Text copied!
CopyCompare
Urana Xuana - Unggutinga (Stat)

Unggutinga (Stat) 12

Help us?
Click on verse(s) to share them!
1Tauna, Toxoratamona harua na Ebram ba, “Usauya titima, bakbagimdi xaung tibum sibindi, saing ula mana titi tela bagula ngahatanga naung.
2“Bagula ngalibu garamdi disok bakbak sabanga sibuna, saing bagula ngasina guxama naung. Bagula ngalibu yama sok sabanga sibuna, saing bagula uwa guxam na lipudi.
3Bagula ngasina guxama na lipu gaxarea disina guxama naung, saing bagula ngasina guxam diana na lipu gaxarea disina guxam diana naung. Baing mana ung bagula lipu titiam longgalo daxap guxama.”
4Binabu Ebram ila, bila Toxoratamona bala ba, saing Lot ila rangua. Bungina sauya long sabangga Haran, Ebram nianindi 75.
5Xap haininoa Sarai, kixinginoa garanoa Lot, xalingidingdi, xaung lipuxiding oxatamdi daxapdi Haran, saing dimesa disu mana daxanga sabanga ila titia Kenan. Disok Kenan,
6baing dahaxa maluxu mana titia ba laing disok mana xai sabangga duxu ba More, haxek mana long sabangga Sekem. Mana bungina baguba Kenandi duwa mana titia baguba.
7Baing Toxoratamona hatangaina na Ebram saing harua ba, “Bagula ngasina titia li na bakbagima.” Binabu la ba Ebram tongtongia kabukabu hananiangam tela bu sabu mana Toxoratamona, namua na hatangaina na.
8Sup, baing ila bila xaxagandi sanga karagia duwa Betel, saing tongtongia tabalaxainoa la ba. Betel wa yuwaxa xaung Ai wa karagia. La ba tongtongia kabukabu hananiangam tela bu sabu mana Toxoratamona, saing wagi saing iti yanoa.
9Sup, baing Ebram mesa ilauba, haxahaxa mala laing sok titia Negep.
10Tauna, gesaga sok mana titia ba, saing Ebram ri mala Isip bu wa la ba sobak teladi, namua na gesak sabanga sok.
11Bungina dibo ba disok Isip, Ebram harua na haininoa Sarai ba, “Ulungu to. Ngaxabiau ung haing gumanging sibuna.
12Bungina Isipdi dibagung bagula daharua ba, ‘Haininoa naga.’ Saking bagula dung nga mati, ne bagula duyungaung uwa.
13Uharua ba ung hamungagua, bu bagula dilibu xai manga namua na uharua bila ba, saing bagula walingagua sup te.”
14Ebram sok Isip, baing Isipdi dibagu Sarai gumanging sibuna.
15Baing bungina Pero oxatanamdi dibagu, diti Sarai gumanginganoa Pero maxania. Binabu xap maluxu numania.
16Pero libu xai mana Ebram namua Sarai, saing sina sipsipdi xaung bulmakaudi, donki monindi xaung hagaxandi, haing lup oxata longgamdi, xaung kameldi na.
17Ning Toxoratamona libu businga sabangadi daxap Pero gabu lipudi duwa rangua numania, namua Ebram haininoa Sarai.
18Binabu Pero wagi Ebram ma saing harua na ba, “Uria baru manga? Baruta ubaxanga nanga te ba hainima?

19Baruta uharua ba hamungama? Binabu ngaxap bila hainigua. Ai, oxop hainima bu tang gala!”
20Baing Pero tabina lipuxindi, saing disuka Ebram haininoa tang mala, tang digabu xalingiding longgalo.