1Kimuya Urana tuba Ebraham. Wagi mana saing harua ba, “Ebraham!” Ebraham nai saing bo ba, “Ngawau.”
2Baing Urana harua ba, “Ung garam taininau, Aisak, murum sibuna mana. Oxop gara li mala mana rubina Moraya, bu ngahatanga bimbi tela naung, mana bimbi yaba ung bagula usina Aisak nanga bila ofa yapkam bu tau masup.”
3Baing buraraging singa Ebraham xap donki xaung Aisak digabu lipuxing luwadi xauna dila saing dilua xai ba ditau ofa, dilaʼm longa Urana bala mana ba.
4Baing xaidap tuwa Ebraham bagu longa wa hasoyauyu.
5Baing bala lipuxing luwadi ba, “Awasa mana donki la li, ngala xaung garua bu tam gasabu, kimuya tam gama muli.”
6Ebraham sina xaidi na Aisak saing xoridi, Ebraham ina rai yap xaung waxang saing tang dila.
7Bungina tang dila Aisak xusunga tibuna mana baraxinta tang dilibu mana ditau ofa.
8Tibuna bala ba, “Urana bagula sina sipsip garang tela bu tatau ofa.” Baing tang dahaxa mala.
9Tang disok mana longga Urana harua mana ba, baing Ebraham tongtongia alta saing ta xai taungamdi etua mana, baing goxi garanoa Aisak waxwia. Saing ta mahaing xai taungamdi altaya.
10Saking Ebraham xap waxang saing bo ba ung garua.
11Baing Urana uleginama wagi ba, “Ebraham! Ebraham!” Saking Ebraham haxuya ba, “Ngawau.”
12Baing uleginama harua ba, “Labu ung garuau tai. Labu ulibu axamang tela manau tai. Ung garam taininau ung gusaxangia te. Tegu. Ung guxabia ba usina na Urana. Ne ngaxabia baing, ung lipu uwa hawa mana Urana.”
13Baing Ebraham bagu muli ubunia bagu sipsip monin tela, salamindi digasi mana xai kaxukan tela. Baing ila saing xap ma ung saing tau mahaing yabia bila ofa. Sipsipka baguli xap Aisak yabanoa.
14Baing Ebraham xu longa ba, Urana Sina. Ne kimuya ma hatata li, lipu duxu longa ba, “Urana sina na bimbixinua.”
15Baing uleginama wagi Ebraham muli saing harua ba,
16“Nga Urana, ngaharua maxung sibuna mana nga yagua bila li. Ung garam taininau ne xusangia te.
17Binabu ngalibu xai sibuna mang, bu bakbagimdi disok xumana bila hatungdi disok sabalunia xaung ulangulangdi tegia. Bing kimuya didali bixuadi bu daxap longdi.
18Ne bagula lipudi duxusunga nga ba ngasina guxama nadi bila ngasina na bakbagimdi ba, namua na unaxu mana xusungangagua.”
19Baing Ebraham xap Aisak saing tang dila muli rangua lipuxing oxatam luwadi, saing dila muli Berseba. Baing Ebraham wa long moxona Berseba.
20Kimuya Ebraham lungu ba Milka hayau gara teladi. Milka Naho haininoa, ne Naho Ebraham sabanganoa.
21Garadi yadingdi, Us matuaua ne Bus xaung Kemuel tibuding Aram.
22Ne Keset, Haso, Pildos, Ditlap, Betuel.
23Betuel Rebeka tibuna. Milka Naho tang garadingdi 8 lup tondi. Ebraham sabanganoa.
24Naho haining kimuama, yanoa Reuma, ina hayau Teba, Gaham, Tahas xaung Maka.
