1Baing Toxoratamona harua na Noa ba, “Uluxu wagia, ung xaung bakbagim longgalo, namua na ngabagung umaring liwe mana lipu titiam longgalo.
2Asaxadi ngabaxangadi ba hananiangamdi bing oxop 7 monindi xaung 7 hagaxandi. Baing asaxa haniangam teguamdi bing oxop luwa luwa, monina xaung hagaxana, bu dahaing wagia ranguaung.
3Bila balau mana mang longgalo, oxop 7 monindi xaung 7 hagaxandi. Ulibu bila ba bu garadingdi duwa xai titia kimuya.
4Namua na xaidap 7 disup to, baing bagula ngasoxi kuya mari titia sanga mana xaidap 40 xaung yambong 40. Bagula ngasahi axamang titiam longgalo ngatongtongiadi.”
5Baing Noa libu axamang longgalo Toxoratamona tabina ba.
6Noa nianindi 600 mana bungina silinga sabanga sok titia.
7Noa xaung garandi xaung haininoa xaung dingtung hainidingdi diluxu wagia bu silingua xapdi te.
8Asaxa hananiangamdi xaung asaxa hananianga teguamdi, mangdi, xaung asaxa abungindi,
9luwa luwa mana hagaxandi xaung monindi diluxu wagia rangua Noa, bila Urana tabina ba.
10Xaidap 7 disup, baing silingua sok titia.
11Noa nianindi 600, baing mana xaidap 17 mana sobak luwa mana niani baguba, titia xaxaina saing lang maxandi sililiga mahaing, saing xalu longga sabalunia daxaxading saing kuya sabanga sibuna mu.
12Baing kuya mu laing xaidap 40 yambong 40.
13Mana xaidapka baguba Noa xaung garang tuwadi Siem, Ham xaung Yapet, digabu haininoa xaung dingtung hainidingdi diluxu wagia.
14Ranguadi bing asaxa abunging longgalo disu mana baudingdi, asaxa nangnang longgalo disu mana baundingdi, asaxa kaxukang longgalo disu mana baudingdi, xaung axamang banggitonginam longgalo.
15Luwa luwa mana axamang walingam longgalo dima rangua Noa saing diluxu wagia.
16Asaxa diluxu bing hagaxandi xaung monindi mana axamang walingam longgalo, bila Urana tabina Noa ba. Baing ina naga, Toxoratamona riba waga xaluxinoa manadi.
17Silingua sokkuyu laing xaidap 40, baing langa dudu mahaing saing xuru wagua mahaing etua sibuna mana titia.
18Langa dudu mahaing sabanga sibuna mana titia, saing wagua oti etuaʼm lang ubunoa.
19Dudu haringing sibuna etuaʼm titia, saing kau bimbi sabanga longgalo.
20Langa dudu mahaing saing dali bimbi longgalo laing suana bila 6 mita.
21Axamang walingam longgalo etua mana titia li dimati—mangdi, asaxa nangnangdi, asaxa abungindi, asaxa kaxukang longgalo, xaung lipu longgalo.
22Axamang longgalo duwa etua mana titi mamasana, ding longgalo diyaga yungxadingia ba, dimati.
23Axamang walingam longgalo mana titia li disup sibuna. Lipudi, asaxa nangnangdi, abungindi xaung mangdi disup sibuna mana titia li. Noa ing ganina wa, xaung adi duwa rangua wagia ba.
24Silinga sabangua kau titia laing xaidap 150.
