1Urana libu xai mana Sara bila ina harua ba.
2Baing Sara gamona saing hayau gara lup tela bungina Ebraham wa konga. Sara hayau mana xaidap mana waleu Urana mogu ba.
3Baing Ebraham uxu gara yanoa Aisak.
4Ne titinga 8 kimuya Sara hayau Aisak. Ebraham naxu mana Urana suxungunoa saing xuxu sangganoa.
5Ebraham nianindi 100 disup, baing Sara hayau Aisak.
6Baing Sara harua ba, “Urana libu xai manga, ngayaha saing ngamasisi. Baing lipu longgalo dilungu alali saing diyaha xauna.”
7Baing Sara harua ba, “Waleu gaxarea sanga bala Ebraham ba, ‘Hainima Sara bagula hayau gara bu ta su na’?”
8Baing gara tubu saing yunga sua, Ebraham tau anginga sabanga.
9Haga, haing Isipkam tela, ina hayau Ebraham garang lup tela. Ne bunging tela Sara bagu gara ba hali mua.
10Saing bala Ebraham ba, “Usuka haing oxata olanggama garanoa tang mala, namua na haing oxata olanggama garanoa bagula xap xalingim hataing tela te, bila garagua Aisak bagula xapdi.”
11Ismail xauna Ebraham garanoa, haruanga li libu Ebraham gamonoa mauxana.
12Ne Urana bala Ebraham ba, “Labu gamom luwa mana Haga garanoa tanggu tai. Unaxu mana Sara haruanganoa. Namua na garam xumana ngahau haruangua ranguaung manadi ba, bagula disok mana Aisak.
13Bing Ismail xauna ngalibu disok bakbak xumana, namua na ung garama.”
14Laing buraraging singa Ebraham xap anginga xaung asaxa sanggana duxu langa mana, saing ta Haga yaxunia. Saing Ebraham sina garanoa na Haga saing soxi dingtang mala. Baing Haga ila saing haxa mauliʼm long tela Berseba long lipu teguam.
15Bungina langa sup yunga garam tabu xai kaxukan tela namuya.
16Saing ila rung hasoya monga, namua na hatum ba, “Labu ngabagu garua matiu tai.” Baing Haga ila rung saing tang mua.
17Baing Urana lungu garua tang, saking Urana uleginam tela wagi saing bala Haga ba, “Uria baru, labu umaxuwau tai. Urana lungu garua tinanginganoa ba.
18Umesa ula uiti garua bu utuxu rimanoa bu ngalibu bakbagindi bakbak haing lipu xumana.”
19Saking Urana libu Haga maxanoa bagu, saing bagu lang ginanggam tela wa. Ila xu asaxa sanggania saing sina garanoa saing nung.
20Urana wa rangua garua saing sok lipu sabanga, mana long tela lipu teguam, saing xap xabiangua mana ruang haninganoa.
21Ne bungina wa mana long magoin tela Paran bauna xap haing tela na Isip.
22Mana bungina Abimelek xaung Pikal ami ofisa mugamugangam tela tang dila rangua Ebraham saing daharua ba, “Urana bungingbungina wa ranguang mana axalaxadi ulibudi.
23Binabu uharua maxung sibuna Urana maxania, sanga utuxu murak manga te, aung garagudi te, aung mana bakbagigudi te. Nga ngalibu kubolu xaiyua maung. Bing hatata ulibu kubolu xaiyua manga xaung titia hatata uma uwa mana.”
24Ne Ebraham harua ba, “Ngabo ngalibu bila ba.”
25Ebraham wa hangianga rangua Abimelek mana lang banggumin tela Abimelek lipuxing oxatamdi daxap.
26Ne Abimelek harua ba, “Nga ngaxabia te. Waleu ubala nga sap. Hata sibuna li ngalungu alaba.”
27Baing Ebraham sina sipsip xaung bulmakau na Abimelek, saing tang ditongtongia kondrak.
28Saking Ebraham xap 7 sipsip garang hagandi saing tadiʼm long tela.
29Baing Abimelek xusunga ba, “Baruta ning ulibu bila ba?”
30Ebraham haxuya ba, “Ung bagula oxop 7 sipsip garandi. Bing ubaxanga rangrang ba, nga ngatongtongia lang banggumina ba.”
31Baing tang ditongtongia kondrak mana longga ba, saing duxu longga ba Berseba.
32Tang dilibu kondrak masup Berseba, baing Abimelek xaung Pikal ofisa mugamugangam inia ila muli mana titia Pilistia.
33Ebraham rang xai tela mari Berseba, mana Urana bungingbungina wa.
34Saking Ebraham wa bunging maxaxaya mana titia Pilistia.
