1Bunging gesakkam mana titia Kenan ila mugau Ebraham wa saing sok. Baing Aisak ila Abimelek saing xaitamoxi Pilistiam mana titia Gera.
2Baing Urana sok rangua Aisak saing bala ba, “Labu ula Isipku tai. Ung sanga uwa mana titi hataing tela la li, nga sanga ngabalaung mana.
3Xauna urung mana titia li binabu ngawa ranguaung bu ngalibu xai maung. Titi longgalo ngasina naung xaung bakbagimdi bila haruanga ngalibu mana Ebraham ba.
4Nga sanga ngalibu bakbagimdi disok xumana bila hatungdi sabalunia. Binabu ngasina titi hataing longgalo nadi. Ne lipu titiamdi bagula duxusunga nga ba ngasina guxama nadi bila ngasina na bakbagimdi ba.
5Ebraham naxu mana haruangagua xaung kubolugudi. Binabu ngalibu xai maung.”
6Baing Aisak wa mana titia Gera.
7Bungina duxusunga mana haininoa, baladi ba, hamungagua. Maxuwa, saing baxanga te, ba “Alali hainigua.” Namua na Aisak hatum labu dung bu daxap haininoa. Namua na Rebeka haing xai sibuna.
8Aisak rung mana longga mongaitau, baing Abimelek, xaitamoxi Pilistiama li suangia saing bagu Aisak tuxu haininoa, Rebeka.
9Baing Abimelek wagi Aisak saing bala ba, “Hatata ngaxabia, haingga li ung hainima! Baruta ning ubo ba hamungama?” Aisak haxuya ba, “Ngahatum ba, nabu ngabaxanga bing bagula dung nga mati.”
10Baing Abimelek aharua muli ba, “Ulibu baru mam? Nabu lipu tela ranguam kinu rangua hainima, bing am galibu doa, ne ung sibum axamang namua sok ranguam.”
11Kimuya Abimelek harua haringina na bakbagindi ba, “Nabu lipu tela libu doa mana lipua li xaung haininoa bing ina bagula mati.”
12Aisak oxata umanga saing xuma angingadi mana titia ba. Mana niani baguba angingadi disok xumang sibuna, dali angingadi xumadi muga ba. Namua na Urana libu xai mana.
13Ina xap siang xumana saing sok lipu sabanga.
14Ina sanga sipsip, bulmakau xaung lipu oxatamdi, binabu Pilistiadi gamoding didoa mana.
15Baing daxap titia saing diyaxang lang banggumindi waleu Ebraham lipuxing oxatamdi dikidi.
16Kimuya Abimelek bala Aisak ba, “Uyungam, namua na usok haringina baing. Am sanga maung te.”
17Baing Aisak yunga longa saing ila rung haxuwa Gera.
18Waleu Ebraham tongtongia lang banggunggamdi laba. Bungina mati Pilistiadi diribadi. Hatata Aisak xaxadi muli, saing sina yaya waleu tibuna sina muli nadi.
19Bunging tela Aisak lipuxing oxatamdi ditongtongia tela saing langa sok.
20Gera lipuxiding oxatamdi digabu Aisak lipuxing oxatamdi dahayayaung mana lang banggumgam mana bulmakauadi duwasa manadi ba. Bing Aisak xu langa ba. Haruanga haungingam, namua na lipudi dahayayaung rangua.
21Baing Aisak lipuxing oxatamdi diki lang tela muli, saing dahayayaung mana xauna. Bing Aisak xu lang ba Kubolu Haungingam.
22Ne kimuya Aisak yunga longa ba saing ki lang tela muli. Bungina lipu dahaxangia mana te. Baing Aisak uxu langa ba, Long Runginga Xaiyam. Binabu tarung xai bu talibu axamang xumang sibuna mana titia li.
23Kimuya Aisak yunga longa ba saing ila sok Berseba.
24Mana yambonga ba Urana bala ba, “Nga Urana tibum Ebraham inia. Labu umaxuwau tai. Ngawa ranguaung, bagula ngalibu xai maung sanga bakbagimdi disok xumana, namua na murugu sibuna mana lipuxigu oxatama Ebraham.”
25Baing Aisak tongtongia alta tela saing sabu na Urana. Kimuya tongtongia longa, baing lipuxing oxatamdi diki lang banggumgam tela.
26Abimelek yunga titia Gera saing ma bagu Aisak. Ahusat, lipua sina hatuminga na Abimelek, Pikol tang ina ami tela, tang digabu Abimelek ma.
27Baing Aisak baladi ba, “Waleu asuka nga, mana titima, baruta ning ama rangua nga.”
28Baing dahaxuya ba, “Am gaxabia ba Urana wa ranguaung. Am gabo talibu kontrak taininau. Haruanganoa wa bila li.
29Labu ulibu doa mamgu tai. Am galibu doa maung te, Am galibu kubolu xai sibuna maung. Bungina uyunga titima ma am gamomam taininau. Hatata am gabagu ba Urana libu xai maung.”
30Baing Aisak tau anginga sabanga nadi saing daxang xaung dinung.
31Buraraginauyu dimesa saing daharua haringing sibuna ba dirung xauna. Baing Aisak baladi ba, “Ala mosiu.” Baing dilauba.
32Mana xaidapka ba Aisak lipuxing oxatamdi dima saing dibala ba, “Am gaki banggum tela saing langa sok mana!”
33Aisak uxu ba Siba. Bing ma hatata duxu titia ba Berseba.
34Iso nianindi 40 saing yau Yudit, Beri garanoa. Lipu tela mana bakbakka Hit. Iso haining tela Besemat, Elon nanuhanginoa mana bakbakka Hit.
35Haing luwadi kuboludinga hauli Aisak Rebeka tang te.
