1Baing Yekop ila bala xaitamoxi ba, “Tibugu gabu kixingigudi disauya Kenan saing dima disok ba. Daxap sipsip, bulmakau xaung xalingiding longgalo ma xauna. Hatata duwa Gosen.”
2Tauna Yosep wagi kixinging luwadi luwadi hiliadinga ma saing dili xaitamoxi maxania.
3Baing xaitamoxi xusungadi ba, “Ang galibu baru oxatanta?” Baing dahaxuya ba, “Lipu sabanga, am ba am gawasa mana sipsipdi bila waleu tibumam dilibu.
4Am gabo am gawa bunging gamoitau mana titia baguli. Namua na bungina gesak sabangua sok Kenen baing tatubang te mana sipsipbimam daxang. Binabu am gabo tai uharua xai mam bu am garung mana longga Gosen.”
5Baing xaitamoxi bala Yosep ba, “Kixingim xaung tibum disok lo ba duwa ranguaung.
6Binabu uhatumia titi hataing xai sibung tela mana titia Isip, bu baladi bu dirung mana. Nabu uhatum ba dirung Gosen bing sangau. Xauna nabu uhatumia lipu teladi daxabia xai mana bulmakau wasanganoa, bing usina oxatua nadi bu duwasa mana bulmakaugudi.”
7Tauna Yosep xap tibuna Yekop mala rangua xaitamoxi. Baing Yekop harua xaidap xai mana xaitamoxi.
8Baing xaitamoxi xusunga ba, “Ung nianimdi baru?”
9Baing Yekop haxuya ba, “Ngawa mana titia baguli sanga mana 130 niani ing ganina. Bunging maxaxaya teguyu ning ngasok mana mauxangan xumana xauna. Garagu ranggindi duwa bunging maxaxaya mana titia baguli. Nianidingdi didali sibuna nanigudi.”
10Tauna Yekop harua xai sibuna mana xaitamoxi saing ila.
11Kimuya Yosep libu bila xaitamoxi bala ba, baing hauli tibuna xaung kixingindi saing dirung mana longga Isip. Sina titia nadi mana long sabangga Rameses. Titi hataina baguba bing xai sibuna, saing dali titi hataing longga maluxu Isip.
12Yosep wasaʼm bakbak longgalo mana angingua. Sina angingua na tibuna xaung kidingindi xaung hainidingdi xaung garadingdi.
13Gesak sabanga sibuna sok saing anginga te mana titi hataing longgalo. Mana bungina baguba, gesaga hanggalangia longga Isip xaung titia Kenan.
14Binabu lipu longgalo maluxu Isip xaung Kenan disahi siangiding longgalo mana digim haidanga rangua Yosep. Baing Yosep xap siang longgalo saing tadi xaitamoxi numania.
15Tauna bungina Isip xaung Kenandi siangidingdi disup, dila rangua Yosep saing dibala ba, “Uliam anginga. Nabu gesaga hanggalangiam bu am gamati maxamia. Uhauliam namua na siangimam longgalo disup.”
16Baing Yosep baladi ba. Nabu siangim longgalo disup sibuna bing axap asaxaimdi ma asinadi nanga, bila anginga abo ba axap giminaginoa.
17Tauna daxap hos, sipsip, meme, bulmakau xaung donki mala rangua Yosep, saing xapdi bila anginga sina nadi ba giminagidinga. Dilibu bila ba laing niania bagu sup.
18Baing mana niani kimuama dila muli rangua Yosep saing daharua ba, “Lipu sabanga, am sanga ba am gayameng mauxangamama maung te. Oxop siangimam longgalo xaung sipsip xaung bulmakau. Am goxola axamana ba am gasina naung. Am sibumam xaung titimama ing ganina wa.
19Labu uyungam bu am gamati xaung titimama doau tai. Am gabo tai xaitamoxi ing sibuna wasa mam mana angingua. Baing am longgalo bagula am gasok lup oxata olanggam xaung haing oxata olanggam mana. Xaung xap titimamdi xauna. Si, laku uliam anginga xuyana xauna bu am gamati tai. Tegu. Bagula am gawa xai saing titimama sanga doa te.”
20Gesak sabangua libu saing lipu longga Isip disina titidingdi na Yosep saing gimdi. Binabu titi longga Isip disok bila xaitamoxi ing ganina titindi.
21Yosep libu hainglup longga Isip diyunga titidingdi saing dila duwa long sabangia.
22Lipu hananiangamdi titidinga ing ganina Yosep gim te. Xai tamoxi sina sianga na lipu hananiangamdi, saing digim anginga mana. Binabu disina titidinga mana giminaga te.
23Yosep bala hainglupdi ba, “Alungu to. Hatata ngagimgang xaung titim saing asok lup oxata olanggam xaung haing oxata olanggam mana xaitamoxi. Agim xuyandi bagudi li. Axapdi mala bu axumadi umangia.
24Bungina angingua xauxau umangia, bing autu hataing luwadi luwadi hiliadinga. Asina hataing tela na xaitamoxi bing hataing luwadi luwadi bing angiadi. Ata teladi muli bu axumadi. Ne hataing duwauyu bing agabu bakbagimdi axangdi.”
25Baing hainglupdi daharua ba, “Lipu Sabanga, uhauliam xai sibuna, saing hatata am longgalo am gawa xai. Am gaharua xai sibuna maung mana uyungam saing am gasok lipu oxata olanggam mana xaitamoxi.”
26Tauna Yosep ta hanaunaunga tela Isip bila li: Nabu angingua xauxau umangia, bing dutu hataing luwadi luwadi hiliadinga. Bu disina hataing tela na xaitamoxi. Hanaunaunga baguli wa bila ba, laing ma hatata. Lipu hananiangamdi titidinga ing ganina sok bila xaitamoxi inia te.
27Isrel dirung Isip mana longga Gosen, saing daxap titia la ba. Dahayau gara xumana saing disok bakbak sabanga sibuna.
28Yekop rung Isip sanga mana 17 niani baing nianindi disok bila 147.
29Ina xabia ba bo ba mati baing wagi garanoa Yosep ma, saing bala ba, “Nabu murum sibuna manga, bing uta rimamdi hawa kigia, saing uharingia haruangua bila. Ung bagula ulibu kubolu xaiyua manga. Labu ukimang nga Isipku tai.
30Bungina ngamatai saing ngala ba ngawa rangua mugangagudi, ngabo tai oxoxi sanggagua mala sangua longga Isip. Bu ukimang nga mana mugangagudi gobagobadinga.” Baing Yosep haxuya ba, “Bagula ngalibu bila uharua.”
31Ne Yekop harua muli ba, “Uharua maxung sibuna, ba ulibu axa baguli.” Yosep haringia haruangua laing sup, baing Yekop turu mari uxaingania saing hatanga bila ina yaha mana Yosep.
