1Bungina Retsel baguba hayau te, gamona doa mana riang sabangua saing bala Yekop ba, “Usina gara nanga. Tegu baing ngamati.”
2Baing Yekop gamia Retsel saing harua ba, “Urana ing sibuna riba gamoma ba uhayau gara. Nga Urana te ba ngasina gara naung.”
3Retsel harua ba, “Oxop Bilha hainga tuxu oxatagua. Ukinu rangua bu hayau gara tela nanga. Bu ngasok bila gara bauna.”
4Baing Retsel xap Bilha haing oxatama saing yunga na Yekop sok bila haininoa. Saing Yekop kinu rangua.
5Bilha gamona saing hayau gara lup tela na Yekop.
6Retsel harua ba, “Urana suxuya nga saing sanga mana kubolugudi. Lungu sabungagua saing sina gara lup tela nanga.” Retsel uxu yanoa Dan.
7Bilha gamona muli saing hayau gara lup tela mana Yekop.
8Retsel harua ba, “Ngahaung rangua riagu sabanga saing ngadali baing.” Saing uxu gara yanoa Naptali.
9Lea baguba sanga hayau muli te, saing yunga haing oxatama Silpa na Yekop, bu sok bila haininoa.
10Silpa hayau gara lup tela na Yekop.
11Lea harua ba, “Ngadali baing.” Saing uxu gara yanoa Gad.
12Kimuya Silpa hayau gara lup tela muli mana Yekop.
13Lea harua ba, “Hatata ngayaha sibuna, haing longga daharua ba, ‘Nga haing yahangam.’ ” Saing uxu gara yanoa Asa.
14Baing bunging wit taxinganam Ruben ila umangia saing bagu haidanga tela wa daxap marandi saing ditongtongia. Xap marandi mala rangua bauna, Lea. Baing Retsel bala Lea ba, “Ngabagu garama xap axamang teladi ma. Sanga usina teladi nanga?”
15Lea haxuya ba, “Oxop ayuagu baing, uhatum ba ala axamang olang? Saing hatata ubo oxop axadi garagua xapdi ma.” Retsel harua ba, “Nabu ulia nga bing ukinu rangua Yekop hatata yambong.”
16Bungbung Yekop goxoya ma umangia saing Lea sok mana daxangia, saing bala ba, “Ung bagula ukinu rangua nga hatata yambong. Namua na ngagimgung mana axadi garagua xapdi ma.” Baing Yekop kinu rangua.
17Baing Urana lungu Lea sabunganoa, saing Lea gamona. Hayau gara lup tela, titinga 5.
18Lea harua ba, “Ngayunga haing oxatama na ayuagu saking Urana sina giminak xaiyua nanga.” Saing uxu gara yanoa Isaka.
19Kimuya Lea hayau gara lup tela muli, titinga 6.
20Baing harua ba, “Urana sina yahanga xai nanga, hatata ayuagua iti yagua, namua na ngahayau gara 6.” Saing uxu gara titinga 6 yanoa Sebulan.
21Kimuya Lea hayau haing nanung tela yanoa Daina.
22Urana hatumia Retsel mana sabunganoa, saing bo ba libu Retsel bu hayau gara.
23Retsel gamona saing hayau gara lup tela, saing harua ba, “Urana sahi mauxangagudi saing sanga memeyagu muli te.
24Ngabo Urana sina gara lup tela nanga.” Saing uxu gara yanoa Yosep.
25Retsel hayau Yosep, baing Yekop bala Leban ba, “Ngalibu oxata xumana ba ngagim hainggadi li xaung garadi li. Sanga uyunga nga bu ngala muli titigia. Uxabia ba ngalibu xai sibuna mana oxatamdi.”
27Leban haxuya ba, “Sanga ngabalaung mana axamang tela te. Ngalibu kubolu sanga ngasok mana Urana hatuminganoa, saing ngasok mana bila li, Urana libu xai manga, namua na uwa rangua nga.”
28Leban harua muli ba, “Uharua maringina giminak baru sanga oxop. Binabu sanga ngasina naung.”
29Yekop harua ba, “Ung guxabia oxata ngalibu maung ngawasa mana sipsibimdi saing disok xumana.
30Waleu sipsibindi xumang te. Tegu. Bakbak xumang te. Hatata ngawa ranguaung saing sipsibimdi disok xumang sibuna, namua na Urana libu xai mana oxatagudi saing libu xai maung. Ne hatata nga murugu sibuna mana nga sibugu ngayuadi.”
31Leban xusunga Yekop ba, “Raxata ngasina naung ba oxatama giminaginoa?” Yekop haxuya ba, “Sanga ngaxap siang te. Na murum mana hatumingagua bing ngawasa mana sipsibimdi muli. Hatumingagua bila li.
32Hatata ngala ngasuxuya sipsip xaung meme mutuxundi xaung mugixigixingdi bu ngaxapdi bila giminagigua.
33Kimuya murum, sanga ubagu sipsip xaung meme ngaxapdi bila giminagigua, bu uxabia, nganaxu mana haruangagua kimbo tegu. Nabu ubagu meme xaung sipsip mugixigixing xaung mutuxung teladi duwa liwe mana ngayuadi bing uxabia ba ngahanaidi.”
34Leban harua ba, “Sanga talibu bila uharua ba.”
35Mana bungina ba Leban xap meme dusautiti xaung sipsip mutuxundi. Saing bala garanglupdi ba daxapdi mala mana long tela bu duwasa manadi.
36Leban ila ranguadi. Daxap sipsip xaung meme saing dahaxa laing xaidap tuwa baing disok mana long tela. Baing Yekop wasa mana Leban memendi xaung sipsibindi.
37Kimuya Yekop xap xai xangxana rimadingdi, saing suki sanggadingdi baing mugixing usamang mexewam disok.
38Baing rang xailonga rimadingdi haxek rangua xaxadi dita longa rangua, bu meme dibagu bungina dima dinung lang ina xabia, bungina meme dima dinung lang monindi bagula dahagata mana hagaxandi.
39Meme monindi dahagata mana hagaxandi haxek rangua xai rimandi, kimuya meme hagaxandi dahayau garadingdi mugixigixindi.
40Yekop yunga Leban sipsibing monindi dahagata mana hagaxandi haxek rangua meme garang mugixindi. Mana kuboluna ba ina xap sipsip xaung meme naina, ina yunga duwa rangua Leban iniadi te.
41Bungina meme xaung sipsip haringindi dibo dahagata mana hagaxandi bing dibagu xaiyadi Yekop rangdi mali lang nungingamia.
42Bungina Yekop bagudi na sanga ba dahagata mana hagaxandi te, bing hatadi mala na Leban. Yekop suxuya xaidi naina.
43Mana kuboluna ba Yekop sanga xalaxaladi, ina sanga meme xaung sipsip, xaung lipu haing oxatamdi, kamel donki xauna.
