1Bungina Yosep bagu tibuna mati, baing kinu etua mana saing tang. Baing libu tibuna ramramonoa.
2Tauna kimuya Yosep bala lipu baxiamdi ba dita baxi mana tibuna sangganoa, labu doa. Baing lipu baxiamdi dilibu bila Yosep harua ba.
3Dilibu oxata baxiama sanga mana 40 xaidap. Namua oxata mana dita baxia mana lipu matiandi sanggadingdi bing xap xaidap 40. Lipu Isipkamdi ditangia Yekop sanga mana 70 xaidap.
4Bunging usingangama xaung tinanggama sup, baing Yosep bala xaitamoxi lipuxing oxatamdi ba, “Laku ngabo tai axap haruangagua mala rangua xaitamoxi. Haruangagua bing bila li.
5Bungina tibugu bo ba mati, libu nga, ngahau haruangua ba. Ngaxap sangganoa mala mana titia Kenan. Binabu ngabo ba uyunga nga te bu ngala ngakimang tibugu to. Tauna ngama ba.”
6Xai tamoxi lungu Yosep haruanganoa baing haxuya, “Tauna usu mana haruangama bu uxop tibum sangganoa mala bu ukimang.”
7Baing Yosep ila ba kimang tibuna. Xaitamoxi lipuxing oxatam longgalo lipuxing haringing longgalo xaung yanam Isreliam longgalo dila rangua Yosep.
8Yosep bakbagindi xaung kixingindi, tibuna sibindi ding longgalo dila. Garadi ding ganiding digabu sipsip meme xaung kaudi ding ganiding duwa Gosen.
9Karisidi xaung lipuadi dirung mana hosidi ding xauna dila rangua Yosep. Bakbak sabanga sibuna dila.
10Dila disok Atat sanga xaidaba haing mana langa Yodan, longga dunia wit longdi saing daxau aningodingdi. Baing ditang sabanga sibuna ba dikimang lipua. Yosep naxu mana usinganga xaung tinang kubolunoa sanga mana xaidap 7.
11Lipuadi duwa Kenan dibagu bakbakka duwa Atat ditang saing dusi mua, baing daharua ba, “Isipdi dilibu tinang sabanga sibuna.” Binabu duxu longga ba Abel Misraim. Longga ba wa hataina xaidaba haing mana Langga Yodan.
12Yekop garandi dinaxu mana haruangua saing dilibu bila harua nadi ba.
13Daxap mala Kenan saing dikimang mana guha gobagobia wa titia Makpela, haxek mana longga Mamre. Ebraham gim titia baguba rangua Epron, ina lipua mana bakbakka Hit. Binabu titia baguba sok bila gobagobanoa.
14Yosep kimang tibuna laing sup, baing goxoya muli Isip xaung kixingingdi digabu bakbakka dila ranguadi ba.
15Tibuding mati baing Yosep kixingindi daharua ba, “Barutadi? Labu Yosep gamia kirauyu bu hatum ba haxuya kubolu dianadi talibudi mana ba.”
16Binabu disina haruangua mala rangua Yosep. Daharua ba, “Bungina tibura mati teguyu harua nam ba,
17‘Am gasina haruanga baguli naung: Yosep, ngaxusungaung uyunga kubolu diana kixingimdi dilibu maung.’ Hatata am Urana lipuxing oxatamdi am gaxusungaung ba uyunga kubolu diana am galibu maung.” Yosep lungu haruanga baguba saing tang.
18Baing kimuya kixingindi dila rangua ba dibagu. Dituru mari titia haxek kinia saing daharua na ba, “Am gama raunguang bila lipu oxata olanggam.”
19Binabu Yosep baladi ba, “Labu amaxuwau tai. Nga Urana te ba ngatang haruangia.”
20Yosep baladi ba, “Maxuna ahatum ba hanggalangia nga. Ne Urana libuang ba alibu kubolua baguba bu hauli lipu longgalo. Baing abagu kubolua libu mang.
21Binabu labu amaxuwau tai. Bagula ngawasa mang xaung garaimdi.” Baing Yosep libu haruanga xaiyua na kixingindi saing libu gamodingdi duwa mosiu.
22Yosep wa Isip rangua tibuna bakbagindi. Yosep wa sanga mana niani 110.
23Bagu garadi xaung Epriam garandi garadingdi. Baing bungina Makir garandi disok, daxapdi mala rangua Yosep bu suxadi babania. Makir bing Manase garang luba.
24Kimuya baing Yosep bala kixingindi ba, “Haxek sibuna ba ngamati. Ne Urana bagula wasa mang saing xapkang mala sangua titia baguli. Bagula xapkang mala mana titia waleu hau haruangua ba, sina na Ebraham Aisak xaung Yekop.”
25Baing kimuya Yosep bala Israil garang lupdi ba, “Ahau haruangua rangua nga bila li. Bungina Urana ma ba hauliang, bing axap tuagudi mana titia baguli saing ala xauna.” Binabu Yosep libu kixingindi daharua maxung sibuna taxa eta lo bagula disu mana haruanganoa.
26Yosep mati bungina nianindi 110. Baing dita baxi xangxana mana sangganoa. Labu sanggua doau tai. Baing dita sangganoa mana bokis tela saing dita mana titia Isip.
