1Gesaga sok Kenan sok sabanga sibuna.
2Baing bungina Yekop sibindi, yan tela Isrel disahi angingadi daxapdi Isip ba. Baing bala garandi ba dila muli Isip bu digim anginga.
3Ne Yuda bala tibuna ba, “Tibugu. Am gabalaung baing. Yanamga Isip sina haruanga haringinoa nam. Balam ba labu baguam muli tai, nabu kixingimama mala ranguam te.
4Nabu unai mana kixingimam bu mala ranguam, bing bagula am gala bu am gagim anginga naung.
5Nabu unai te bagula am gala te, namua na yanamga Isip harua ba baguam muli tai, nabu am gala xaung kixingimama te.”
6Baing Isrel harua ba, “Baruta abaxanga na yanamga ba. Kixingim te wau? Asina mauxang sabanga sibunoa nanga.”
7Baing dahaxuya ba, “Yanamga ba xusungam mana sibimamdi, harua ba, ‘Tibuim wau kimbo mati lo? Kixingim tela wa kimbo tegu?’ Ina xusunga binabu am gabaxanga na. Am gaxabia te ba ina harua ba am gaxap kixingimama mala.”
8Baing Yuda bala tibuna Isrel ba, “Uyunga Benyamin ma rangua nga bu tam gala. Binabu ung xaung garamamdi xaung am sibumam, kira longgalo tamati mana gesaga te.
9Bagula ngawasa mana. Nabu ngaxap ma muli te, bing ngahanggalangia hatumingama. Baing mauxanganoa bagula taga manga bungingbunginalo.
10Nabu usaxangiam te, am sanga mana am gala saing am gagoxoya ma bunging luwa.”
11Baing Isrel baladi ba, “Nabu daxanga tela te, tauna alibu bila li. Axap anginga mugamugam mana titia baguli. Agamdi tangia saing axapdi mala asinadi na yanamga ba bila yahanga axap axamang xai longgalo, bila bunggutop langina, baxi xangxana guxenga ditongtongia xai susunia, xaung angaxi duxu ba pistasio, xaung amon.
12Axibua siangadi waleu axapdi ma ba. Namua na bagula agoxoyadi mala muli. Labu dahalingalinga bu digamdi tangaimia.
13Axap kixingima bu ala sap rangua lipua ba.
14Sabangagua bing bila. Urana sanga haringinga longgalo bagula hauli lipua ba hatuminganoa bu usingang. Baing bagula yunga sabangima te ma muli rangua nga xaung Benyamin xauna. Nabu Urana muruna ba garagu longga dahanggalang, tauna bagula dahanggalang.”
15Tauna daxap yahangadi xaung siangdi waleu daxapdi ma ba digoxoyadi mala muli. Xaung daxap Benyamin mala xauna. Baing disok Isip, saing dila dibagu Yosep.
16Bungina Yosep bagu Benyamin ma ranguadi, bala lipuxing oxatama ba, “Uxop lipuadi li mala numagia. Baing ung bulmakau tela bu utau. Lipuadi li bagula daxang rangua nga xaidap lia.”
17Tauna Yosep lipuxing oxatama libu bila Yosep bala ba. Baing xapdi mala Yosep numania.
18Ne bungina diluxu numia teguyu daharua ba, “Bola dahatum mana siangadi ditadi maluxu tangaria, bungina waleu tama ba. Mana namua naga daxap kira ma mana numa baguli. Bagula dituxu kira bu dilibu kira tasok lipu oxata olanggam manadi. Xaung bagula daxap donki kiriadi xauna.”
19Dibagu lipua wasa mana Yosep numanoa li haxek xaluya, baing dibala ba,
20“Lipu sabanga, ulungu. Waleu am gama lali saing am gagim anginga.
21Ne bungina am gayungang saing am gala am gikinu yambong taininau daxangia, am longga am gabagu siang longga am gagim anginga manadi ba duwa tangamam lunia. Binabu hatata am gaxap siang longga ma muli.
22Xaung am gaxap siang teladi xauna ba am gagim anginga. Am gaxabia te gaxarea ta siangadi li maluxu tangamamia.”
23Lipu oxata olanggam lungu haruangadinga saing haxuya ba, “Labu ahatum xumana xaung amaxuwau tai. Bola Urana angia xaung tibuim inia ing sibuna ta siangadi ba maluxu tangaimia. Ne sianga agim anginga mana ba ngaxap lo.” Baing ila xap Simeon ma ranguadi.
24Baing kimuya lipu oxata olanggam xapdi maluxu Yosep numania. Baing sina langa nadi ba didamia kidingdi, saing haxang donkidingdi.
25Baing bungina dilungu ba Yosep xang ranguadi xaidap lia baing daxauxau yahangadi ba saing disinadi na.
26Tauna bungina Yosep ma numia daxap yahangadi mala saing disinadi na. Baing digung kiding tuxundi, dituru mari haxek Yosep ramramonia.
27Baing Yosep harua xaidap xai nadi, saing xusungadi ba, “Barutadi mana tibuim wa xaiyu?”
28Baing dahaxuya ba, “Lipu sabanga, tibumam wa xaiyu.” Baing dituru mari muli na.
29Yosep bagu kixinging sibunoa Benyamin, baing harua ba, “Bola lipua li kixingim sibunoa naga? Waleu abala nga mana ba?” Baing bala Benyamin ba, “Garagu, Urana libu xai maung.”
30Baing Yosep usinga sibuna mana kixinginoa, saing tegu tang. Binabu yungadi saing ila mana numa lung tela saing tang.
31Baing kimuya damia ramramonoa. Xap haringinga laing sup baing ma muli ranguadi. Baing bala lipu oxatama ba su angingadi bu tadi kabukabia.
32Dita Yosep angiandi mana kabukabu tela, ne dita sabangandi mana kabukabu tela. Ne Isipka duwa rangua Yosep daxang mana kabukabua te. Namua na Isipdi daxang rangua Hibrudi te. Kubolua baguli doyang sibuna maxadingia.
33Yosep bala lipu oxatama ba mogu kabukabu taining tainina nadi mana bunging angingama. Yosep bo ba tai dirung dinaxu mana nianidingdi. Ungguti mana matuauwa ila laing sup mana saxudinga. Ne bungina dibagu dirung bila ba, dihixi mana saing dibagu ding.
34Lipu oxata olanggamdi daxap neng sabangandi angiading Yosep kabukabunia. Baing disu angiadinga sanga manadi. Ne Benyamin inia bing disu sabanga sibuna. Sanga mana lipu luwadi luwadi hiliadinga daxang. Tauna daxang dinung rangua Yosep diyaha sibuna saing kakahading.
