1Daxang laing sup baing Yosep bala lipu oxatamga wasaʼm numanoa ba, “Ugamgam anginga mana lipuadi bagudi li tangadingdi laing dibaxagi sibuna. Xaung uta siang mana tanga taining tainina.
2Xaung oxop xubagua saing ugam maluxu mana kixingiding sibunoa tanganoa. Xaung sianga xap ma ba kim haidanga mana ba.” Baing lipu oxatama libu bila Yosep harua ba.
3Tauna buraraging sibuna lipu oxatamdi disoxidi mala xaung donki dingiadi.
4Disauya long sabangga ba mala hasoya teguyu baing Yosep bala lipu oxatamga wasa mana numanoa ba, “Umesa bu ususu mana lipuadi ba. Bungina usok manadi bing uxusungadi ba, ‘Am galibu kubolu xai mang. Ne baruta alibu kubolu diana mam?
5Xuba axap ba bungingbunginalo yanamigua nung mana xaung tuxu mana xap xabianga mana axamang duwa hisangia. Alibu kubolu diang sibuna.’ ”
6Tauna bungina lipu oxatama su manadi laing sok manadi baing baxanga haruanga Yosep harua na mana ba.
7Baing dahaxuya ba, “Lipu sabanga baruta ulibu haruanga na bila ba mam? Am sanga ba am galibu kubolua na bila uharua ba te.
8Uxabia ba bungina am gayunga titia Kenan saing am gama am gabaguang bunging luwa, baing am gaxap siangadi duwa maluxu tangamamia ma muli. Ne baruta uhatum ba am gahanai silba xaung gol yanamima numania?
9Lipu sabanga nabu ubagu amia tela tuxu xuba baguba, tauna ung lipua baguba mati. Baing am longgalo bing am gasok lipu oxata olanggam maung.”
10Tauna lipu oxatama haxuya ba, “Haruangaima maring. Ne nabu ngabagu angia tela tuxu xuba baguli, lipu ata baguba bagula sok lipu oxata olanggam manga. Ang teladi bagula ala.”
11Binabu hata sibuna li dita tangadingdi titia saing daxaxadi.
12Baing Yosep lipuxing oxatama wasa tangadingdi, ungguti mana sabangadinga laing sup mana kixingidinga. Baing bagu xuba baguba wa mana Benyamin tanganoa.
13Bungina sabangandi dibagu xuba baguba wa, dising imangidingdi ba hatanga usingangadingdi. Baing dita tangadingdi mahaing muli mana donkidi saing digoxoya mala muli long sabangia.
14Tauna Yuda gabu sabangandi disok Yosep numania baing dibagu ing sibuna wa. Baing dimaxuwa haringing sibuna, saing xungdi mari titia Yosep maxania.
15baing Yosep baladi ba, “Alibu baru kubolunta? Bola axabia te, ngaxabia baraxinta wa hisangia?”
16Baing Yuda harua ba, “Lipu sabanga am haruanga te ba am gahaxuya naung. Am galibu kubolu dianoa ba. Urana hatanga kubolumam dianoa ba. Ne lipu sabanga, labu lipu ata xap xubama usok lipu oxata olanggam maunggu tai. Am longgalo xauna.”
17Baing Yosep harua ba, “Tegu sibuna. Nga sanga ba ngayungang bu alibu bila ba te. Lipu ata hanai xubagua ing ganina bagula sok lipu oxata olanggam manga. Ne ang teladi bing gamoim duwa mosiu bu agoxoya mala muli rangua tibuim. Nga haruanga mang te.”
18Tauna Yuda ila haxek rangua Yosep, saing harua ba, “Si, lipu sabanga ulungu haruangagua. Ung lipu sabanga sibuna bila xaitamoxi Isipkama. Ne labu ugamia ngau tai.
19Waleu uxusungam ba, ‘Ang kixingim xaung tibuim duwa kimbo tegu?’
20Baing am gaharua ba, ‘Wane, am tibumamga ina wa duanga ba, xaung kixingimam tela xauna. Bauwa hayau bungina tibugu wa duanga. Bauwa hayau gara luwa, ne gara baguba sabangang sibunoa mati ba. Ing ganina wa binabu tibugu muruna sibuna mana.’
21“Xauna lipu sabanga uharua nam xauna bila li: ‘Axap kixingima ma bu ngabagu.’
22Baing am gahaxuya haruangama bila li: ‘Gara baguba sanga sauya tibumam te. Nabu sauya tibumam bagula tibumam mati.’
23Ne kimuya uharua xauna bila li: ‘Nabu kixingim sibunoa ma ranguang te, labu asok muli maxagiau tai.’
24Lipu sabanga, binabu am gagoxoya mala rangua tibumam saing am gabaxanga na mana haruangamdi.
25“Baing kimuya tibumam balam ba, ‘Ala muli bu agim anginga nakira.
26Baing am gaharua ba am sanga am gala te. Nabu kixingimam sibunoa mala ranguam te, lipua baguba sanga ba baguam muli te. Ne nabu kixingimam sibunoa mala ranguam, tauna am bagula am gala.’
27“Baing tibumam balam ba, ‘Ang gaxabia ba hainigua hayau gara lup luwa.
28Tela hanggalang ba, saing ngabagu muli te. Bola layon tela ung mati.
29Ne hatata abo ba axap tela mala hasoya manga. Nabu xap doa daxangia bagula asina usinganga sabanga sibuna naga. Baing bagula ngala mana matiadi yabadinga.’
30“Lipu sabanga, nabu ngagoxoya mala rangua tibugu, bu tibugu bagu gara li ma rangua nga te. Tauna bagula mati, namua na gara li bing tibugu ating sibundi. Tibumam wa duanga sibuna. Nabu am gaxap gara li mala muli ranguam te, tauna bagula am gasina usinganga sabanga sibuna na tibumam, saing bagula mati.
32Xaung ngaharingia haruangua rangua tibugu bila, ‘Nabu ngaxap gara bagu li mala muli rangua te, bing ngalibu mauxangang sabangua mana tibugu. Baing mauxangana baguba bagula wa manga bungingbunginalo.’
33“Binabu ngabo tai uyunga nga bu nga gara li yabanoa. Bu ngawa la li bila lipu oxata olanggam maung. Si uyunga bu ila muli rangua sabangadi.
34Nabu gara baguli mala muli rangua nga te, tauna nga bagula ngala muli rangua tibugu te. Labu ngabagu mauxangana baguli sok mana tibugu tai.”
