1Adam kinu rangua haininoa Ip baing gamona saing hayau gara lup tela. Baing harua ba, “Toxoratamona hauli nga ngaxap gara lup tela.” Binabu uxu ba Ken.
2Kimuya hayau kixinginoa Ebal. Tang ditubu baing Ebal sok lipu sipsip wasanganama, saing Ken sok lipu umangam.
3Kimuya Ken xap anginga teladi umangia, saing xap ma hanania mala rangua Toxoratamona.
4Ne Ebal ung sipsibing matuau oranam teladi, saing xap ma hanania mala rangua Toxoratamona. Toxoratamona yaha mana Ebal xaung hananianganoa,
5ne yaha mana Ken xaung hananianganoa te. Binabu Ken atin disala sibuna saing ramramonoa haring.
6Baing Toxoratamona bala Ken ba, “Baruta atim disala xaung ramramoma haring?”
7Nabu ulibu xai, bing uyaha namua na nganai mana hananiangama. Ne nabu ulibu xai te bing kubolu diana xauxau ba hanggalangiaung. Bo ba xapkung, ne uharing bu udali.
8Xaidap tela Ken bala kixinginoa Ebal ba, “Tala raxangia.” Ne bungina tang duwa raxangia Ken taha kixinginoa Ebal mati.
9Baing Toxoratamona xusunga Ken ba, “Kixingima Ebal kabi?” Baing haxuya na ba, “Ngaxabia te. Baruta? Nga kixingigua lipuxing wasangama?”
10Binabu Toxoratamona harua ba, “Uraxata bila ba? Ulungu to! Kixingima sibinoa tang ma rangua nga mua titia.
11Kixingima mati rimamia, titia xaxaina saing nung sibunoa, binabu hatata uwa guxam diania titia sanga mana ulibu oxata umangama muli te.
12Bungina uwaxata umanga, bagula titi oran te saing angingadi sanga disok te. Bagula yabam te saing usok lipu haxahaxangam.”
13Ken harua na Toxoratamona ba, “Salaga usina tubu buk manga.
14Laku, hatata usuka nga sangua titia saing bagula ngawa hasoya mana ramramoma. Bagula yabagu te saing ngasok lipu haxahaxangam titia. Lipu gaxarea sok manga bagula ung nga mati.”
15Binabu Toxoratamona bala ba, “Tegu! Nabu lipu tela ung Ken, bing bagula ngasina salak sabanga na sanga mana bunging 7.” Baing Toxoratamona mogu Ken, nam lipu tela sok mana bu ung mati.
16Binabu Ken yunga Toxoratamona saing ila wa mana titia Nod. Titia ba wa Iden sanga karagia.
17Ken kinu rangua haininoa baing gamona saing hayau gara lup tela, yanoa Enok.
18Baing Enok haininoa hayau gara lup tela, yanoa Irat. Baing bila balau Irat garanoa Mehuyael, saing Mehuyael garanoa Metusael, saing Metusael garanoa Lamek.
19Lamek yau haing luwa. Tela yanoa Ada ne tela Sila.
20Ada hayau Yabal. Yabal bing lipuadi duwasa mana bulmakaudi saing duwa mana numa mokiamdi mugangadinga.
21Kixinginoa yanoa Yubal. Yubal bing lipuadi dahali hap xaung diyup panggeriang mugangadinga.
22Sila xauna hayau gara lup tela, yanoa Tubal-Ken, tongtongia axamang oxatamdi bras xaung ain. Tubal-Ken hamunganoa Nama.
23Lamek harua na hainindi ba, “Ada Sila, tang galungu nga to, hainigudi alungu haruangagua to. Ngaung lipu tela namua na taha nga, Gananung tela uda nga, binabu ngataha mati.
24Nabu lipu tela ung Ken bing xap salaga sanga mana bunging 7, ne ngaharua ba, nabu lipu tela ung nga, bing xap salaga sanga mana bunging 77.”
25Adam kinu muli rangua haininoa, baing hayau gara lup tela. Harua ba, “Urana sina gara tela muli nanga ba xap Ebal yabanoa, namua na Ken ung mati.” Binabu uxu ba Set.
26Set xauna garanoa, saing uxu ba Enos. Mana bungina baguba lipudi dungguti duxu Toxoratamona yanoa, disabu mana.
