1Waapacenryaya atthu wuncererannyaa mwiilaponi ni yaayaracaka asaana asithiyana,
2asaana asilopwana a Nluku yahoona wiira asaana asithiyana aatthu ayo yaari ooreeraca, ni yahaathanla ale yatepile wacivela.
3Vano Mwaneene Nluku aheera: Nlattu wotaampi ca atthu, Nnepa aka khunhala ukhala ukati wothene ni atthu, kontha ule ri irutthu. Uyo nohala ukhala myakha iminya wo sirini (120) paahi.
4Yoole ukati ule, mwiilaponi yahaawo atthu oosancamaca. Wahoolo asaana asilopwana a Nluku wathukumaanannyaya asaana asithiyana a atthu ni yayaranacaka asaana. Ayo phaari anakhotto okuru ni ooruma ncina okhalayi.
5Mwaneene Nluku ahoona wiira itampi ca atthu caanatepa winciva mwiilaponi ni moopuwelo, omunrimani mwaya yaari ukati wothene upanka paahi coonanara.
6Vano Mwaneene Nluku aheera: Koonne wene kaapankaka atthu mwiilaponi mu, ni iyo yahonrusiha venci wanrimani wawe.
7Mwaneene Nluku aheera: Kinawaamalamaliha mwiilaponi atthu yapankilyaka, atthu ni ciicammo inama cuulupale ni cikani ni asaanuni o wirimu. Koonne wene kipattusaka cothene nnya.
8Nanso Nowee ahophwanya nnema wamiithoni wa Mwaneene Nluku.
9Nnya phi cokhumelela co neethi wa Nowee. Nowee aari ntthu mayasariya, ookhweeli na atthu o yooyo ukati uyo. Uyo eetta ni Nluku.
10Nowee ahaayara asaana araru: Semu, Kani ni Yafeti.
11Vaavale, ilapo yahohononnya wamiithoni wa Nluku ni yahocara coonanara capankaya atthu.
12Woonnyawe wiira ilapo ihotankannyaa, kontha atthu othene omwiilaponi ahohapuwa malamulo aka.
13Nluku ahomwiirela Nowe: Kinawamalamaliha atthu othene, kontha ilapo yothene ihocara coonanara cimpankaya. Phimaana mi kinawakwanyulaca ni ilapo eyo.
14Nanso we, upanke ikalawa yothaapwa co mpila. Ukawanihace, cikhale ikatti mwiittayi mwaya ni uttiyace ni uloko nhina ni vate.
15Mwiittayi mwaya ulike imaara iminya tharu (300), mwiikhuvi mwaya imaara hansini (50) ni yeemelelo aya imaara talathini (30).
16Upanke ithari ni upanke icanela nliko wo nuusu no moono mmoca ithari ni isiri yokalawa. Upanke nkhora nceresere ikalawa ni upanke ithari; waculu, iriyari ni vathi.
17Nkoonani. Kinnowiha maasi o naphuvu mwiilaponi, wiira kikwanyulace ilapo yothene ni citthu cothene coomumula cipattusilyaka. Cothene ciri mwiilaponi cimmomala.
18Nanso, ni we, kimmopanka nleehano naka, ni ummokela nkalawani mmo, we na asaanaa, na amwaaraa ni asaaraya asaanaa ayo.
19Ni cothene cimmumula co khula ikhapila yonama, yo nlopwana ni yo nthiyana unlamuliya ukelana nkalawani mmo piili piili, wiira usunke ukumi aya ni we.
20Asaanuni o khula ikhapila, inama co khula ikhapila, inama cowiipurula co khula ikhapila; cinari piili piili cinawuuwela we, wiira usunke ukumi aya.
21Vano we, ukuse coolya cothene cinliya ni wiisunkere, cinhala ukhala coolya ca waa ni coolya conama.
22Ahopanka Nowee toko cahimeriyawe ni Nluku. Commo phaapankilyawe.
