Text copied!
CopyCompare
Urana Xuana - Unggutinga (Stat)

Unggutinga (Stat) 13

Help us?
Click on verse(s) to share them!
1Binabu Ebram haing sangua Isip saing ila Negep, gabu haininoa xaung xalinging longgalo, saing Lot ila rangua xauna.
2Ebram xalinging xumana. Morung xumana, silba xaung gol xauna.
3Baing sauya titia Negep, saing haxahaxa mala laing sok mana longga Betel, mana longga wa lia mana Betel xaung Ai, longga waleu tabalaxainoa wa mana ba.
4Longga baguba waleu tongtongia kabukabu hananiangama muga mana ba. La ba wagi Toxoratamona saing iti yanoa muli.
5Baing Lot haxa rangua Ebram, ing xauna memedi xaung sipsipdi xaung bulmakaudi xaung lipuxing oxatam xumana.
6Ne titia ba sanga mana tang duwa xauna te, namua na tang xalingiding xumana buk.
7Baing gamiangua sok liwe mana Ebram morung wasanganamdi xaung Lot morung wasanganamdi. Mana bungina baguba Kenandi xaung Peresdi duwa xauna mana titia baguba.
8Binabu Ebram harua na Lot ba, “Kitam sip taininau, binabu labu mauxanganoa wa liwe makirau tai, labu wa liwe mana morum wasangamdi xaung morugu wasangamdi xaunau tai.
9Ubagu, titi sabanga duwau. Xai ba tautu kira. Nabu ula xong, bagula ngala rimamo. Nabu ula rimamo, bing bagula ngala xong.”
10Tauna Lot li saing bagu mala baing bagu titi longga duwa gomia mana langga Yodan. Xauna mana long sabangga Soa. Titia baguba bing langing xuma saing xai sibuna bila Toxoratamona umanganoa xaung bila Isipdi titidinga. Mana bungina Toxoratamona hanggalangia long sabangga Sodam xaung Gomora teguyu.
11Binabu Lot mogu long gomana mana Langga Yodan naina, saing haxa mala sanga karagia. Bila balau tang dutu ding.
12Ebram rung mana titia Kenan. Ne Lot ila rung liwe mana long sabanggadi duwa gomia Yodan, saing tongtongia tabalaxainoa haxek mana long sabangga Gomora.
13Ne Sodamdi diang sibuna, saing dilibu kubolu diang xumana Toxoratamona maxania.
14Lot sauya Ebram laing sup, baing Toxoratamona harua na Ebram ba, “Uitiung bu ubagu mauli mana long longgalo duwa sanga kanggua, sanga bukang, sanga karagia xaung sanga yuwaxa.
15Titi longgalo hatata ubagudi, bagula ngasinadi naung xaung bakbagima bungingbunginalo.
16Bagula ngalibu garamdi disok xumang sibuna bila titi gagabindi bu lipu tela sanga ba titidi te.
17Umesa, uhaxa makisi mana titi ragung longgalo, maxaxayanganoa xaung tubunganoa, namua naga ngasina naung.”
18Binabu Ebram kisinga tabalaxainoa muli mala mana rung mana Mamre xaing sabangadi haxek mana longga Hebron. La ba tongtongia kabukabu hananiangama bu sabu mana Toxoratamona.