1Ebram nianindi 99, baing Toxoratamona hatangaina na, saing harua ba, “Nga Urana Haringing Sibunam. Bing ulibu kubolu maringing sibuna maxagia xaung oxola mana kubolu dian tela.
2Baing bagula ngahau haruangua liwe mana kitam, saing bagula ngalibu garam ranggindi disok xumang sibuna.”
3Baing Ebram gung king tuxundi saing turu mari titia, saing Urana harua na ba,
4“Ulungu to. Haruanga ngahau ranguaung bing: Bagula uwa numanuma xumana mugangadinga.
5Hatata ila bagula duxu yama Ebram te. Bagula duxung ba Ebraham. Namua na ngamogung ba usok numanuma xumana mugangadinga.
6Bagula ngalibu garam ranggindi disok xumang sibuna, bu duwa numanumadi, saing teladi bagula disok xaitamoxidi.
7Bagula ngahau haruagua li liwe mana kitam xaung rangua garam ranggindi disok kimu, saing bagula wa bungingbunginalo. Haruangua ngahau bing: Ngawa Urana ungia xaung Urana mana garam ranggindi disok kimu.
8Titia Kenan hatata uwa mana bila lobu, bagula ngasina ba wa ungia xaung garam ranggindi disok kimu dingia bungingbunginalo. Baing bagula ngawa Urana dingia.”
9Baing Urana harua na Ebraham ba, “Ne ung ba, bing ung gusu mana haruangua ngahau ba, ung xaung garam ranggindi disok kimu bing asu mana.
10Haruangua ngahau ranguaung xaung rangua garam ranggindi disok kimu, haruangua asu mana bing: Lup longgalo liwe mang bing axuxu sanggadingdi.
11Axuxu sanggaimdi bu wa hatanganga mana haruangua ngahau liwe makira.
12Mana gara lup longgalo disok kimu, bungina xaidabidingdi 8 bing axuxu sanggadingdi. Xaung, axuxu lipuxim oxata olanggamdi sanggadingdi xauna. Lipu oxata olanggamdi adi baudingdi dahayaudi numaimia xaung adi agimdi rangua bakbak teladi.
13Heku bauding dahayau numaimia kimbo agimdi siangimia, ding longgalo bing axuxu sanggadingdi. Sanggaimdi bing hatanganga bagula wa manadi bu hatanga ba axap haruangua ngahau ba wa bungingbunginalo.
14Nabu lipu tela xap sangga xuxunganoa te bing dali haruanga ngahau ba. Bing asuka lipua ba sanguang ang bakbagindi.”
15Baing Urana harua na Ebraham muli ba, “Ne hainima Sarai, hatata ila uxu yanoa ba Saraiu tai. Yanoa bing Sara.
16Bagula ngasina guxama na, saing bagula xap gara lup naung. Bagula ngasina guxama na bu wa numanuma xumana mugangadinga. Garang rangging teladi bagula disok xaitamoxidi.”
17Baing Ebraham gung king tuxundi saing turu mari titia, saing masisi, hatum ba, “Lipua nianindi 100, sanga mana xap gara? Ne Sara nianindi 90, sanga mana hayau gara?”
18Baing Ebraham harua na Urana ba, “Nabu Ismail wa hawa mana guxama usina ba bing sangau!”
19Baing Urana harua ba, “Tegu. Hainima Sara bagula hayau gara lup naung, bing uxu yanoa ba Aisak. Bagula ngahau haruangua rangua xaung garang ranggindi disok kimu, saing bagula wa bungingbunginalo.
20Ne mana Ismail, ngalungung ba. Bagula ngasina guxama na bu garang xumana. Bagula sok xaitamoxi 12 tibuding, saing garang ranggindi bagula disok numanuma sabanga.
21Ning bagula ngahau haruangagua rangua Aisak. Ina Sara bagula hayau naung mana sobakka baguli niani etuama.”
22Harua rangua Ebraham laing sup, baing Urana sauya, haing mala.
23Mana xaidapka naga Ebraham xap Ismail xaung lipuxing oxata olanggam longgalo dahayaudi numania xaung adi gimdi sianginia, lup longgalo duwa numania, xapdi mala saing xuxu sanggadingdi, bila Urana bala ba.
24Ebraham nianindi 99 bungina duxuxu sangganoa,
25ne garanoa Ismail nianindi 13.
26Duxuxu Ebraham Ismail tang sanggadingdi xauna mana xaidap taininau.
27Baing duxuxu Ebraham lipuxing oxata olanggam longgalo sanggadingdi xauna, adi dahayaudi numania xaung adi gimdi rangua lipu long telamdi. Duxuxu lup longgalo rangua Ebraham.
