1Yekop wagi garandi ma saing baladi ba. “Ama haxek rangua nga bu ngabaxanga baraxinta bagula sok mang kimu.
2“Ang Yekop garandi ama agugunia haxek rangua nga saing ata tangaliamdi mana haruangagua, nga tibuim Isrel.
3“Ruben ung garagu mugamugangam. Nga xapkung masok bungina ngawa gananunauyu. Usok lipu sabanga sibuna saing haringingam buk saing udali garagu longgalo.
4Kuboluma bila langa si haringina saing lipu tela sanga wasa mana te. Ne bagula uwa mugamugangam muli te. Namua na ukinu rangua tibum haininoa, saing usina memeya sabanga nanga. Ulibu kubolu diang sibuna.
5“Simeon xaung Libai, dingtang neng sabangandi. Dingtang daxap axamang haungingamdi saing dilibu doa mana teladi.
6Labu gamogu taininau mana hatumingadingau tai. Xaung labu nganai mana axamanoa tang daxau haruangua ba dilibu tai. Namua na bungina tang digamia tang dung lipudi mati. Ne bungina tang duwa mosiu tang duxuxu bulmakaudi kidingdi.
7Atiding salianoa bagula hanggalangia dingtang. Namua na tang gamiangadinga haring buk, saing tang atiding salianoa doa sibuna. Bagula ngalibu dingtang duwa mauli liwe mana Isreldi.
8“Yuda sabangamdi bagula diti yama. Baing bagula utuxu bixuamdi waxudingtuandi. Baing sabangamdi bagula dituru saing disina yaya sabanga naung.
9Yuda bila layon tutubing tela. Ung asaxa saing xang, binabu sok haringing sibuna. Rung saing wa mosi sibuna bila layon tela. Binabu lipu tela sanga hasua mana te.
10Ina tuxu tuki tela mogu bila xaitamoxi haringinganoa. Baing bagula wa xaitamoxi mana bungingbunginalo. Binabu tuxu titinga baguba laing sok mana long sabangga Silo, saing bagula wasa mana hainglup longgalo.
11Ina xuma wain xumang sibuna, binabu bungina bo ba goti donki inia bing goti manadi baing tongtongia wain xumang sibuna mana wain maranadi ba. Baing lipu tela sanga nungdi masup te. Binabu xap teladi saing damia imangindi.
12Maxandi disabuxa namua na nung wain xumang sibuna. Waindi dusa namua na nung kau suing langing xumang sibuna.
13“Sebullun bagula wa haxek tegia. Teging rubinoa bagula sok mata xai sibuna mana wagadi. Titing rangunoa bagula ila laing sok mana long sabangga Saidon.
14“Isaka ina donki haringin tela. Ne ina kinu olang liwe mana axalaxaladi.
15Bagu titinoa long xai sibuna ba wa mana. Baing haring ba tuxu oxatua mana. Ne kimuya sok lipu oxata olanggam saing waxata haringing sibuna.
16“Dan bagula wasa mana lipuxindi. Baing ding bagula duwa maxang taininau bila Isrel teladi.
17Dan wa bila moxa dian tela, wasa mua daxanga rubinia. Ne bungina hos diluki ma bagula gaxu kidingdi. Baing lipua dirung hosia bagula xungdi mari.
18“Toxoratamona ngaragu ba oxop nga muli xaung uhauli nga.
19“Gat lipu hanaunggamdi bagula dima dahaungganaung. Ne ung bagula uhaungganadi saing usukadi mala.
20“Aser. Titima bagula angiang xumang sibuna. Ung bagula utau anginga xai sibuna xaitamoxidi muruding buk mana ba daxang.
21“Naptali bila meme abunging tela haxa murungania. Saing hayau gara xai sibundi.
22“Yosep bila wain xai sibung tela li haxek lang ribinia, saing uwa aningong xumana. Binabu rimandi dimaxaya saing dikaukau gamgamingua.
23Lipuadi dahaung ruangia dahaung haringing sibuna rangua. Dahaung saing dilibu doa mana.
24Ne Yosep taguxa ruanginoa te. Tegu. Urana haringing sibuna Yekop inia sina haringingua na. Binabu Yosep rimandi didabibi te. Urana baguba Isreldi lipuxiding wasangama. Ina yabading hisangama.
25Ina tibum Urana inia. Xaung Urana sanga haringinga longgalo, ina libu xai maung xaung sina axamang xai xumang sibuna naung. Bagula libu sabalunoa sina kuya xumang sibuna naung. Saing bagula libu lang xumang sibuna disok titia. Ina bagula libu bakbagimdi hainidingdi dahayau gara xumang sibuna.
26Nga tibum. Ngasina libunga xai naung. Xaung axamang xaidi naung. Bu disok xumang sibuna saing dikaukau bimbi sabanga longgalo. Xaung didali axamang xai sibundi waleu mugangaradi daxapdi. Axamang longga baguli bagula disok maung, ung Yosep. Ung lipua usok lipu sabanga liwe mana sabangamdi.
27“Benyamin bila koma abungin tela ung asaxadi. Buraraging longgalo xang asaxadi ungdi ba. Bungbung longgalo tuxu sinak mana axadi xapdi ba.”
28Adi bagudi li bing bakbak 12 mana Isrel. Mana bungina tibuding bo ba sauyadi. Baing sina haruangua na garang taining tainina. Sina libunga xaiyua sanga mana ding taining tainina.
29Yekop sina libunga xai laing sup, baing bala garandi ba, “Haxek sibuna ba ngala ngawa rangua bakbagigudi mana longga lipu matiandi duwa mana. Ne ang bagula akimang nga rangua mugangagudi mana guha wa Epron titinia. Lipua mana bakbakka Hit.
30Guha wa mana titia Makpela. Haxek mana longga Mamre mana titia Kenan. Ebraham gim titi hataina baguba rangua Epron, Guha baguba bing wa bila gobagobanoa.
31Mana gobagoba baguba dikimang Ebraham xaung haininoa Sera, xaung Aisak haininoa Rebeka tang. Xauna mana, ngakimang Lea xauna mana gobagoba baguba.
32Titia Ebraham gim rangua lipuadi mana bakbakka Hit.”
33Yekop harua laing sup. Baing xabubu muli saing mati. Bungina mati ila wa rangua bakbagindi mana longga lipu matiandi duwa mana ba.
