1Baing Aisak wagi Yekop saing sina guxama na. Aisak bili ba, “Labu uyau haing tela Kenangu tai. Tegu.
2Ung bagula ula mana titia Mesopotemia, Betuel yabanoa, baum tibuna yabania. Bu uyau toxongoma Leban nanuhanging tela.
3Urana sanga haringiaung, ina bagula libu xai maung bu oxop gara xumana. Binabu usok yanam mana hainglipudi.
4Urana bagula libu xai maung xaung bakbagimdi bila libu xai mana Ebraham. Ung sanga oxop titia uwa mana li, Titia Urana yunga na Ebraham.”
5Binabu Aisak harua saing suka Yekop mala Mesopotemia rangua Leban, Betuel garang luba, ina Aram tela. Leban, Rebeka raxuyanoa, Iso Yekop tang bauding.
6Iso lungu ba Aisak sina guxama na Yekop saing suka mala Mesopotemia bu yau haing tela la ba. Ina xabia ba Aisak xusunga Urana ba libu xai mana Yekop. Bala Yekop ba, “Labu uyau haing tela Kenangu tai.”
7Iso xabia ba Yekop lungu linga baungtibundi saing ila Mesopotemia.
8Baing Iso xabia ba tibuna Aisak muruna mana Kenan haingdi te.
9Baing ila rangua Ismail bakbaginoa, Ebraham garang luba, yau haing tela muli yanoa Mahalat, Ismail nanuhanginoa, Nebaiot hamunganoa.
10Yekop yunga Berseba saing ila mana titia Haran.
11Sok mana long tela, baing bungbung saing bo ba kinu, xaidaba ri baing, ta siang tela toxonia bila kandilong saing kinu.
12Bungina kinu, mip saing bagu taxak tela namua wa titia xuxunoa ila sabalunia. Urana uleginamdi dahaing diri mana mua.
13Yekop bagu Urana li haxek rangua saing harua ba, “Nga Toxoratamona sabanga Ebraham inia, xaung Aisak. Titia hatata ukinu mana li bagula ngayunga naung xaung bakbagimdi.
14Bakbagimdi bing disok xumana bila gagapdi titia. Bu duxuduxang long longgalo, rubing karaga, yuwaxa, kanggua xaung bukang. Binabu lipu titiamdi duxusunga nga ba ngasina guxamanoa bila ngalibu maung xaung bakbagimdi ba.
15Ulungu, ngawasa maung mana longlonga ula mana bing ngaxapkung muli ma mana titia li muli. Nga sanga ngayungaung tate, ngalibu baraxinta ngabalaung manadi ba disup to.”
16Yekop mesa kinungia saing harua ba, “Nga ngaxabia ba Toxoratamona wa la li te. Ne maxung sibuna ina wau.”
17Maxuwa saing harua ba, “Nga maxuwa longga li. La li Urana numanoa. Tauna, xalu sabalunam.”
18Baing Yekop mesa buraraging sibuna, saing xap siang kandilonga ba saing rang bu mogu mogunga iti hatuminganoa. Matu guxenga etua mana sianga bu mogu ba Urana inia.
19Uxu longga ba Betel. Waleu duxu longga ba titia Lus.
20Yekop harua haringina na Urana bila li, “Sanga uwasa manga mala long hasoya bu xulenga anginga xaung imang.
21Nabu ngala ngasok tibugu yabania bing usok Toxoratamona Urana ngayua.
22Sianga ngarang mali, mogu longga ba numama. Xalaxaladi uyungadi nanga, nga sanga ngautudi 10 bu ngasina hataina naung.”
