1Sara nianindi 127 disup,
2saing mati mana longga Kiriat Arba, yan tela Hebron, mana titia Kenan. Baing Ebraham usinga saing tangia.
3Kimuya Ebraham yunga Sara sangganoa saing ila hangixaya rangua lipu bakbakkadi Hit. Harua ba,
4“Nga lipu titi telam ngarung lia mang. Hainigua mati baing saing ngabo ngagim titi hataing tela ranguang bu ngatongtongia gobagobanoa bu ngakimang.”
5Baing bakbakkadi Hit daharua ba,
6“Lipu sabanga ulungu to, Ung lipu toxong tela mugamugangam. Ung sanga ukimang hainima mana gobagoba xai tela ranguam ung sibum umogu, binabu gobagoba moxonoa yunga naung bu ukimang hainima.”
7Baing Ebraham li saing turu mana long moxondi.
8Saing harua ba, “Nabu muruim ba ngakimang hainigua ba, bing ngabo axusunga Epron Soha garanoa.
9Mana ina sanga hatanga nanga siang ginagina duxu ba Makpela. Wa singia mana Epron titinoa. Abala bu yunga ginanga ba nanga xang longa maximia binabu ngasina giminak maringina na. Bu gobagoba ba sok bila ngayua.”
10Epron wa liwe mana bakbakkadi Hit saing dahangixaya mua long gamgamingang xaluxinia. Lipu bakbakkadi duwa saing dilungu Epron haxuya haruanga na Ebraham bila li.
11“Lipu sabanga ulungu haruangagua. Labu ugim ginanggabau tai. Nga bagula ngasina olang naung, xaung titi ginanggam wa mana. Mana bakbagigudi maxadingia, hatata ngasina titia li naung bu ukimang hainima.”
12Baing Ebraham turu mana hainglipudi.
13Saing maxadingia bala Epron ba, “Epron ngabo uta tangamliandi bu ulungu haruangagua to. Hatata bagula ngagim titi hataina ranguaung. Utuxu siangigua bu ngakimang hainigua mana titia baguba.”
14Baing Epron haxuya Ebraham haruanganoa ba,
15“Lipu sabanga ulungu. Titi giminaginoa sanga mana 50 kilo silba. Ne heku, axamang olang liwe mana kitam. Oxop titia bu ukimang hainima.”
16Ebraham yaha mana haruanga ba, saing hangalia 50 kilo silba mana lipu sianggamdi bila Epron mogu Hitdi maxadingia saing sina na Epron ba gim titia.
17Mana kubolua ba Ebraham xap Epron titinoa wa, Makpela haxek rangua longga Mamre. Ebraham xap titi xaung ginang sianggam xaung timungdi mana titia baguba.
18Baing bakbakkadi Hit daxabia ba titia Ebraham iniauba.
19Kimuya Ebraham kimang haininoa Sara, mana siang banggumina wa mana titia Makpela, haxek rangua mamre mana titia Kenan. Mamre yan tela Hebron.
20Hitdi titiding hataina xaung gobagoba banggumgam wa mana sok Ebraham bakbaginia.
