Text copied!
CopyCompare
Urana Xuana - Unggutinga (Stat)

Unggutinga (Stat) 9

Help us?
Click on verse(s) to share them!
1Baing Urana sina guxama na Noa xaung garandi, harua ba, “Ahayau xumana bu abaxagi titia.
2Maxuwangua bagula xap asaxa longgalo bu dimaxuwang. Asaxa abunging nangnang longgalo, mang sabalunam longgalo, xaung song tekkam longgalo bagula dimaxuwang. Ngatadi rimaimia.
3Axamang walingam longgalo, axamandi dahaing xaung axamandi dahaxa, ding longgalo bagula duwa bila angiaimdi. Bila muga ngasina xauyangadi nang, hatata ngasina axamang longgalo nang.
4“Ning labu axang asaxa mututungang sibinamgu tai. Siba bing walinga namu.
5Baing nabu asaxa tela, kimbo lipu tela unggang mati, bing bagula ngata haruangia mana kubolunoa. Maxuna, nabu lipu tela taha tela mati, bing bagula ngata haruangia, ngasina salaga na mana kubolunoa.
6“Lipu gaxarea ung lipu tela mati, ing sibuna bagula mati lipudi rimadingia, namua na Urana tongtongia lipudi bila ing sibuna.”
7Ne ang ba, ahayau xumana bu abaxagi mana titi longgalo.”
8Baing harua na Noa gabu garandi ba,
9“Alungu to. Hatata ngahau haruangua ranguang xaung garaimdi disok kimuya,
10xaung axamang walingam longgalo duwa ranguang—mangdi, asaxa nangnangdi abungindi, adi disok sangua wagua ranguang—axamang walingam longgalo duwa titia.
11Ngahau haruangua ranguang bila li: Sanga ba axamang walingam longgalo dimati silingia muli te. Sanga ba silinga tela muli sok ba hanggalangia titia te.”
12Baing Urana harua ba, “La li mogunga mana haruangua ngahau liwe makira xaung liwe mana axamang walingam longgalo duwa ranguang. Haruanga li bagula wa rangua lipu longgalo mana mari sabangga lo.
13Ngata moxa babuna sabalunia, saing bagula wa mogunga mana haruangua ngahau liwe manga xaung axamang titiamdi.
14Bunging bungina ngalibu mugapdi disok sabalunia, bing moxa babuna bagula sok xauna,
15saing bagula ngahatumia muli haruangua ngahau liwe manga xaung mang xaung axamang walingam xangxang longgalo. Baing ina naga, sanga ba silingua sok bu hanggalangia axamang walingamdi muli te.
16Bunging bungina moxa babuna sok sabalunia, bagula ngabagu saing ngahatumia muli haruangua ngahau wa bungingbunginalo liwe mana Urana xaung axamang walingam xangxang longgalo duwa titia.”
17Baing Urana harua na Noa ba, “Alali mogungua mana haruangua ngahau liwe manga xaung mana axamang walingam longgalo duwa titia.”
18Noa garang tuwa disok sangua wagua yadingdi bing Siem, Ham xaung Yapet. (Ham bing Kenan tibuna.)

19Gara tuwadi ba Noa garandi, saing lipu longgalo etua mana titia li disok mana dingtung.
20Noa lipu umangam, ina lipu mugamugangam mana xuma wain umanganoa.
21Bunging tela nung wain saing kakahana. Baing kinu mulang maluxu xahinia.
22Baing Ham, Kenan tibuna, bagu kinu mulang, binabu sok mala saing baxanga na sabanganoa xaung kixinginoa.
23Saking Siem Yapet tang daxap imanga saing doxoxi disui ubudingia mala moki numania ba daxabubua tibuding. Bungina dilibu bila ba, dibagu halianga bu dibagu wa mulang te.
24Bungina Noa mesa hatuminganoa sok xai muli, lungu ba garang kimuama libu baru mana,
25harua ba, “Guxam diana wa etua mana Kenan! Bagula wa lipu oxata olanggam sibuna mana sabangandi.”
26Baing harua xauna ba, “Taiti Urana Yanoa, Toxoratamona Siem inia! Kenan bagula wa lipu oxata olanggam mana.
27Ngaxusunga Urana ba libu titinoa tubu. Ngaxusunga ba Yapetdi dirung xai rangua Siem bakbagindi, Kenan bagula wa lipu oxata olanggam mana.”
28Kimuya mana silingua Noa wa niani 350.
29Noa nianindi disok 950, baing mati.