1Kimuya Toxoratamona sina haruangua na Ebram bila mibinga. Toxoratamona bala ba, “Ebram, labu umaxuwau tai. Bagula ngawasa maung bila xai hataing tela soxauti maung mana haungingua, Haxuyangam sabanga nga baing.”
2Ne Ebram harua ba, “O Urana Toxoratamona ngayua, nga garagu teguyu. Kubolum xaiyua bagula sok manga baru? Namua na bungina ngamati Eliesa Damaskasiam bagula xap xalingigudi.”
3Baing Ebram harua muli ba, “Usina gara tela nanga te, binabu lipuxigu oxatama bagula xap xalingigu longgalo.”
4Baing Toxoratamona harua na ba, “Lipua li bagula xap xalingimdi te, ne ung sibum garama bagula xap xalingimdi.”
5Saking xap masok sabasabia saing harua ba, “Ubagu mahaing sabalunia, saing utiti hatundi nabu ung sanga. Bagula bakbagimdi disok xumang sibuna bila ba.”
6Ebram hatum haringina mana Toxoratamona, binabu uxu ba lipu maringina.
7Baing harua na ba, “Nga Toxoratamona naga. Ngaxapkung masok sangua longga Ur wa Kaldia titidingia bu ngasina titia baguli naung ba oxop bila titima.”
8Ne Ebram harua ba, “O Urana Toxoratamona ngayua, bagula ngaxabia baru ba ngaxap titia li bila ngayua?”
9Baing Toxoratamona harua na ba, “Oxop axadi bagudi li ma rangua nga. Oxop bulmakau hagaxang tela, meme hagaxang tela xaung sipsip moning tela, nianiding tuwa, xaung baxaliku tela xaung gumak tela.”
10Baing xapdi masup ma rangua, xuxu sahadi hataing luwa saing riridi hataing hataina maxixinga luwa. Ne mang luwadi ba xuxu sahadi te.
11Baing buntuk teladi diri mana asaxadi ba, ne Ebram xudi mala.
12Xaidaba bo ba riuba, baing Ebram kinu hadali sibuna. Kinu baing labiang sabanga kau, binabu maxuwa haringing sibuna.
13Baing Toxoratamona harua na Ebram ba, “Ngabo ba uxabia sibuna ba garam ranggindi bagula duwa lipu long telamdi mana titi tela dingia te. Bagula duwa lipu oxata olanggamdi la ba, saing bagula daxap salaga bila ba laing niani 400.
14Ne bagula ngasina salaga na bakbakka dituxu oxatading olanggamdi manadi ba. Baing bagula disok sangua titia baguba xaung xalaxala xumana.
15Ne ung sibum bungina uwa duanga bagula umati mosiu, saing dikimanggung.
16Bungina bakbagima titingadinga bila luwadi luwadi mana garam ranggindi, bagula digoxoya ma la li muli. Sanga digoxoya ma sap te, namua na ngabo ba ngasina salaga na Amordi mana kuboluding diandi, ne kuboluding diandi dibaxagi teguyu.”
17Xaidaba ri saing yambong lo, baing bori bunuxuyanam yapkam tela xaung nagung lulianam tela dowa masok saing dahaxa liwe mana asaxa hatainadi ba.
18Mana xaidapka baguba Toxoratamona hau haruangua rangua Ebram, saing harua ba, “Ngasina titia li na garam ranggindi. Titi ragunoa bing ungguti mana langga Isip, saing ila laing sok mana lang sabangga Yupretis.
19Longga ba hatata bakbakkadi li duwa mana: Kindi, Kenasdi, Kadmondi,
20Hitdi, Peresdi, Repaimdi,
21Amodi, Kenandi, Girgasdi, xaung Yebusdi.”
