1Tauna, Sarai Ebram haininoa hayau na te. Ne Sarai haining oxatam tela wau, yanoa Haga. Haga bing Isip haing tela.
2Baing Sarai harua na Ebram ba, “Ubagu, Toxoratamona bili nga ba ngahayau. Ula, ukinu rangua hainigu oxatama. Bola bagula hayau gara nanga.” Baing Ebram lungu Sarai haruanganoa.
3Binabu Ebram haininoa Sarai xap haining oxatama Haga saing sina na Ebram bila haininoa. Mana bungina baguba Ebram wa mana titia Kenan niani 10.
4Kinu rangua Haga, saing gamona. Bungina Haga xabia ba gamona, ungguti hauxana mana Sarai bila axamang olang.
5Baing Sarai harua na Ebram ba, “Ung sibum mauxangama. Ngata hainigu oxatama ranguaung ba uhatabu, saing hatata xabia ba gamona, binabu hauxana manga bila nga axamang olang. Ne Toxoratamona bagula suxuya kitam.”
6Baing Ebram harua na Sarai ba, “Ulungu to. Hainim oxatama wa hawa maung. Binabu ulibu baraxing baraxinta uhatum ba xai mana.” Saking Sarai libu makasanga sabanga mana Haga laing sauya mala.
7Toxoratamona uleginama sok mana Haga haxek mana lang maxamaxang tela wa long xoliania, mana daxanga ila Longga Sur.
8Baing harua ba, “Haga, Sarai haining oxatama, uma bi ma, saing ubo ula bi?” Haxuya ba, “Ngasauya lipuxigu haringina haininoa Sarai saing ngaluki ma.”
9Toxoratamona uleginama harua na ba, “Ugoxoya mala muli rangua lipuxim haringina haininoa saing usu mana haruanganoa.”
10Baing uleginama harua muli ba, “Bagula ngalibu garam ranggindi disok xumang sibuna, saing sanga ba lipudi dititidi te.”
11Baing uleginama harua muli na ba, “Ulungu to, gamom saing bagula uhayau gara lup tela. Bing uxu yanoa ba Ismail, namua na Toxoratamona lungung utang mana maxangama.
12Bagula wa bila donki abunging tela. Bagula xukxugia lipu longgalo, saing lipu longgalo bagula duxukxugia, saing bagula rung xai rangua sibindi te.”
13Haga hatumia muli Toxoratamona harua na ba, saing sina yaya baguli na: “Ung Urana ubagu nga.” Namua na harua ba, “Ngabagu Urana bagu nga ba.”
14Namua naga duxu lang maxamaxana ba Ber Lahai Roi. Wauyu la ba, liwe mana longgadi Kades xaung Beret.
15Binabu Haga hayau garang luba na Ebram, saing Ebram uxu yanoa ba Ismail.
16Ebram nianidi 86, baing Haga hayau Ismail na.
