1Maranai pipiya dobu ai asi koroto i rakarakata ba natunatusi bibaine si tuvisi,
2kanukanuma bibaine kepakepamarisi si kita kirorovisi wai asi wainai wata si rabaisi.
3Damanina Bada i wona, “Kanumiku kega pipiya yabata sini gegae damana. Kona wai biyo, kona kairavina kana bodu 120 niko dobu ai ina mana.”
4Kona maranai ba muri yai, Nephilim dobu ai si mamana. Kosi wai kanukanuma natunatusi, pipiya natunatusi bibaine si rabaisi wai si tupuwa. Kosi wai, pipiya kaikaposi maragasisi ba warasi i tetete.
5Bada pipiya i kinanisi kata, asi wose goyogosi dobu ai i rakata saki, ba asi nota wai goyogoyosi wata mara ku ereonowana.
6Bada i yapoya saki ba nuwanuwana i yara, kata awaika kairavina pipiya niko dobu ai i terisi.
7Kona kairavina i wona, “Pipiya tupasi niko dobu ai ana pupuna taveyisi. Aba payapayaya ba sawara tano ai te botete, ba manu kaidamonai te roborobo wai ereonowasi yabata. Kega a binuwagaire kata a wosisi.”
8Saba Bada Noah i kesina i kinani wai, i nuwagaire saburere.
9Nikona wai Noah ana rurutuwa. Kona maranai pipiya kamosi yai wai Noah i kesina wata pipiya gaire sakina ba ana wose totorisi ba God mata kamonai i mamana.
10Noah natunatuna sebasebare asi tonu Shem, Ham ba Japheth.
11God dobu i kinani kata i goyo saburere ba kawakasekase i rakata saki.
12God niko dobu ana goyona i kita bikuikuiri, kairavina pipiya ereonowasi asi wose si goyo saburere.
13Kona kairavina God Noah kurina i wona, “Pipiya ereonowasi niko dobu ai ana kasipupuna taveyisi, kairavina dobu ai kawaksekase i bonuwa, wai kosi ba sawara ereonowana dobu ai ana kasi pupuna roboisi.
14Kona kairavina au waina nikona kuna wosei. Keyama gaigairesi yai waka kaikapona ke bowai ba kamonai ke papa yarayaragi ba kamona ba kupuna tar dumadumanai ke pasi potapotai.
15Nikasike wakana ke bowai, Wakana kana veoroma wai 140 meter rubana, ba ana nabanaba wai 23 meter rubana, ba ina gae 13 meter rubana.
16Ba wakana kana wadakupuna kairavina gawara 44 cm rubana, wadakupuna ba wakana kupuna basusi yai ke boterei. Matam keta nebanebanai ke terei ba batara tonu ke wosisi, gaburinai, basunai ba tepanai.
17Kutukutuba ani porai ku dobu ba pipiya ereonowasi ba sawara yawayawasisi ereonowasi ana kasibigoyonisi, ba awaika tupana dobu ai sina rabobo.
18Saba au bidamanina maragasina kurim a tereterei, ba kom, kaowam ba natunatum ere kaokaowasi ku waka kona riu.
19Aba payapayaya ereonowasi ere kaokaowasi yabata kuna botuvisi ku waka kata yawayawasisi sina mana.
20Manu, ereonowasi pesisi nunusi yai sebare ba wasike kuna yaunisi, ba aba payapayaya ereonowasi yebo nanakasike ba tano ai te botete wai yebo nanakasike kuna yaunisi sina botu ku waka, kata yawayawasisi sina mana.
21Ba yebo kam bubausi yai ereonowasi ki gaeni kata komi ba kosi kairavimi.”
22Noah awaika ereonowana mekabage God i wonei wai i wose roboi.
