1Bunging maxaxaya monga baing lipua wasaʼm wain lipu toxona inia, xaung lipua wasa mana salanga numana lipu toxona inia, dingtang dilibu axamang tela lipu toxona Isipkama muruna mana te.
2Lipu toxona Isipkama gamia lipuxing oxatam luwadi.
3Saing ina ta dingtang salagia mana kepten lipu haungingam ina wasa mana lipu toxona numania. Ala baguli numa bagu dita Yosep mana ba,
4baing kepten mogu Yosep ba wasa mana dingtang. Tang duwa bunging maxaxaya salak yabania.
5Mana yambong tela, lipua wasaʼm wain lipu toxona inia saing lipua wasa mana numa salangam lipu toxona inia, tang dimip. Tang dibagu mibinga xangxana saing tang mibingading namudi xangxana.
6Bungina Yosep ma bagu dingtang buraragina, ina baguba, dingtang daxap usinganga sabanga.
7Baing ina xusunga dingtang ba, “Baraxinta libuang ning axap hatuminga xumang sibuna?”
8Baing dingtang dahaxuya haruanga na ba, “Amtam gamip. Saing lipu tela la li sanga mana balam mana amtam mibingamam namudi te.” Baing Yosep bala dingtang ba, “Urana ing ganina hatanga mibinga namudi nakira. Tauna angtang ngabaxanga tang mibingamdi nanga.”
9Tauna lipua wasa mana wain lipu toxona inia ina baxanga mibinganoa. Ina harua ba, “Mana mibingagua nga, ngabagu xai wain.
10Xaiya baguli rimang tuwa londi disok saing hata sibuna li baing oxan disok, saing aningona saing dimoya masup.
11Nga ngatuxu lipu Isipkam xubanoa. Tauna nga ngaxap wain marandi saing ngayukiyukidi rimagia. Tauna langidinga ri xubia saing ngasina na lipu toxona.”
12Tauna Yosep harua ba, “Mibingama namuxinoa bing bila. Xai rimang tuwa mogu xaidap tuwa.
13Xaidap tuwa dila disup saing bagula lipu toxona xapkung mala muli. Saing bagula ina taung mana oxatama muli. Saing bagula usina xuba wainggam na lipu toxona muli bila waleu ung ba ulibu bungina uwa lipu wasangam mana umanga wain inia.
14Saing bungina uwa xai masup, laku, ung bing uhatum manga. Ung bing usinga nga saing uharua na lipu toxona bu yunga mana salaga.
15Muga sibuna lipudi dahanai nga mana Hibrudi titidinga, saing daxap mama la li. Saing bungina ngawa Isip, nga ngalibu kubolu dian tela te. Ne ding dita nga olang salagia.”
16Lipua wasa mana salanga numanoa lungu lipua wasa mana wain mibingang namuxina mibinganoa, ina xai, baing ina bala Yosep ba, “Nga xauna nga ngamip, mibingagua bing bila, ngangaxuru daba tuwa toxogia saing salanga dibaxagi mana dabadi.
17Daba wa etua baxagi mana salanga xaung bisket axalaxaladi lipu toxona muruna manadi. Ne mang dima daxang salanga axalaxaladi.”
18Baing Yosep harua ba, “Mibinga baguli namuxinoa bila. Daba tuwa bing mogu ba xaidap tuwa.
19Xaidap tuwa disup teguyu saing bagula lipu toxona xapkung mala sabasabia mana numa salak yabanama saing bagula ina bala lipu haungingamdi bu ditaxiti waxumtuanoa. Saing bagula dingelia sanggama mari mana tuxa tela, baing bagula mang dima daxang sanggama.”
20Tauna mana xaidap hiliana lipu toxona Isipkam ina tongtongia taunga sabanga mana ofisa iniadi, mana hatumia xaidapka bauna hayau, saing ina xap mala lipua wasa mana wain xaung lipua wasa mana salanga numanoa saing rang dingtang mali ofisa iniadi maxadingia.
21Saing ina bala lipua wasa mana wain ba ila muli mana oxatanoa.
22Ne lipu toxona bala haungingamdi saing dingelia lipu wasa mana salanga numanoa sangganoa mari mana tuxa tela. Axadi bagudi li disok maxung sibuna bila Yosep harua mana bungina baxanga tang mibingading namuxidingdi.
23Ne lipua wasa mana wain lipu toxona inia, ina hatumia Yosep muli te. Ina halingalinga sibuna.
