1Toxoratamona hatangaina na Ebraham haxek mana Mamre xaing sabangadi. Xaidaba sala haringina, saing Ebraham rung xahing xaluxinia.
2Itina saing bagu lipu tuwa dili haxek mua. Bagudi, baing yunga xahing xalunoa luki mala sap ranguadi, saing gung king tuxundi turu mari titia.
3Harua ba, “Lipu sabanga, nabu murum sibuna manga, bing uwa mongaita, labu udali nga lipuxim oxatamau tai.
4Awa mua, lipuxigu oxatama xap langa ma bu adamia kimdi to. Sup baing ayagua xai namuya li.
5Ngaxap anginga teladi ma nang bu haringiang to, tauna ala ba. Namua na ama rangua nga lipuxim oxatama.” Baing daharua ba, “Sangau, ulibu bila uharua ba.”
6Binabu Ebraham ila sap xahinia rangua Sara saing harua ba, “Ula oxop wit gagabing mina tuwa, uxugia sap bu utau salanga.”
7Saking luki rangua bulmakaundi saing mogu tutubing dungmanangang tela. Xap mala rangua lipuxing oxatama, saing xauxau sap ba tutu saing tau.
8Baing xap bulmakau suing langina xaung sis xaung bulmakau mututungana tau ba ma, saing sina nadi. Daxang mua, baing Ebraham li haxek ranguadi xai tela namuya.
9Baing duxusunga ba, “Hainima Sara kabi?” Baing harua ba, “Wa xahi lunia.”
10Baing tela harua ba, “Bagula ngagoxoya ma muli mana sobakka baguli niani etuama, saing hainima Sara bagula sep ing sibung garang luba.” Ne Sara wa xahi lunia haxek xaluya lipua ba ubunia, binabu lungu haruanganoa.
11Ebraham Sara tang duwa duanga ba, binabu Sara nianing hayauxingam disup ba.
12Baing ina naga Sara masisiaina saing harua naina ba, “Nga xanronggi ba saing sanggagua xabati ba. Ayuagu xauna wa duanga ba. Binabu ngayaha baru bu ngahayau?”
13Baing Toxoratamona harua na Ebraham ba, “Baruta Sara masisi saing harua ba, ‘Nga xanronggi ba. Ne ngahayau gara baru?’
14Ulungu to. Axamang tela haxi buk mana Toxoratamona te. Bagula ngagoxoya ma muli mana sobakka baguli niani etuama, saing Sara bagula sep ing sibung garang luba.”
15Ne Sara maxuwa saing hatiam ba, “Nga ngamasisi te.” Ne harua ba, “Tegu. Umasisi.”
16Lipu tuwadi ba dimesa ba dilauba, baing tung dibagu mari long sabangga Sodam. Baing Ebraham haxa ranguadi ba yungadi daxangia.
17Baing Toxoratamona harua ba, “Axa ngabo ba ngalibu labu ngahisa mana Ebrahamgu tai.
18Namua na bakbagindi bagula disok xumang sibuna, haringing sibundi. Baing numanuma longgalo bagula daxap guxama namua bing axa xaiya ba ngalibu mana. Mana ina bagula ngalibu xai mana lipu longgalo duwa mana titi hataing longgalo.
19Namua na ngamogu ba sina haruangagua na garandi xaung bakbagidingdi, bu disu mana Toxoratamona daxanganoa, mana dilibu kuboluadi daxai xaung dimaring. Baing ina naga, bagula ngalibu axamang longgalo rangua bila ngahau haruangua ba.”
20Baing Toxoratamona harua ba, “Ngalungu harungianga xumang sibuna daharungia long sabangga Sodam xaung Gomora kuboluding diandi. Kuboluding didoa sibuna.
21Binabu bagula ngari mala bu ngabagu kuboluadi dilibudi sanga mana haruanga ngalungu ba. Nabu tegu, bing bagula ngaxabia.”
22Sup, baing lipu luwadi ba tang digoxoya mala saing dila Sodam. Ne Ebraham wauyu rangua Toxoratamona.
23Baing Ebraham ila haxek rangua saing xusunga ba, “Ne bagula uhanggalangia lipu kubolu xaiyamdi xaung lipu kubolu dianamdi xauna?
24Nabu lipu kubolu xaiyam 50 duwa mana long sabangga ba, bagula uhanggalangiadi xauna? Maxuna, sanga ba uhatumia lipu kubolu xaiyam 50 te, binabu usingadi bu uhanggalangia longga ba te?
25Kubolua ba bila ung kuboluma te, ung lipu kubolu xaiyamdi xaung lipu kubolu dianamdi mati bing maring te. Ung kuboluma te! Namua na Lipu Titi Longgalo Suxuyanganama bing libu kubolu maringina.”
26Baing Toxoratamona harua ba, “Nabu ngabagu lipu kubolu xaiyam 50 duwa long sabangga Sodam, bing manadi bagula ngasauya longga ba wa.”
27Baing Ebraham harua muli ba, “Toxoratamona, nga sanga ba ngali haringina bu ngaharua naung te. Nga lipu olang. Nga bila gagap xaung hayata.
28Ne, bagula uria baru nabu lipu kubolu xaiyam 45 ding ganiding duwa? Bagula uhanggalangia long sabangga ba masup namua na 45 duwa, ne 50 tegu?” Baing Toxoratamona harua ba, “Nabu ngabagu 45 duwa, bing bagula ngahanggalangia te.”
29Baing Ebraham harua muli na ba, “Ne, nabu 40 ding ganiding duwa, bing baruta?” Baing Toxoratamona harua ba, “Nabu ngabagu 40 duwa, bing bagula ngalibu te.”
30Baing Ebraham harua ba, “Toxoratamona, labu atim disalau tai. Ne, ngabo ba ngaharua. Nabu 30 ding ganiding bing baruta?” Baing Toxoratamona haxuya ba, “Nabu ngabagu 30 duwa, bing bagula ngalibu te.”
31Baing Ebraham harua ba, “Toxoratamona, nga sanga ba ngali haringina bu ngaharua naung bila li te. Ne, nabu 20 ding ganiding duwa, bing baruta?” Baing Toxoratamona harua ba, “Nabu ngabagu 20 duwa bing bagula ngahanggalangia te.”
32Baing Ebraham harua muli ba, “Toxoratamona, labu atim disalau tai. Ne, ngabo ba ngaharua bunging tela muli. Nabu 10 ding ganiding duwa la ba bing baruta?” Baing Toxoratamona haxuya ba, “Nabu ngabagu 10 duwa bing bagula ngahanggalangia te.”
33Toxoratamona hangixaya rangua Ebraham laing sup, baing ilauba. Baing Ebraham goxoya mala muli numia.
