1Aisak maxan dahaxatu sanga bagu muli te. Saing wagi garang matuaua Iso ba ma lungu. Iso bo ba, “Ngawau.”
2Aisak bala ba, “Ngawa duanga lo, bunging baraxinta bagula ngamati.
3Ung sanga oxop ruang xaung gulumdi bu ula ung asaxa tela nanga.
4Nabu ung bing utau anginga sanga murugu mana bu oxop ma, ngaxang bing ngasina guxam kimuam ma naung.”
5Baing Rebeka lungu Aisak bala garanoa Iso. Kimuya ina ila mana luluangua.
6Rebeka ina bala Yekop ba, “Hata sibuna li ngalungu tibuim bala Iso ba,
7‘Oxop asaxa tela bu utau ma ngaxang bing Urana maxania ngasina guxam kimuama naung. Kimuya ngamati.’
8Tauna garagu ulibu axamandi bila ngabalaung ba.
9Ula gamgamingia bu oxop meme haung luwa ma bu ngatau bila tibuim muruna mana ba.
10Bu usina na tibum bu xang binabu sina guxamga naung wa.”
11Yekop haxuya na bauna ba, “Iso sanggandi bukbuxading ne ngaing tegu.
12Labu tibugu xunumia sanggagua bu hatum ba ngabo ngalangua. Bing xusunga Urana bu hanggalangia nga mana guxamga ba.”
13Ne bauna harua ba, “Garagua labu uhatumgu tai. Nga sibugu bagula ngaxap mauxana ba. Ulibu bila ngabalaung ba.”
14Baing Yekop ila xap meme luwa ma saing bauna tau mana taunga tibuna muruna mana ba.
15Iso imanging xai sibundi duwa Rebeka numania, saing Rebeka xapdi mala yauyau Yekop manadi.
16Saing kaukau Yekop king rimana mana asaxa sanggandi.
17Baing Rebeka xap anginga dauyandi taudi ba saing sinadi na Yekop.
18Yekop xapdi mala saing harua ba. “Abo.” Aisak haxuya ba, “Garagu ung gaxarea?”
19Yekop haxuya ba, “Nga Iso garam matuaua. Ngaxauxau axalaxaladi baing. Umesa bu oxong asaxa teladi bu usina guxamga nanga.”
20Ne Aisak xusunga ba, “Garagu, baruta ning oxop asaxa sap?” Yekop haxuya ba, “Urana ungia haulinga saing sina nanga sap.”
21Baing Aisak bala Yekop ba, “Uma haxek bu ngatuxu sanggama ngaxunumia, Ung garagu Iso kimbo tegu?”
22Yekop ila haxek rangua tibuna saing tuxu sangganoa, saing bala ba, “Uharua bila Yekop ne ngaxunumia rimamdi bila Iso rimandi.”
23Aisak bagu Yekop xai te namua na meme sanggana kaukau Yekop rimandi, bila Iso rimandi. Aisak sina guxama na Yekop.
24Muga xusunga muli ba, “Maxung sibuna ung garagua Iso?” Yekop bo ba, “Wane.”
25Aisak bala ba oxop angingadi ma bu ngaxang. Kimuya ngasina guxama naung. Yekop sina anginga xaung wain na.
26Kimuya bala Yekop ba, “Garagu uma haxek bu ulibu nga.”
27Yekop ila libu Aisak, saing Aisak yuyu imanga Yekop sau ba. Tibuna sina guxama na saing libu haruanga xai na. Harua ba, “O, garagu saminganoa bila umanga saminganoa, umanga ba Urana libu xai sibuna mana.
28Urana bagula sina langa yambong mari ma na umangamdi bu anginga maxung disok xai.
29Binabu lipu long telamdi disok lipu oxatam naung, xaung lipu titi telamdi duwa hawa maung. Ung guwasa mana sabangamdi xaung baum bakbagindi duwa hawa maung. Lipu duxusunga Urana ba hanggalangiaung bing ding sibuding daxap doa. Nabu lipu xusunga Urana ba libu xai maung bing ina xap guxama.”
30Aisak sina guxama na Yekop saing yunga mala. Mana xaidapka baguba Iso goxoya ma luluangia.
31Ina xauna tau anginga dauyanam na tibuna saing xap mala harua ba, “Abo umesa bu oxong anginga teladi ngaxapdi ma naung bu usina guxama nanga.”
32Aisak harua ba, “Ung gaxarea?” Iso haxuya ba, “Nga Iso, garam matuaua.”
33Baing Aisak hixi saing lulu saing xusunga ba, “Muga gaxarea ung asaxa tela saing ma rangua nga? Uma teguyu saing ngaxang baing. Ngasina guxam kimuamga wa bungingbunginalo na baing.”
34Iso lungu haruangua li, tang haringing sibuna, saing harua ba tibugu ba, “Usina guxama nanga xauna.”
35Aisak bala ba, “Kixingima langua nga saing xap guxamingamga baing.”
36Iso harua ba, “Xap yabagua bunging luwau ba binabu yaya Yekop maringing sibuna rangua. Baugu hayau nga muga, ne bagu Yekop xap yabagua bila ina sok muga lo! Baruta? Abo guxam te wa sanga usina nanga?”
37Aisak haxuya na Iso ba, “Ngamogu ba sok bila lipu toxona maung. Mana bakbagindi disok bila lipuxing oxatamdi na. Ngaharua ba ina sanga wit xaung wain. Ne garagu baraxinta wa sanga ngasina guxama naung?”
38Iso xusunga tibuna ba, “Baruta ning guxam taininau? Tibugu sanga ubala Urana bu libu xai manga xauna?” Iso harua bila saing tang.
39Aisak bala ba, “Yabama wa hasoya mana titi guxenganam. Yambong langindi sanga diri mana umangamdi te.
40Ung bagula uhaxung waxangia bina bu usok mana anginga xaung runginga xaiyua, binabu uwa sabangama lipuxing oxatama. Kimuya usuka sanga wasa maung muli te.”
41Iso hatum ba haxek ba tibuding mati. Kimuya mana ina bo ung Yekop mati.
42Rebeka lungu haruanga Iso bo ba libu mana Yekop, saing wagi Yekop ma saing habinga na ba, “Sabangama atin disala maung saing bo ba unggung ba.
43Garagu ulibu bila ngabalaung ba, umesa bu ula uwa rangua sabangagua Leban mana titia Haran.
44Ula uwa rangua sanga kixingima atin daxaringa.
45Bu halingalinga baraxinta ulibu mana ba, kimuya ngasoxi lipu tela mala xapkung ma muli. Sanga ngayungang mana xaidap tela te.”
46Kimuya Rebeka bala Aisak ba, “Hauxagu mana bakbakkadi Hit. Nabu Yekop yau haing tela Hit, bila luwa duwa la li bing nga sanga ngamati.”
