Tegu. Am lipu haruanga maxung sibunamdi.”
12Baing Yosep baladi muli ba, “Tegu. Ama ba axabia titimama hataing baruamta haringingan te.”
13Baing dahaxuya muli ba, “Lipu sabanga, am 12 neng sabangandi. Am tibumam taininau mana titia Kenan. Kixingimam sibunoa hatata wa rangua tibumam. Ne tela hanggalang.”
14Baing Yosep baladi muli ba, “Ngaharua nang baing, ang lipu bagubagungamdi.
15Ne ngabo ba ngatubang: Ngaharua maxung sibuna mana xaitamoxi Isipkama yania. Nabu kixingima ma li maxagia te, sanga ba ala muli yabaimia te.
16Asoxi riaim tela mala bu xap kixingima ma. Ne ang teladi bagula awa salak yabania, bu am gasai mana haruangaima, maxung sibuna kimbo tegu. Nabu am gasai mana haruangaima na maxung tate, tauna mana xaitamoxi Isipkama maxania, nga balang ba ang lipu bagubagungamdi.”
17Yosep harua laing sup baing tadi salak yabania xaidap luwa hiliana.
18Tauna mana xaidap luwa hiliana Yosep baladi ba, “Nabu asu mana haruangugua bagula awa xai, namua na nga lipua ngawa hawa mana Urana.
19Nabu haruangaima maxung sibuna, tauna angia tela bagula wa mana salak numana awa mana ba. Ne ang teladi bagula axap haidanga agimdi ba mala. Bu asinadi na sibimgadi gesagiding ba.
20Bing axap kixingima ma rangua nga. Bagula ngaxabia ba aharua maxung sibuna. Alibu bila ba, binabu amati te.” Baing dinai mana Yosep haruanganoa.
21Bungina duwauyu rangua Yosep sabangdi dahangixaya liwe mading ba, “Maxung sibuna kira talibu doa mana sabangaroa saing tawa mauxangania. Bungina tabagu tang saing wagi kira ba tahauli ne talungu te. Bila na mauxangana hatata sok makira ba, haxuya kubolua talibu ba.”
22Baing Ruben baladi ba, “Ngabala ba labu alibu doa mana gara ba tai. Ne alungu haruangua te. Mauxana hatata tasok mana li, sok ba haxuya matianoa.”
23Sabangandi daharua Hibru xuana saing dahagaxa ba Yosep xabia haruangadinga te. Bungingbunginalo ina hangixaya ranguadi, namua na ina xabia Isip xuana. Baing lipu tela xugia haruanganoa na sabangandi.
24Yosep lungu haruangadingdi laing sup baing sauyadi saing tang mala. Tang laing sup, tauna goxoya ma saing hangixaya ranguadi. Baing bala lipu oxatamdi ba dituxu Simeon, baing dituxu. Baing daxap waxu tela ma saing digoxi sabangandi maxadingia.
25Tauna Yosep bala lipu oxatamdi digam haidanga mana tangadingdi, xaung siang teladi. Xaung disina anginga tela bu daxang daxangia. Baing lipu oxatamdi dilibu bila Yosep harua ba.
26Tauna sabangandi dita haidangadi mahaing donkia saing dila.
27Baing kimuya ditongtongia tabalaxaya tela ba dikinu. Baing sabangan tela xaxa tanganoa ba xap anginga bu haxang donki. Baing bagu sianga wa tanga xuania.
28Baing wagi sabangandi ba, “Abagu. Disina siang tanga tela nanga. Digam tangagia.” Dilungu haruanga baguba saing dihixi mana. Baing dimaxuwa haringing sibuna saing duxusunga ding ba, “Urana libu baru makira?”
29Bungina disok Kenan, baing dibaxanga na tibuding Yekop mana axamang longga disok manadi.
30Daharua ba, “Gabman Isipkama harua haringina nam. Saing su haruangua nam ba, am lipu bagubagungamdi.
31Baing am gahaxuya ba, ‘Am lipu haruanga maxung sibunamdi. Am lipu bagubagungamdi te.
32Am 12 neng sabangandi. Am tibumam taininau. Ne tela hanggalang, ne kixingimam sibunoa wa Kenan rangua tibumam.’
33“Baing gabman balam muli ba, ‘Angia tela bagula wa rangua nga. Binabu ngaxabia ba ang lipu haruanga maxung sibunamdi. Ne ang teladi bagula daxap haidangadi mala yabaimia bu hauli sibimdi mana gesaga.
34Ning bagula axap kixingima ma rangua nga. Binabu ngaxabia ba ang lipu haruanga maxung sibunamdi. Tauna bagula ngagoxoya kixingima mala muli ranguang, bu ahaxa mauli mana titia baguli murungaimia.’ ”
35Kimuya dimatu haidangadi baing dibagu siang tangandi duwa maluxu mana tangading taining tainina. Tibuding xauna bagu, baing dihixi mana saing dimaxuwa haringing sibuna.
36Baing Yekop baladi ba, “Ang na alibu ne garagu luwadi dahanggalang muli. Ne hatata abo axap Benyamin xauna mala hasoya manga? Bungintabi mauxangagua bagu li bagula sup?”
37Baing Ruben bala tibuding ba, “Nabu ngaxap Benyamin ma muli te, bing ung gara lup luwadi ba. Uyunga nga bu ngawasa mana, to ngaxap ma muli ranguaung.”
38Baing Yekop harua ba, “Tegu sibuna. Garagua sanga ba mala ranguang te. Sabanganoa mati ba ne hatata ing ganina wa. Labu xap doa daxangia, bu sina usinganga sabanga sibuna nanga. Baing bagula ngala mana matiadi yabadinga.”
