1Yosep usinga sibuna saing bo ba tang. Binabu wagi lipuxing oxatamdi saing baladi ba, “Ang longga asok sabasabia.” Baing ing ganina wa rangua kixingindi numa lunia. Baing baladi ba, “Nga Yosep sabangaima.”
2Yosep tang sabanga sibuna laing Isip dilungu. Baing dila dibaxanga na bakbakka duwa xaitamoxi numania mana axa baguba.
3Baing Yosep bala kixingindi ba, “Nga Yosep. Tibugu wa xaiyu?” Baing kixingindi dihixi mana saing dahaxuya haruanga tela te.
4Tauna Yosep harua muli ba, “Ama haxek manga.” Baing dila haxek mana saing baladi ba, “Nga Yosep, sabangaima. Waleu ayunga nga saing lipu sianggamdi digim nga bila lipu oxata olanggam, saing daxap nga ma Isip.
5Binabu hatata labu gamoimdi mauxading xaung gamoim didoa mana kubolua alibu mangau tai. Tegu. Urana ing sibuna soxi nga ma muga mang, bu nga hauliang. Nam amati.
6Gesaga sok niani luwa mana titia baguli sup lo. Ne niani luwadi luwadi hiliadinga duwauyu, sanga mana lipu daxap anginga umangia te.
7Urana soxi nga ma muga mang bu ngahauliang, nam amati. Namua na tongtongia kubolu xang tela ba xapkang.
8“Binabu ang gasoxi nga ba ngama mana longga baguli te. Tegu. Urana ing sibuna soxi nga saing ngama. Baing libu nga, ngasok tibuna mana xaitamoxi Isipkama. Ngawasa mana lipu longga duwa numania, saing ngasok lipu toxona mana titi longga Isip.
9Binabu uragu tai uma sap rangua nga.
10Bagula urung mana longga Gosen haxek sibuna manga. Ung xaung garamdi, xaung garam ranggindi. Ang bagula arung mana longga baguba. Xaung sipsip, meme, bulmakau xaung xalingim longgalo.
11Uma urung Gosen bu ngawasa maung. Mana bungina gesak sabangua wa niani luwadi luwadi hiliadinga muli, ne nga murugu ba ung xaung sibimdi xaung asaxamdi gesagidingu tai.”
12Baing Yosep bala kixingindi muli ba, “Ang longgalo bing axabia nga. Nga lipu xan tela te saing ngaharua nang. Tegu. Nga Yosep naga. Ne Benyamin ung kixingigu sibuna. Ung xauna uxabia nga.
13Ala bu abaxanga na tibugu bila li, ‘Ngaxap titinga sabanga sibuna mana longga Isip.’ Xaung abala mana axamang longga abagudi. Tauna ala sap bu axap ma.”
14Yosep harua laing sup, baing tuxu kixinginoa Benyamin saing tang. Baing Benyamin xauna tang.
15Baing Yosep tuxu kixinging longgalo saing tangiadi xaung libudi. Baing hata sibuna li kixingindi duxunumia ba ding sanga mana daharua rangua.
16Xaitamoxi lungu ba Yosep kixingindi dima duwa rangua, binabu gabu lipuxing oxatamdi diyaha sibuna.
17Baing xaitamoxi bala Yosep ba, “Ubala kixingimdi ba daxauxau donkidingdi bu dila muli mana titia Kenan.
18Bu daxap tibuding xaung sibidingdi, bu dima muli rangua nga. Baing bagula ngamogu titi hataing xai sibung tela mana longga Isip, bu ngasina nadi. Titia baguba bagula xap saxi anginga xumang sibuna bu daxang.
19“Ubaladi ba daxap karisdi xauna mala, bu daxap hainidingdi xaung garadingdi ma. Xaung ubaladi daxap tibuding xauna ma.
20Labu dahatum xumana mana axadi diyungadi mana titia Kenangu tai. Namua na bagula ngasina axamang xai sibundi mana titia Isip nadi.”
21Yekop garang lupdi dilibu bila xaitamoxi harua ba. Baing Yosep su mana xaitamoxi haruanganoa saing sina karis teladi nadi. Xaung sina anginga teladi nadi ba haulidi daxangia.
22Xaung sina imangdi na ding taining tainina. Ne mana Benyamin bing sina imang luwadi luwadi hiliadinga xaung 300 siang silba na.
23Baing Yosep xap axamang xumana xai sibundi mana longga Isip saing tadi mana donki 10 monindi saing sinadi mala na tibuna. Xaung xap haidanga xaung salanga xaung anginga xangxana saing tadi mana donki hagaxang 10 saing sinadi mala ba dahauli tibuna daxangia.
24Yosep soxi kixingindi mala saing baladi ba, “Ala bing agamia liwe manggu tai.”
25Tauna kixingindi diyunga Isip saing dila disok rangua tibuding Yekop mana titia Kenan.
26Baing dibala tibuding bila li: “Yosep mati te. Tegu. Ina wauyu, saing hatata ina wasa mana longga Isip.” Yekop lungu haruanga baguba baing hatuminganoa rangaxak. Xaung hatum haringina mana haruangadingdi te.
27Tauna dibaxanga na mana axamang longga Yosep harua nadi mana ba. Baing Yekop bagu karisiadi Yosep sinadi ma ba daxap mala Isip. Baing hatuminganoa xai muli.
28Tauna Yekop harua ba, “Maxung sibuna, hatata ngaxabia garagua Yosep wauyu. Ngala sap Isip bu nga bagu, nam ngamati.”
