1Tauna, Ebraham sauya longga Mamre, saing ila wa hataina Negep liwe mana long luwadi Kades xaung Sur. Baing kimuya ila wa longga Gerar.
2La ba bala lipudi ba, “Sara bing hamungagua.” Binabu xaitamoxi Abimelek soxi lipuxing teladi mala ba daxap Sara ma rangua.
3Ne yambong tela Urana ma rangua Abimelek mibingia, saing bala ba, “Ulungu to! Bagula umati namua na haingga oxop ba yaungam.”
4Ne Abimelek wa rangua Sara teguyu, binabu harua ba, “Toxoratamona nabu lipua libu kubolu dian tela te, bing bagula uhanggalangia xaung lipuxindi?
5Namua na bala nga ba Sara bing hamunganoa. Sara xauna harua ba Ebraham bing moxongonoa. Ngaxap haingga li, ne ngahagaxa ba kubolugua maring. Ngalibu kubolu dian tela te.”
6Baing mibingia Urana harua na ba, “Wane, ngaxabia ba uhagaxa ba kuboluma maring, binabu ngasoxautiung ba sanga ba ulibu kubolu diana maxagia te. Namua naga ngayungaung te bu uwa rangua.
7Ne hatata bing usina haingga ba mala muli rangua ayuana. Namua na lipua ba, lipuxigu suxunguxunguama. Binabu bagula sabu maung bu sanga ba umati te. Ne nabu usina mala muli te, bing maxuna ung xaung lipuxim longgalo bagula amati.”
8Buragina buraraging sibuna, baing Abimelek wagi yanamindi dima. Baxanga nadi mana baraxinta sok, baing dimaxuwa sibuna.
9Baing Abimelek wagi Ebraham ma, saing xusunga ba, “Uraxata mam? Ngalibu baru kubolunta maung bu ulibu nga xaung lipuxigudi am gawa mauxangang sabangia? Kubolua ulibu manga ba maring te.”
10Baing Abimelek xusunga Ebraham ba, “Mana baru namuxinta ulibu bila ba?”
11Baing Ebraham haxuya ba, “Ngahatum manga ba, ‘Longga li moxondi dimaxuwa Urana te. Nabu dibo ba dahanai hainigua bing bagula dung nga mati.
12Ne alaba maxunau, Sara bing hamungagua. Tam tibumam taininau, ne baumam taininau te. Ne ngayau.
13Ne bungina Urana tabina nga ba ngasauya tibugu numanoa bu ngala mana long teladi, ngabala ba, ‘Kubolua uhatanga murum sibuna manga bing: Long baruamta tam tala mana, bing ubaxanga na lipudi ba “Moxongogua.” ’ ”
14Baing Abimelek sina Sara muli mala rangua Ebraham, saing sina sipsipdi xaung bulmakaudi xaung lipu oxata olanggam hainglupdi xauna na.
15Baing Abimelek harua ba, “Ubagu titi longga baguli bing ngayuadi. Uwa mana long baruamta ubo mana.”
16Baing harua na Sara ba, “Ngasina 1,000 siang silba na moxongama. Alali bing hamaringia mauxangana sok maung ba lipu longga duwa rangaung maxadingia. Ulibu mauxangang tela te.”
17Baing Ebraham sabu na Urana, saing Urana hamaringia Abimelek xaung haininoa xaung haining oxata olanggamdi bu sanga ba dahayau muli.
18Namua na Toxoratamona soxauti gara daxanganoa mana Abimelek bakbaging longgalo namua bing Ebraham haininoa Sara ba.
