Unggutinga (Stat) 14

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Mana bungina baguba xaitamoxi luwadi luwadi digugunia ba dahaunggana bixuadingdi. Xaitamoxi luwadi luwadi ba yadingdi bing: Amrapel (xaitamoxi mana Sinadi), Ariok (xaitamoxi mana Elasadi), Kedorlaoma (xaitamoxi mana Elamdi) xaung Tidal (xaitamoxi mana Goimdi).

²Adi bixuadingdi dahaungganadi yadingdi bing: Bera (xaitamoxi mana Sodamdi), Birsa (xaitamoxi mana Gomoradi), Sinap (xaitamoxi mana Admadi), Semeber (xaitamoxi mana Seboimdi) xaung xaitamoxi Belam (longga Bela yan tela bing Soar).

³Adi bixuading luwadi luwadi hiliadinga ba dila digugunia mana Long Gomana Sidim, haxek mana Lang Gamolingana Mosak, daxauxau ba dahaung.

⁴Haunginga namuxina bing muga xaitamoxi luwadi luwadi hiliadinga ba duwa hawa mana Kedorlaomer binabu duwa bila lipuxing oxata olanggamdi laing niani 12. Ne mana niani 13 hauxading ba disu mana haruanganoa.

⁵Baing mana niani 14 Kedorlaoma gabu riandi xaitamoxi luwa hilianadi ba dila dahaunggana bixuading teladi saing didalidi. Bixuadinggadi ba yabading yadingdi bing: Repaimdi mana Longga Asterot-Karnaim, Susdi mana Longga Ham, Emdi mana Sabe Kiriataim,

⁶xaung Hordi mana xaxagandi mana titia Seir. Kedorlaoma gabu riandi duxu bixuadinggadi ba mala laing titia Elparan, haxek long xoliania.

⁷Sup, baing digoxoya mala muli mana Longga Kades (yang mugangua bing Enmispat). Didali long longgalo maluxu mana Amalekdi titidinga, xaung didali Amordi duwa Longga Hasason-Tamar xauna.

⁸Ne xaitamoxi luwadi luwadi hilianga muga hauxading mana ba, ding dibagu haunggana bixuandi, binabu digugunia lipuxiding haungingamdi saing diragu haungingua Long Gomana Sidim. Baing xaitamoxi Sodamgama xaung xaitamoxi Gomorama xaung xaitamoxi Admama xaung xaitamoxi Seboimgama xaung xaitamoxi Belama (longga ba yan tela bing Soar), ding dahaxa maxixinga mala saing digugunia gugunianga gugunianga ba dahaunggana

⁹Kedorlaoma xaitamoxi mana Elamdi, Tidal xaitamoxi mana Goimdi, Amrapel xaitamoxi mana Sinadi xaung Ariok xaitamoxi mana Elasadi. Bila balau xaitamoxi luwadi luwadi dahanggana luwadi luwadi hiliadinga.

¹⁰Ne Goma Sidim baxagiʼm banggum xumana koltamdi, saing bungina xaitamoxidi Sodamgama xaung Gomorama diluki mala, lipu teladi xungdi mari manadi, ne teladi diluki mahaing mana xaxagandi.

¹¹Xaitamoxi luwadi luwadi ba daxap Sodam Gomora xalingdingdi xaung angiadingdi. Laing sup, baing dilauba.

¹²Baing Lot, Ebram sabanganoa garanoa, wa Sodam, binabu xaitamoxidi daxap xaung xalingina mala xauna.

¹³Ne lipu tela giti mala, ma rangua Ebram, lipu tela mana bakbakka Hibru, saing naxuya na mana axamandi disok haungingia ba. Mana bungina baguba Ebram tabalaxainoa wa haxek mana Mamre xaing sabangadi. Mamre bing Amor tela, kixinging luwa, yadingdi Eskol xaung Aner. Dingtung dahau haruangua rangua Ebram ba dahauli mana haungingua.

¹⁴Ebram lungu ba daxap sibinoa Lot mala, baing wagi 318 lipuxing haungingamdi ma. Adi ba lipuxing oxatamdi, ne ditubatuba mana haungingua. Ebram muga manadi saing dila duxu xaitamoxi luwadi luwadi ba mala laing Long Sabangga Dan.

¹⁵La ba Ebram utu lipuxindi bakbak luwa, diragu yambonga saing dahaungganadi. Duxudi mala laing disok longga Hoba, wa sanga karagia mana long sabangga Damaskas.

¹⁶Bila balau daxap xalaxala longgalo muli saing daxap sibinoa Lot xaung xalingindi, xaung hainglupdi.

¹⁷Ebram dali xaitamoxi Kedorlaoma gabu riandi laing sup, baing goxoya ma muli. Baing xaitamoxi Sodamgama ma sok mana Goma Sabe (yan tela Goma Mana Xaitamoxidi).

¹⁸Saking Melkisedek xaitamoxi Salemgama ma. Ina lipu hananiangam mana Urana Etaloam Sibunama. Xap salanga xaung wain ma rangua Ebram,

¹⁹saing sina guxama na Ebram, harua ba, “Urana Etaloam Sibunama, Lipua tongtongia sabaluna xaung titi, sina guxama na Ebram.

²⁰Urana Etaloam Sibunama ta bixuamdi rimamia, binabu taiti yanoa.” Baing Ebram sina hataing 10 mana axamang longgalo xap haungingia na Melkisedek.

²¹Xaitamoxi Sodamgama harua na Ebram ba, “Ugoxoya lipuxigudi ma, saing oxop xalaxaladi naung.”

²²Ning Ebram harua na xaitamoxi Sodamgama ba, “Ne ngaiti rimagua ngahau haruangua rangua Toxoratamona, Urana Etaloam Sibunama, Lipua tongtongia sabalauna xaung titi. Haruangua ngahau bing:

²³Sanga ba ngaxap xalingim tela te. Heku waxu ragangam kimbo waxu xai sangang raganganam. Tegu sibuna. Nam kimuya uharua ba, ‘Ngalibu Ebram sok lipu xalaxalam.’

²⁴Nga sanga ba ngaxap axamang tela te. Anginga lipuxigudi daxang lo, sanga ba. Ne riagu luwa hiliana Aner, Eskol Mamre tung dima rangua nga, bagula daxap sinagidinga.”