1Yekop ila sok mana hainglipudi mana longa xaidaba haing.
2Li saing bagu sipsip bakbak tuwa dikinuʼm tabu mana lang banggumgamga ba rubinia. Namua na ding duwa la ba bu dinung lang la ba. Siang sabanga ribauti bangguma.
3Bungina sipsipdi dima digugunia lipu oxatamdi daxaxa xalua bu dinung lang. Dinung masup bing diriba sianga muli.
4Baing Yekop xusunga lipu oxatamdi ba, “Riagu mana, ang bilamdi?” Dahaxuya ba am longga Haran.
5Baing xusungadi mana Leban, Naho garanoa. Daharua ba, “Am gaxabia.”
6Yekop xusungadi ba, “Leban wa xaiyu?” Dahaxuya ba, “Wa xaiyu. Ubagu nanuhanginoa ma xaung Leban sipsibindi.”
7Yekop harua ba, “Baruta xaidaba lia wauyu, ba ata sipsipdi muli gamgamingia. Asina lang bu dinung bing xapdi mala bu daxang tatubang.”
8Baing lipu oxatamdi daharua ba, “Tegu, am sanga am galibu bila te. Sipsip longga digugunia to, binabu taxaxa sianga bing dinung langga ba.”
9Yekop haxengia rangua lipu oxatamdi mua, baing Retsel sok xaung tibuna sipsibindi, namua na ina wasa manadi.
10Yekop bagu Retsel xaung ninoa Leban sipsibindi dila mana lang banggumgamga ba dinung.
11Baing Yekop libu Retsel saing tang.
12Baing bala Retsel ba Rebeka garanoa, tibuna hamunganoa. Retsel luki saing bala tibuna.
13Leban lungu haruanga rangua hamunganoa garanoa ma, saing luki mala rangua. Leban tuxu Yekop saing yaha libu, saing xap mala numia. Yekop naxuya na Leban baraxinta sok mana.
14Leban bala ba, “Maxung sibuna kitam sip tainina.” Yekop wa rangua laing sobak tela.
15Leban bala Yekop ba, “Ung nga toxongogua, ung sanga oxata olang te. Ubala nga murum ba oxop giminak baru.”
16Leban nanuhanging luwa Lea xaung Retsel.
17Lea maxandi xai sibundi, ne Retsel haing xai sibuna, dali Lea.
18Yekop muruna mana Retsel saing bala Leban ba waxata mana niani 7 disup to bing yau Retsel.
19Baing Leban harua ba, “Nabu ngasina naung, kimbo ngasina na bakbak teladi tate, bing uwa rangua nga.”
20Yekop waxata niani 7 ba yau Retsel. Yekop baguba nianindi axamang olang bila xaidap tuwa kimbo luwadi luwadi. Namua na murung sibuna mana Retsel.
21Niani 7 disup, baing Yekop bala Leban ba, “Xaidap maxana sup. Usina nanuhangima, bu ngayua.”
22Baing Leban tau anginga sabanga saing wagi hainglipudi dima bu daxang.
23Mana yambonga ba Leban xap Lea mala mana longa Yekop kinu mana ba saing kinu rangua.
24Leban yunga haing oxatam tela rangua Lea yanoa Silpa.
25Buraraging saing Yekop hixi ba bagu Lea kinu rangua, Retsel te. Ila bala Leban ba, “Baruta ning ulibu bila ba manga? Ngawaxata ba ngayau Retsel. Baruta ning ulangua nga?”
26Leban harua ba, “Kubolumama bila li. Nanuhangimam matuaua bagula diyau muga to, kimuama diyau kimu.
27Uwa sanga Sande tela sup to, bu anginga yaungam disup to. Kimuya am gayunga Retsel naung. Ne ung sanga waxata niani 7 muli.”
28Yekop yaha mana haruanga ba. Bungina yahanga angiandi disup, Leban yunga Retsel na Yekop sok haininoa.
29Leban yunga haing oxatam tela na Retsel yanoa Bilha.
30Baing kinu rangua Retsel, murung sibuna mana Retsel, ne muruna mana Lea buk te. Yekop waxata niani 7 muli rangua Leban.
31Toxoratamona baguba Yekop muruna mana Lea buk te, baing hauli Lea ba gamona. Ne Retsel gamona te.
32Kimuya Lea hayau gara lup tela. Lea harua ba, “Toxoratamona bagu mauxangagu baing, hatata ayuagu muruna manga.” Baing uxu gara yanoa Ruben.
33Kimuya gamona muli saing hayau gara lup tela muli, yanoa Simion.
34Baing Lea gamona muli saing hayau gara lup tela muli yanoa Libai.
35Baing Lea gamona muli saing hayau gara lup tela muli saing harua ba, “Hatata ngaiti Toxoratamona yanoa.” Kimuya uxu gara yanoa Yuda. Kimuya Lea sup mana hayauxingua.
