1Kimuya dibala Yosep ba, “Tibum busi.” Binabu Yosep xap garang luwadi Manase, Epraim tang saing dila dibagu tibuna Yekop.
2Baing lipudi dibala Yekop ba, “Garama Yosep ma ba bagung.” Binabu Yekop mesa saing rung uxaingia.
3Baing Yekop bala Yosep ba, “Urana sanga haringinga longgalo sok manga mana long sabanga Lus mana titia Kenan. Saing libu haruanga xai ba libu xai manga.
4Harua ba, ‘Bagula ngasina gara xumang sibuna naung, saing garam ranggindi bagula disok bakbak sabanga. Bagula ngasina titia baguli nadi, saing bagula wa bila titidinga mana bungingbunginalo.’ ”
5Baing Yekop harua muli ba, “Bungina ngasok maung teguyu Isip, hainima hayau gara lup luwa. Gara luwadi ba, bagula duwa bila nga garagudi. Epraim xaung Manase bagula duwa garagu sibundi, bila Ruben xaung Simeon.
6Ne gara disok kimuya mana Manase Epraim tang bing ungiadi. Bungina dituxu sinak mana titia hasangia ding taining tainina bing garadi bagudi li. Dingtang bing sabangadingdi.
7Ngalibu haruanga baguli namua na ngausinga baum Retsel. Mati bungina am gayunga long sabanga Padan, saing ngakimang daxanga rubina Eprata. Eprata bing long sabanga Betlehem yang mugangua.”
8Yekop bagu Yosep garang luwadi saing xusunga ba, “Gara luwadi li gaxarea iniadi?”
9Baing Yosep haxuya ba, “Gara luwadi li ngayuadi. Urana sinadi nanga bungina ngawa Isip.” Tauna Yekop harua ba, “Ngabo ba oxop dingtang ma haxek manga. Ngabo ba ngalibu xai mana dingtang, xaung ngaxusunga Urana bu libu xai mana dingtang.”
10Yekop wa duanga saing maxandi dilaba, sanga mana bagu axamandi xai te. Binabu Yosep xap gara luwadi ba ma haxek rangua Yekop. Baing Yekop tuxu dingtang saing libudi.
11Baing Yekop bala Yosep ba, “Waleu ngahagaxa ba ngabagung muli te, ne hatata Urana yunga nga saing ngabagung xaung garam luwadi.”
12Baing Yosep xap gara luwadi ba mala Yekop kinia, saing turu mari titia, haxek mana Yekop saing sina yaya sabanga na.
13Yosep bo ba ta Manase li rimamo mana Yekop, bing Epraim li xong. Binabu tuxu Manase rimamo ne Epraim tuxu xong saing xapdi mala haxek rangua tibuna Yekop.
14Ne Yekop kisinga rimandi saing ta rimang rimamoa mana kixinginoa Epraim toxonoa. Baing ta rimang xonga etua mana sabanganoa Manase toxonoa.
15Tauna Yekop xusunga Urana ba libu xai mana Yosep bakbagindi, harua ba, “Urana, mugangagua Ebraham xaung tibugu Aisak, tang duwa hawa sibuna maung. Baing uwasa manga xai sibuna bungina baugu hayau nga laing ma hatata.
16Usok manga bila Urana uleginam tela saing oxop nga muli bungina ngabo ba ngadoa. Hatata ulibu xai mana gara luwadi li. Xaung ulibu tang bakbagidingdi disok hainglup xumana. Binabu lipudi sanga ba dahalingalinga yagua xaung Ebraham Aisak tang yadingdi te.”
17Yosep bagu tibuna ta rimang rimamoa etua mana Epraim toxonoa, baing hatum ba kubolua baguli maring te. Binabu tuxu tibuna rimang rimamoa saing bo ba ta etua mana Manase toxonoa.
18Baing bala tibuna ba, “Tibugu, labu ulibu bila bau tai. Gara baguli bing sabangua. Uta rimam rimamoa etua mana toxonoa.”
19Ne tibuna muruna te. Baing bala Yosep ba, “Nga xabiau garagu. Ngaxabiau. Manase xauna garandi bagula disok hainglup bakbak sabanga. Ne kixinginoa xauna garandi bagula disok bakbak sabanga sibuna, saing didali Manase bakbagindi. Bagula disok bakbak sabanga sibuna bila hainglup titi telamdi.”
20Tauna mana xaidapka baguba Yekop libu xai mana dingtang, saing bala Yosep ba, “Bungina Isrel dibo ba duxusunga Urana ba libu xai mana teladi, bagula duxu garamdi yadingdi, saing daharua ba, ‘Urana libu xai mang bila libu mana Manase Epraim tang.’ ” Mana kubolua naga Yekop ta Epraim muga mana Manase.
21Kimuya Yekop bala Yosep ba, “Ulungu. Haxek sibuna ba ngamati. Ne Urana bagula wa ranguang saing xapkang muli mala mana mugangaimdi titidinga.
22Titia mana long sabanga Sekem bing titi xai sibuna. Waleu ngatuxu waxang xaung ruangigu saing ngahaung rangua Amordi saing ngaxap. Bagula ngasina naung. Sanga ba ngasina na kixingimdi te.”
