1Muga bing titi longgalo daharua mana xuaxua taininau.
2Lipudi dila dila duwa karagia, baing disok mana goma sabanga tela wa titia Sinar, saing dirung la ba.
3Baing daharua na ding ba, “Ama, tatongtongia birik, tataudi yabia bu daharing bu tatongtongia numa.” Binabu ditongtongia numadi birigia. Ditongtongia saingia te. Baing taga birikdi mana kolta.
4Saking daharua ba, “Ama, tatongtongia long sabanga tela nakira xaung numa maxaxayam tela ila laing sok taxa sabalunia. Talibu bila ba, baing bagula tasok ramramo sabanga, nam tala taining tainina mana titi longgalo.”
5Baing Toxoratamona ri ma ba bagu long sabangga ba, xaung numa maxaxaya ditongtongia.
6Baing Toxoratamona harua ba, “Ai, lipuadi li bakbak taininau xaung xuading taininau. Nabu dungguti dilibu bila li, bing bagula dilibu axamang longgalo murungadingia dahau hatumingua ba dilibudi.
7Tari mala bu talibudi dahasuxi mana xuadinga bu daxabia riadingdi xuadingdi te.”
8Binabu Toxoratamona utudi saing dila mauli mana titi longgalo, saing disauya oxatua mana long sabangga ba.
9Namua naga duxu long sabangga ba Babel. Namua na Toxoratamona libu lipu titiam longgalo dahasuxi mana xuadinga. Baing utudi saing dila mauli mana titi longgalo.
10Siem naxuyanganoa bing bila li. Niani luwa kimuya mana silinga sabangua, Siem nianindi 100, baing xap Arpaxat masok.
11Siem wa 500 niani muli kimuya mana xap Arpaxat masok, saing haininoa hayau gara teladi muli, haing xaung lup.
12Arpaxat nianindi 35, baing xap Sela masok.
13Arpaxat wa 403 niani muli kimuya mana xap Sela masok, saing haininoa hayau gara teladi muli, haing xaung lup.
14Sela nianindi 30, baing xap Eber masok.
15Sela wa 403 niani muli kimuya mana xap Eber masok, saing haininoa hayau gara teladi muli, haing xaung lup.
16Eber nianindi 34, baing xap Pelek masok.
17Eber wa 430 niani muli kimuya mana xap Pelek masok, saing haininoa hayau gara teladi muli, haing xaung lup.
18Pelek nianindi 30, baing xap Reu masok.
19Pelek wa 209 niani muli kimuya mana xap Reu masok, saing haininoa hayau gara teladi muli, haing xaung lup.
20Reu nianindi 32, baing xap Seruk masok.
21Reu wa 207 niani muli kimuya mana xap Seruk masok, saing haininoa hayau gara teladi muli, haing xaung lup.
22Seruk nianindi 30, baing xap Nahor masok.
23Seruk wa 200 niani muli kimuya mana xap Nahor masok, saing haininoa hayau gara teladi muli, haing xaung lup.
24Nahor nianindi 29, baing xap Tera masok.
25Nahor wa 119 niani muli kimuya mana xap Tera masok, saing haininoa hayau gara teladi muli, haing xaung lup.
26Tera nianindi 70, baing xap Ebram, Nahor xaung Haran masok.
27Tera ing naxuyanganoa.
28Bungina Tera wauyu, Haran mati yabania Ur, mana Kaldia titidinga.
29Ebram Nahor tang diyau. Ebram haininoa yanoa Sarai, saing Nahor haininoa yanoa Milka. Milka kixinginoa Iska Haran nanuhangindi.
30Ne Sarai wa xuhi, hayau te.
31Tera xap garanoa Ebram, longanoa Sarai Ebram haininoa, xaung garang ranggina Lot Haran garanoa, saing gabudi diyunga long sabangga Ur wa Kaldia titidingia, saing dibo ba dila titia Kenan. Ne dila daxanga lia disok mana long sabangga Haran, saing dirung la ba.
32Tera nianindi 205, baing mati mana long sabangga Haran.
