1Isrel disiasia Yosep mala Isip saing Potipa gim bila lipu oxata olanggam. Potipa ina ba lipu tela mana Isip saing ina ofisa tela mana lipu toxona Isipkam. Ina lipu mugamugangam mana lipu haungingam ding duwasa mana Isip lipuxiding toxona numang sabangua.
2Urana wa rangua Yosep saing axalaxala longga Yosep libudi ding disok xai sibuna. Yosep waxata mana Potipa numanoa.
3Baing Potipa baguba Urana wa rangua Yosep saing Yosep libu axamang longgalo disok xai sibuna.
4Saing ina yaha sibuna mana Yosep saing ina libu Yosep sok bila mangimasta naina sibuna. Saing sina oxatua na Yosep ba wasa mana numanoa xaung xalinging longgalo.
5Mana bungina baguba Urana ungguti libu xai mana Potipa bakbagindi mana baraxinta, Yosep wa ranguadi. Urana libu xai mana xalaxala longga Potipa numania saing axalaxala long umangia xauna.
6Tauna Potipa yunga Yosep wasa mana xalinging longgalo. Saing ina xawa mana axaman tela te. Tegu. Ina hatumgu mana baraxinta ina bo ba xang. Yosep sangganoa haringing sibuna saing bagunganoa xai sibuna.
7Bing ina naga bunging maxaxaya teguyu baing Potipa haininoa muruna mana Yosep saing bala ba, “Uma ukinu rangua nga.”
8Ne Yosep muruna te saing bala ba, “Lipuxigu sabangua mogunga mana ngawasa alalaxala longga mana numa baguli, baing ina naga ina sanga ba xawa mana axamang tela tate.
9Nga sanga titinga taininau mana numa baguli bila Ing sibuna. Ina sanga ba bili nga mana axamang tela te. Tegu. Ne ina bala nga ba ngakinu ranguaung te, mana, baraxinta, ung ba ina haininoa. Baruta ning ngalibu kubolu diang sibuna? Nabu ngalibu bila ba bing ngalibu kubolu diang sibuna Urana maxania.”
10Mana xaidap longgalo hainga xusunga Yosep ba kinu rangua. Ne Yosep ina lungu haruanganoa te, saing ina kinu rangua te, saing ina ila haxek mana te.
11Mana xaidap tela Yosep luxu numia ba tuxu oxatanoa. Bungina baguba lipu oxatam tela wa te.
12Tauna hainga rangua Potipa tuxu Yosep imanging maxaxayama saing harua ba, “Uma ukinu rangua nga.” Ne Yosep yunga imanginoa hainga ba rimania saing luki mala sabasabia numia.
13Haingga ba bagu Yosep yunga imanginoa saing luki mala.
14Tauna wagi lipu oxatamdi saing baladi ba, “Abagu! Ayuagu xap Hibru lipuxin tela ma numaria saing hatata lipua li bo ba sina memeya sabanga nakira. Ina ma numa lunia rangua nga saing xusunga nga ba kinu rangua nga. Ne nga ngaxaba haringing sibuna.
15Saing bungina ina lungu ngaxaba, haxek sibuna li yunga imanginoa haxek rangua nga saing luki mala menia.”
16Baing Potipa haininoa tuxu Yosep imanginoa laing sanga mana ayuana ma sok numia.
17Saing naxuya na ayuana saing libu haruanga taininau. Ina harua ba, “Alali gananung oxata olanggamgamga mana bakbakka Hibru ung ba oxop mama numaria. Ina luxu ragugia saing bo ba libu kubolu diana manga.
18Ne nga ngaxaba haringina buk baing ina yunga imanginoa saing luki mala menia.”
19Bungina Yosep lipuxing wasangam ma lungu haruanga longga bagu haininoa baxangadi ba, baing ina gamia haring sibuna.
20Baing ina harua saing lipu haungingam dituxu Yosep saing dita salak yabania. Ding dita mana numa salak yabanamga bagu lipu toxona lipuxing salak yabanam duwa mana ba.
21Ne Toxoratamona wa rangua Yosep saing libu xai mana baing Toxoratamona muruna mana Yosep.
22Baing ina naga lipua ba ma mogu Yosep ba wasa mana lipu salak yabanam longgalo, saing Yosep wasa mana oxata longa salak yabang numania.
23Toxoratamona wa rangua Yosep saing hauli. Saing axamang longga ina libudi disok xai sibuna. Baing ina naga lipua wasa mana numa salak yabanam ina hatum mana oxatadi sinadi na Yosep ba libudi.
