1Yekop wa mana titia Kenan ina longa tibuna Aisak wa mana waleu.
2Naxuyanga mana Yekop xaung ina garandi bing bila. Yosep ina gananung lup, saing ina nianing 17. Ina wasa mana sipsip saing meme rangua sabangadi, ding ba Bilha garandi, xaung Silpa, haing luwa tibuna iniadi. Saing Yosep baxanga na tibuna mana kubolu diana kixingindi dilibudi.
3Yekop, yan tela ba Isrel, ina muruna buk mana Yosep xaung ina garang xan teladi, mana baraxinta, bauwa hayau Yosep bungina Isrel mati masup. Saing Yekop tongtongia imang xai sibung maxaxaya tela riman dimaxaya, saing sina na Yosep.
4Ding kixingindi dibagu tibuding ina muruna buk manadi te, baing gamoding didoa sibuna mana Yosep, saing ding sanga mana daharua rangua te.
5Mana bunging tela Yosep ina mip, saing naxuya na kixingindi baing dilungu saing gamoding didoa sibuna,
6Yosep harua ba, “Ang galungu mibingagua.
7Kira longga tawa umangia saing tawaxata tagoxi wit tambing. Saing wit tambing ngayua mesa saing li maringina. Saing wit tabagadi ranguang dili taxiya wit tambinga rangua nga saing ditatua toxodingdi mana wit tambinga rangua nga.”
8Ina sabangandi dilungu saing dibala Yosep ba, “Ung guhatum ba usok lipu sabanga bu uwasa mam, bila ba?” Binabu bungina Yosep baxanga mibingandi, bing kixingindi gamoding didoa sibuna mana.
9Saing kimuya Yosep mip muli saing baxanga na kixingindi ma baladi ba, “Ngabagu mibinga tela muli. Ngabagu xaidap xaung sobak xaung hatung ditatua toxodingdi mari ramramogia.”
10Ina naxuya mibinga baguli na tibuna xaung kixingindi. Baing tibuna gamia saing harua na ba, “Alaba baru mibinganta bila ba? Ung guhatum ba, nga xaung ung baum saing ung kixingimdi, am bagula am gama am gagung kimam tuxundi bu am ngatatua toxomamdi mari ramramomia?”
11Binabu ina kixingindi gamoding disala buk mana. Ne tibuna ba, hatumhatum xumana mana Yosep mibingadi.
12Bunging tela Yosep kixingindi dila mana longga Sekem ba duwasa mana tibuding sipsibindi.
13Baing Isrel bala Yosep ba, “Sabangamdi duwasa mana sipsipdi mua mana longga Sekem. Ngabo tai ula ubagudi.” Binabu Yosep haxuya haruanga na ba, “Wane tibugu nga sangaʼm gala.”
14Saing tibuna harua na ba, “Ula ubagu kixingimdi ding duwa xai, kimbo tegu? Saing ubagu sipsipdi xauna, ding daxai kimbo tegu? Ubagudi masup, tauna uma bu baxanga nanga.” Mana bungina baguba bakbakkadi Ismail duwa mana long gomana Hebron. Yosep sok mana Sekem titiding ba.
15Saing ina haxahaxa mana longga baguba baing lipu tela bagu saing xusunga ba, “Usai baraxinta?”
16Binabu Yosep harua ba, “Nga ngasai mana kixingigudi. Ung sangaʼm ubaxanga nanga mana baru yabanta duwa mana saing duwasa mana sipsibidingdi?”
17Lipua baguli bala ba, “Ding diyunga longga baguli lo ngalungu daharua ba bagula dila mana longga Dotan.” Baing Yosep su mana sabangandi mala saing bagudi Dotan.
18Ina wauyu hasoya baing sabangan dibagu. Saing ding dahau haruangua ba dung Yosep mati.
19Ding dahangixaya liwe mading ba, “Abagu, lipu mibingama ma.
20Tauna, taung mati bu tating sangganoa mari mana ginanggadi bagudi li tela. Kimuya bagula taharua ba, ‘Asaxa abungin tela gaxu.’ Binabu tabagu baraxinta bagula sok mana mibingandi.”
21Ruben lungu daharua bila ba, ne ina bo ba hauli Yosep. Saing ina harua ba, “Kira labu taung matiu tai. Tegu.
22Kira sibura labu tasahi walinganoa tai. Tating mari mana ginanga baguli long lipu teguamia, ne labu tahanggalangiau tai.” Ruben ina hatumhatum ba xap Yosep bu xap mala muli rangua tibuna saing bagu harua bila ba.
23Tauna bungina Yosep sok mana kixingindi, ding dituxu haringina saing disau imanging rimang maxaxayama sangua, alaba imang xai sibuna tibuna sina na.
24Binabu daxap mala saing diting mari mana ginang tela langinoa maxa lo.
25Saing kimuya dirung daxang ding daxangguyu mua baing dibagu bakbakkadi Ismail dima xaung kamel dingiadi lipuadi bagudi li dima hata mana longa Gileat saing dibo dila mana numanuma Isip bu disina xalingiding xai sibundi, bila baxi xangxana xaung guxenggadi ding ditongtongiadi xai susunia.
26Saing Yuda bala sabangandi kixingindi ba, “Nabu kira taung kixingiroa saing kira tayameng axamanoa kira talibu, kubolua baguli bagula hauli kira baru?
27Talibu kira tasina na bakbakkadi Ismail bu ding digim bila lipu oxata olanggam. Kira sibura labu tahanggalangia inau tai, mana baraxinta, ina kixingira sibuna xaung sibira taininau mana kira.” Baing sabangan dinai mana haruanga baguba.
28Bungina sabangan daharua muayu teladi lipu sianggamdi Midia dima dibagu Yosep wa mari ginang lunia saing ding daxai mahaing, binabu ding disina na Ismaildi bila lipu oxata olanggam. Ismail disina 20 siang silba na Midiadi, saing ding daxap Yosep mala Isip.
29Kimuya Ruben ila muli saing bagu mana ginanggaba, baing ina luki doa mana bagu Yosep wa mari ginangia te tauna Ruben usinga saing sing imanginoa.
30Saing ila muli rangua kixingindi saing baladi ba, “Yosep ba wa ginangia te bagula ngaraxatauba hatata?”
31Tauna ina sabangandi dung meme tela, saing ding dita Yosep imanginoa mana sibuna
32saing ding daxap imanginoa mala rangua tibuna, saing daharua ba, “Am ngabagu imangga li mana long tela ubagu labu garama imanginoa.”
33Tibuna bagu xabia mana imanga saing harua ba, “Wane, baguli Yosep imanginoa nga garagua layon tela kimbo axamang tela ung mati saing xang masup.”
34Baing Yekop usinga garanoa buk saing sing imanginoa binabu sau imang usinganam. Saing mana xaidap xumang sibuna ina tang mua mana garanoa.
35Ding longa garang lup xaung garang haing ding dima saing dilibu haruanga mana dilibu gamonoa sok xai muli. Ne ina muruna te sibuna saing harua ba, “Nga bagula ngatang mana laing sanga mana ngala ngawa rangua mana lipu matiamdi yabadinga.” Binabu ina tangtagu mua.
36Lipudi Midian daxap Yosep mala Isip, ding disina bila lipu oxata olanggam na Potipa, ofisa tela mana lipu toxona mana Isip. Potipa ina lipu toxona mana lipu haungingamdi ding duwasa mana Isip lipu toxona numanoa.
