1Tauna, mana asaxa abunging longgalo Toxoratamona Urana tongtongiadi, moxa dalidi mana kubolu murakkam. Xusunga hainga ba, “Ai, maxuna Urana biliang ba axang xai marang longga duwa maluxu umangia li?’ ”
2Baing hainga harua na moxua ba, “Amtam sanga ba am gaxang xai marandi maluxu umangia,
3ne Urana harua ba, ‘Labu axang xai marana mana xaiya li liwe umangiau tai, saing labu aringringgu tai, nam tang gamati.’ ”
4“Ne moxua harua na hainga ba, “Tegu. Sanga amati te.
5Urana harua bila ba namua na xabia ba bungina axang maranoa bagula tang maxaimdi daxaxading, saing bagula asok bila Urana, saing axabia xai xaung diana.”
6Hainga bagu xaiya ba marandi xai sibuna mana xangingua, xaung gumanging sibuna, xaung xaiya ba iti murunganoa ba xap xabiangua. Bagu bila ba, baing ina naga, kiri teladi saing xang. Saking sina tela na ayuana, saing xang.
7Baing tang maxading daxaxa ding, saing tang daxabia ba duwa mulang. Baing dahatu xaiya pik londi, saing dahaxam mana kaukau dingtang sibuding.
8Bungbung, longa xaringa, baing luba haininoa tang dilungu Toxoratamona Urana haxa maluxu umangia, baing dihisa mana Toxoratamona Urana liwe mana xai umangamdi.
9Ne Toxoratamona Urana wagi mana luba ba, “Uwa bi?”
10Baing haxuya ba, “Ngalungung uhaxa maluxu umangia, saing ngamaxuwa, namua na ngawa mulang. Binabu ngahisa maung.”
11Baing xusunga ba, “Gaxarea balaung ba uwa mulang? Oxong xai marana mana xaiya ngabiliung mana ba?”
12Luba harua ba, “Hainga usina ba wa rangua nga—ina sina xai marana nanga, saing ngaxang.”
13Saking Toxoratamona Urana xusunga hainga ba, “Uraxata ulibu bila ba?” Hainga harua ba, “Moxua tuxu murak manga, saing ngaxang.”
14Binabu Toxoratamona Urana harua na moxua ba, “Ulibu bila ba, binabu mana asaxa nangnang xaung abunging longgalo mauxangama bagula dalidi sibuna! Bagula uhaxa gamomia saing bagula oxong gagap mana xaidap longgalo walingamia.
15Bagula ngata bixua wa lia mana haing xaung ung, xaung wa lia mana bakbagindi xaung bakbagimdi; bagula tela ruha toxoma, saing bagula uyangu king tambonga.”
16Harua na hainga ba, “Bagula ngalibu salak hayauxingama xapkung sok sabanga sibuna, saing bagula uxunumia salak sabanga bungina uhayau garadi. Murungama bagula sabanga mana ayuam, ne bagula wa etua maung.”
17Baing harua na Adam ba, “Namua ulungu hainima saing oxong xai marana ngabiliung mana ba, ‘Labu oxonggu tai,’ “Ulibu bila ba, binabu ngata titia mauxangania, bagula umakasa mana oxop angingua mana xaidap longgalo walingamia.
18Waxu ruxunamdi xaung tatubang diandi bagula dikau umangama, saing bagula oxong anginga abungindi.
19Bagula salaksalaga xap ramramoma, bungina uxuma xaung oxop angingua, laing umati ugoxoya muli titia ngatongtongiaung mana ba, namua na uwa titia, saing bagula usok titia muli.”
20Luba uxu haininoa Ip, namua na bagula sok lipu walingam longgalo bauding.
21Baing Toxoratamona Urana tongtongia imang asaxa sangganamdi na Adam haininoa tang saing sausaudi.
22Baing Toxoratamona Urana harua ba, “Alungu to. Luba sok bila kiria tela, xabia xai xaung diana. Bagula xai te nabu raria rimana saing kiri xai marandi mana xaiya sina walinga, saing xang bu wa bungingbunginalo.”
23Binabu Toxoratamona Urana suka luba mana Umanga Iden, ba ki titia Urana tongtongia mana ba.
24Suka luba masok, baing ta kerubimdi Umanga Iden sanga karagia, xaung waxang sabanga bilikbiliga bila yap luliandi saing xukxugia sanga long longgalo bu wasa mana daxangua ila mana xaiya sina walingua.
